သျှမ်းပြည်တောင်ပိုင်း၊ တောင်ကြီးမြို့တွင် သော့အတုများဖြင့် ဆိုင်ကယ်များလိုက်လံ ခိုးယူနေကြောင်း စုံစမ်းသိရှိရသည်။
တောင်ကြီးမြို့တွင် ယခင်လများတွင် လူပြတ်သည့်နေရာများတွင် ဆိုင်ကယ်လုယက်မှုများဖြစ်ပွားခဲ့ရာ လက်ရှိတွင် လူများသွားလာနေသည့် နေရာများတွင် သော့အတုဖြင့် ပေါ်တင်ခိုးယူနေကြောင်း မျက်မြင်တွေ့ရှိသည့် ဒေသခံများကပြောသည်။
ပြီးခဲ့သည့် မေလ (၁၀)ရက်နေ့တွင်လည်း တောင်ကြီးမြို့ သွားဆေးခန်းသွားပြသော အမျိုးသမီးတစ်ဦးသည် ဆိုင်ကယ်ကို ရပ်ခဲ့စဉ် အမည်မသိ အမျိုးသားနှစ်ဦးမှ လာရောက်ကာ ၎င်းတို့တွင် ပါလာသော ဆိုင်ကယ်သော့ အတုဖြင့် ပေါ်တင်ဖွင့်ပြီး ခိုးယူသွားကြောင်း ဖြစ်စဉ်သိရှိသူ အမျိုးသမီးတစ်ဦးက ပြောသည်။
“သွားဆေးခန်းပြနေတုန်း ဆိုင်ကယ်ကို ဇက်သော့ခတ်ထားခဲ့တာ။ဘယ်ကလူတွေလည်း မသိဘူး။သူတို့မှာ ပါလာတဲ့ သော့လိုလို အရာနဲ့ ဆိုင်ကယ်ဖွင့်လိုက်တာ ပွင့်သွားတာ။အဲတာကို သူ့ဆိုင်ကယ်ပါဆိုပြီး အတင်း ယူဖို့ လုပ်တာ။ စကားများကြပြီး အထောက်ထာားပြခိုင်းမှ အဲလူနှစ်ယောက်က ပြန်သွားတယ်။” ဟု ၎င်းအမျိုးသမီးတစ်ဦးက ပြောသည်။
အလားတူ ဘုရားဖြူရပ်ကွက်တွင်လည်း မုန့်ဆိုင်ရှေ့တွင် ရပ်ထားသည့် ကလေးတစ်ဦး၏ဆိုင်ကယ်ကို သော့အတုဖြင့် ဖွင့်၍ ပေါ်တင်ယူဆောင် မောင်းပြေးသွားသည်ဟု ၎င်းက ထပ်လောင်းပြောသည်။
ဆက်လက်ပြီး မေလ (၆)ရက်နေ့တွင်လည်း ဟဲဟိုး တောင်ပေါ်ဒေသအကျော် လက်ပံပင်တန်းတွင် ယာဉ်ထိန်းရဲ ဝတ်စုံဝတ်ထားသူ နှစ်ဦးမှ ကားတစ်စီးကို စစ်ဆေးပြီး စီမံချက်ဖြင့် ဖမ်းသည်ဟုဆိုကာ ကားနှင့် စာရွက်စာတမ်း အားလုံးကို ယူဆောင်သွားသည်ဟု သိရသည်။
“မော်တော်ပီကယ် အင်္ကျီဝတ်ထားတာက တစ်ယောက် ၊အမဲဝမ်းဆက်နဲ့က နှစ်ယောက်။သူတို့က ကျနော့်ကားကို တားပြီး ဖုန်းတွေကို စစ်တယ်။ ပြီးရင် စာရွက်စာတမ်း အကုန်စစ်တယ်။ ပြီးတော့ စီမံချက်နဲ့ ဖမ်းတယ်လို့ပြောတယ်။ မနက်ဖြန်မှ အေးသာယာမှာ လာရွေးဆိုပြီး နံပါတ်တစ်ခု ပေးသွားတယ်။ ခု ဆက်မရတော့ဘူး။” ဟု ဖြစ်စဉ်သိရှိသူ အမျိုးသားတစ်ဦးက ပြောသည်။
အဆိုပါ ကားသမားသည် ကားဝယ်ထားသည်မှာ (၅)လသာ ရှိသေးပြီး သက်ဆိုင်ရာ ဌာနများကို လိုက်လံမေးမြန်းသော်လည်း မေလ (၆)ရက်တွင် အောင်ပန်း၊ ကလော၊ ဟဲဟိုးဘက်တွင် အဖမ်းမရှိကြောင်း ပြောသည်ဟု ၎င်းက ထပ်လောင်းပြောသည်။
ယခုကဲ့သို့ ခိုးဆိုးလုယက်မှုများကို တာဝန်ရှိ လူများအနေဖြင့် ဖမ်းဆီးခြင်း အရေးယူ ဆောင်ရွက်ပေးစေလိုကြောင်းလည်း တောင်ကြီးဒေသခံများကပြောသည်။
“တာဝန်ရှိတဲ့ လူတွေက အရေးယူ ဆောင်ရွက်ပေးတာတွေ လုပ်စေချင်တယ်။ခုက သူခိုင်းတွေကို ဖမ်းဆီးတာတွေ အရေးယူပေးတာတွေ မရှိတော့ သူခိုးတွေ မသမာသူတွေက ထပ်ခါထပ်ခါ ခိုးတာတွေ လုယက်တာတွေ ပေါ်ပေါ်တင်တင်ကြီး လုပ်လာတာ။ဒါကြောင့်မို့ ထိထိရောက်ရောက် အရေးယူပေးစေချင်တယ်။” ဟု အဆိုပါ အမျိုးသားက ပြောသည်။
ယခုရက်ပိုင်းအတွင်း တောင်ကြီးမြို့တွင် ဆိုင်ကယ်လုယက်သူများ၊ သူခိုးများ သောင်းကျန်းနေပြီး ထိထိရောက်ရောက် ဖမ်းဆီးခြင်း အရေးယူဆောင်ရွက်ပေးမည့် အဖွဲ့အစည်း မရှိသေးကြောင်းသိရသည်။
Leave a Comments