သျှမ်းပြည် နောင်ချိုမြို့နယ်၊ သရက်ချိုကျေးရွာကို စစ်ကောင်စီတပ်မှ လက်နက်ကြီးဖြင့် ပစ်ခတ်တိုက်ခိုက်ခဲ့သောကြောင့် အသက်(၅)နှစ်အရွယ် ကလေးတစ်ဦး အပါအဝင် အရပ်သား (၄)ဦး သေဆုံးကာ (၇)ဦး ဒဏ်ရာရရှိခဲ့သည်ဟု TNLA မှ ထုတ်ပြန်လိုက်သည်။
ယမန်နေ့ မေလ (၈)ရက် နေ့လယ် (၁၂)နာရီခန့်တွင် အပစ်ရပ် ကြေညာထားသည့် စစ်ကောင်စီတပ်မှ နောင်ချိုမြို့နယ် သရက်ချိုကျေးရွာအနီးသို့ ထိုးစစ်ဆင် တိုက်ခိုက်လာသောကြောင့် တအာင်း(ပလောင်) အမျိုးသားလွတ်မြောက်ရေး တပ်မတော် TNLA နှင့် တိုက်ပွဲပြင်းထန်စွာ ဖြစ်ပွားခဲ့ကြပြီး စစ်ကောင်စီ အမြောက်တပ်ရင်း ဌာနချုပ် (၉၀၂) မှ သရက်ချိုကျေးရွာသို့ ဒရုန်း(၂)လုံး၊ လက်နက်ကြီး (၁၆)ကြိမ် ပစ်ခတ်ခဲ့သည်ဟု သိရသည်။
“သရက်ချိုရွာက ဓနုရွာပဲ။ အခုက ခနခန စစ်ဖြစ်တာက နောင်လင်ဘက်မှာ၊ အဲ့ဘက်မှာ ဖုန်းလိုင်းလဲ မရဘူး။ ရှေ့နှစ်ပတ်က သရက်ချိုက လူတွေ အုမ္မတီးကို လာလည်သေးတယ်၊ တိုက်ပွဲမဖြစ်သေးဘူး။ ခုရက်ပိုင်းမှ သရက်ချိုရွာမှာ တိုက်ပွဲတွေ ဖြစ်တာ။ အခုတိုက်ပွဲဖြစ်နေတာက နောင်လင်နဲ့ ကံကြီးမှာ ပိုဖြစ်နေတာ” ဟု နောင်ချိုဒေသခံ သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ မေလ (၈)ရက် မွန်းလွဲပိုင်းအချိန် ယာပြင်ကျေးရွာတွင်လည်း စစ်ကောင်စီတပ်နှင့် TNLA တို့ တိုက်ပွဲဖြစ်ပွားခဲ့ကြပြီး စစ်ကောင်စီဘက်မှ ဒရုန်းဗုံး(၂)လုံးနှင့် လက်နက်ကြီးဖြင့် (၂)ကြိမ် ပစ်ခတ်တိုက်ခိုက်ခဲ့သည်ဟု TNLA ထုတ်ပြန်ချက်အရ သိရသည်။
အလားတူ နောင်ချိုမြို့နယ် နောင်လင်ကျေးရွာတွင်လည်း ယမန်နေ့ ညနေ (၆)နာရီတွင် စစ်ကောင်စီတပ်နှင့် TNLA တို့ တိုက်ပွဲပြင်းထန်စွာ ဖြစ်ပွားခဲ့ပြီး သဲခေါရွာမှ နံနက်ပိုင်းအချိန်တွင် ဒရုန်းဖြင့် အဆိပ်ငွေ့ဗုံး (၁)လုံးကို အုမ္မတီးကျေးရွာသို့ လာရောက်ကြဲချခဲ့သည်ဟု အဆိုပါ ထုတ်ပြန်ချက်တွင် ဖော်ပြထားသည်။
“ဒီမှာတော့ နေ့တိုင်း လက်နက်ကြီးနဲ့ ဒရုန်းဗုံးတွေက အဆက်မပြတ်ပဲ။ လေယာဉ်နဲ့လည်း လာလာကြဲတယ်။ အဆိပ်ငွေ့ဗုံးတွေနဲ့လည်း လာကြဲတယ်။ တိုက်ပွဲက ခနငြိမ်လိုက် ပြီးရင် ထဖြစ်လိုက်နဲ့ပဲ။ သူတို့က ခနခန ထိုးစစ်တွေ ဆင်နေတော့တာပဲ” ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်သည် မေလ (၆)ရက်မှ (၃၁)ရက်နေ့အထိ ယာယီအပစ်အခတ် ရပ်စဲရေးကာလ အဖြစ် ထပ်မံတိုးမြှင့် ကြေညာခဲ့သော်လည်း TNLA ထိန်းချုပ်ထားသည့် နောင်ချိုမြို့နယ်ကို အပြင်းအထန် ထိုးစစ်ဆင်မှုများ ပြုလုပ်နေပြီး လက်နက်ကြီးနှင့် ဒရုန်းများဖြင့် နေ့စဉ် တိုက်ခိုက်နေသည်ဟု သိရသည်။
ထို့ကြောင့် နောင်ချိုမြို့နယ်အတွင်းမှ ပြည်သူများကို စစ်ကောင်စီ၏ ဗုံးကြဲတိုက်ခိုက်မှု ရှောင်ရှားနိုင်စေရန် စစ်ရေးအမြဲသတိရှိရန် လိုအပ်ပြီး လေကြောင်းရန် ကာကွယ်ရေးဆိုင်ရာ နည်းလမ်းများကို လိုက်နာဆောင်ရွက်ရန် လိုအပ်သည်ဟု TNLA က အသိပေးထုတ်ပြန်ထားသည်။
Leave a Comments