ထိုင်းနိုင်ငံ ချင်းရိုင်းမြို့ Chet Yot လမ်းပေါ်ရှိ တရားမဝင်အနှိပ်ခန်းတွင် ပြည့်တန်ဆာလုပ်ငန်း လုပ်ကိုင်နေသည့် မြန်မာ ၁ ဦးအပါအဝင် ဆိုင်ဝန်ထမ်း အမျိုးသမီး ၁၇ ဦးကို ထိုင်းရဲက ဖမ်းဆီးလိုက်ကြောင်း သိရသည်။

အသက်မပြည့်သေးသည့် အမျိုးသမီးငယ်အပါအဝင် အမျိုးသမီးများ ပြည့်တန်ဆာလုပ်ငန်း၌ လုပ်ကိုင်နေကြောင်း သတင်းရရှိသည့်အတွက် ထိုင်းလူဝင်မှု ကြီးကြပ်ရေး ဌာန (လဝက)နှင့် ရဲ တပ်ဖွဲ့တို့ ပူးပေါင်း၍ ယမန်နေ့ မေလ ၁၂ ရက် ည ၁၁ နာရီတွင် ဖမ်းဆီးခဲ့ခြင်းဖြစ်သည်ဟု ယနေ့ထုတ် Chiang Mai News သတင်းတစ်ပုဒ်တွင် ဖော်ပြထားသည်။

ထိုင်းလဝကနှင့် ရဲများသည် ဧည့်သည် အယောင်ဆောင်၍ ပြည့်တန်ဆာများနှင့် ပျော်ပါးရန် ဆက်သွယ်ခဲ့ပြီးနောက် ပြည့်တန်ဆာလုပ်ငန်း လုပ်ကိုင်နေသည့် ဆိုင်ဝန်ထမ်း အမျိုးသမီး ၁၇ ဦးကို ဖမ်းဆီးရမိခြင်း ဖြစ်ကြောင်း သတင်းတွင် ဖော်ပြသည်။

အဆိုပါ ဖမ်းဆီးရမိသော အမျိုးသမီး ၁၇ ဦးတွင် နိုင်ငံမဲ့ ၁၅ ဦး၊ ထိုင်းနိုင်ငံသား ၁ ဦးနှင့် မြန်မာနိုင်ငံသား ၁ ဦး တို့ဖြစ်ပြီး အသက် (၁၈) နှစ်အောက် အမျိုးသမီးသမီးငယ် ၂ ဦးနှင့် အသက် ၄၀ နှစ်အရွယ် အမျိုးသမီး မန်နေဂျာတစ်ဦး ပါဝင်ကြောင်း သိရသည်။ ၎င်းတို့သည် တရားဝင်အဖြစ် မှတ်ပုံတင်ထားခြင်း မရှိကြောင်း Chiang Mai News သတင်းတစ်ပုဒ်၌ ဖော်ပြထားသည်။

ဆက်စပ်ဖော်ထုတ် စစ်ဆေးမှုများအရ အမျိုးသမီး ဝန်ထမ်းများသည် ဖောက်သည်များကို တစ်နာရီလျှင် ဘတ် ၁,၀၀၀ မှ ၃,၀၀၀ အတွင်း ဝန်ဆောင်မှုပေးပြီး ဝန်ထမ်းများ၏ အသက်နှင့် အသွင်အပြင်ပေါ် မူတည်၍ ပေးဆောင်ရသည်ဟုလည်း အဆိုပါသတင်း၌ ဖော်ပြထားသည်။

ထို့ပြင် ပြည့်တန်ဆာလုပ်ငန်း လုပ်ကိုင်သူ ဝန်ထမ်း ၁၇ ဦးသည် ပြစ်မှုကျူးလွန်ကြောင်း ဝန်ခံသည့်အတွက် ဥပဒေအရေ အရေးယူသွားနိုင်ရန် ရဲစခန်းတွင် ထိန်းသိမ်းထားသည်ဟု သိရသည်။