သျှမ်းပြည် မူဆယ်ခရိုင် တာဝန်ခံတရားသူကြီးအဖြစ် ဒုတိယခရိုင်တရားသူကြီးမှ တာဝန်ယူထားစဉ် အမှုကိစ္စများ ဆုံးဖြတ်ရာတွင် အကျင့်ပျက် လာဘ်စားမှုများ လုပ်ဆောင်နေကြောင်း စုံစမ်းသိရသည်။

မူဆယ်မြို့ ခရိုင်တရားရုံးတွင် ၂၀၂၄ မေလပိုင်းမှ စတင်၍ မူဆယ်ခရိုင် တာဝန်ခံတရားသူကြီး အဖြစ် တာဝန်ယူ ထမ်းဆောင်နေသည့် ဒုတိယ ခရိုင်တရားသူကြီး ဦးသန်းထိုက်စိုးသည် ယခုနှစ် ၂၀၂၅ ဧပြီလ ၉ ရက်နေ့တွင် ရန်ကုန်တိုင်းရှိ ဗိုလ်တစ်ထောင် ခရိုင်တရားရုံး သို့ ပြောင်းရွှေ့ရန် အမိန့်ကျခဲ့ကြောင်း သိရသည်။

ထိုကဲ့သို့ အမိန့်ကျပြီးနောက် မူဆယ် မြို့နယ်နှင့် ခရိုင်အတွင်း ဖြစ်ပေါ်နေသည့် ပြစ်မှု၊ တရားမမှု စသည့် အမှုကိစ္စများ အပေါ်တွင် တရားမျှတမှုမရှိဘဲ ဘက်လိုက်ကာ အမိန့်ချဆုံးဖြတ်၍ အကျင့်ပျက် လာဘ်စားမှုများ သိသိသာသာ လုပ်ဆောင်လာကြောင်း အမှုသည်တစ်ဦးက သျှမ်းသံတော်ဆင့်ကို ပြောသည်။

“သူမသွားခင်မှာ ရှိသမျှ အမှုတွေကို သိန်းပေါင်း ရာနဲ့ချီပြီးတော့ ယူသွားနိုင်အောင်လို့ အမှုတွေကို တစ်ပတ်အတွင်း ရုံးချိန်း ၂ ကြိမ် ၃ ကြိမ် ချိန်းတာအထိ လုပ်နေတာ။ အမွေဆက်ခံခွင့် ကိစ္စတွေမှာလည်း ရှေ့နေမပါဘဲနဲ့ သူ့ဟာသူ သက်သေထွက်ချက်တွေရိုက်၊ အနိုင်ပေးပြီးတော့ အမွေဆက်ခံခွင့် လက်မှတ်တွေကို သိန်းရာနဲ့ချီ တောင်းတာ။ ပြောင်းခါနီးမှာ လွန်လွန်ကျူးကျူးကို ပိုပြီး လာဘ်စားမှုက အခြေအနေ ဆိုးလာတာ”ဟု အမှုသည်တစ်ဦးက ပြောသည်။

ထို့အပြင် အချို့သော တရားမမှု ကိစ္စများတွင် ခရိုင်မှ ပြည်နယ်အဆင့်ထိ အယူခံတက်ခွင့် မရှိအောင် တစ်ဘက်သက် ဆုံးဖြတ်ချက်ဖြင့် အမိန့်ချမှတ်မှုများ ပြုလုပ်နေပြီး ရက်သတ္တပတ်အတွင်း အမှုများကို အပြီး ဆုံးဖြတ်မှုများ ပြုလုပ်ကြောင်း အမှုသည်တစ်ဦးက ဆက်ပြောသည်။

“မျှတမှုက တရားမမှု ကိစ္စမှာ ပိုအရေးကြီးတယ်။ ဥပဒေနဲ့ ပတ်သက်တဲ့ ပြဿနာဆိုတော့ ကြားထဲက အမိန့်တွေကို မကျေနပ်ရင် ပြည်နယ်၊ နေပြည်တော်အထိ တက်ခွင့်တောင် ရှိတယ်လေ။ အခုက တက်ခွင့် မပေးဘူး၊ သူကြိုက်တဲ့အမိန့်ချ အဲ့ဒီအမိန့်က အတည်ပဲ။ တချို့အမှုသည်က ရုံးရောက်ဖို့ မိနစ်အနည်းငယ် နောက်ကျတာကို တစ်ဘက်သက်နဲ့ ချက်ချင်း အမိန့်ချပြီး တစ်ပတ်၊ ၁၀ ရက်အတွင်းကို အမှု တစ်ခုပြီး တစ်ခုကို ပြီးအောင် စစ်နေတာ။ အဲ့လို လုပ်နေတော့ အမှန်တရားတွေက မပေါ်ဘူး၊ သူအနိုင်ပေးချင်တဲ့ ဘက်က အမှန်တရားပဲ”ဟု ၎င်းအမှုသည်က သျှမ်းသံတော်ဆင့်ကို ပြောသည်။

မူဆယ်ခရိုင် တရားရုံးတွင် ဒုတိယ ခရိုင်တရားသူကြီး ဦးသန်းထိုက်စိုးမှ မူဆယ်ခရိုင် တာဝန်ခံတရားသူကြီး အဖြစ် တာဝန်ယူ၍ ယခုကဲ့သို့ အမှုများကို တရားမျှတမှုမရှိ၊ အကျင့်ပျက် လာဘ်စားမှုများဖြင့် စီရင်ချက်ချမှတ်နေခြင်းသည် ပြည်သူများအတွက် ထိခိုက်နစ်နာစေကြောင်း ၎င်းက ဆက်ဆိုသည်။

“ဒီလို အကျင့်ပျက် လာဘ်စားမှုတွေကြောင့် လက်ရှိမှာ ပြည်သူတွေက ဉပဒေအကာအကွယ် မရဘူး၊ နောက်ပြီး‌တော့ မျှတမှု မရဘူး။ မူဆယ်မှာ အရမ်းကို နစ်နာနေကြတာ လူများစုပဲ၊ အမိန့်ကို နေ့စဉ် မှတ်တမ်းတွေမှာ ကြည့်လိုက်ရင် သိသိသာသာကြီးကို မြင်နိုင်ပါတယ်။ ထိခိုက်နစ်နာတဲ့ လူတွေကတော့ သူ ဒီခရိုင်တရားသူကြီး တာဝန်ယူတဲ့ ကာလတစ်လျှောက်ပဲ၊ တချို့ အမှုသည်တွေဆို ရှေ့နေငှားခွင့်ကို မရှိဘူး ချက်ချင်း အမိန့်ချလိုက်တာ”ဟု အမှုသည်တစ်ဦးက ပြောသည်။

တရားမမှု အမျိုးအစားများသည် ကြွေးမြီဆိုင်ရာ၊ မြေယာ/ အိမ်ခြံမြေ အငြင်းပွားမှု၊ စီးပွားရေး စာချုပ်ပျက်ကွက်မှု၊ မိသားစုဆိုင်ရာ ပြဿနာ၊ ဂုဏ်သိက္ခာဖျက်မှု စသည့် အခြားသော အမှုများဖြစ်ကြောင်း သိရသည်။

မူဆယ်မြို့သည် စစ်မက်မဖြစ်ပွားသည့် ဒေသဖြစ်ပြီး၊ လက်ရှိ အချိန်ထိ စစ်ကောင်စီ လက်အောက်ခံ ဌာနဆိုင်ရာများ လည်ပတ်နေဆဲမြို့ ဖြစ်သည်။

မူဆယ်မြို့တွင် လက်နက်ကိုင် အယောင်ဆောင်အဖွဲ့များက ဒေသခံပြည်သူများထံ အွန်လိုင်းစာပို့ ငွေညှစ်တောင်းခံခြင်း၊ ဓားပြတိုက်မှုနှင့် လူပြန်ပေးဆွဲမှုများကို ခပ်စိပ်စိပ် လုပ်ဆောင်လာခြင်း ကြောင့် လုံခြုံမှု မရှိသည့် နယ်စပ်မြို့ ဖြစ်သည်။