သျှမ်းပြည်တောင်ပိုင်း၊ တောင်ကြီးမြို့ပေါ်တွင် တွဲကားများကို ဖြတ်သန်းခွင့်ပြုထားပြီး မြို့ခံများက ယာဉ်အသံများကြောင့် စိုးရိမ်ထိတ်လန့်မှုများ ကြုံတွေ့နေရကြောင်း စုံစမ်းသိရသည်။

တောင်ကြီးမြို့ရှောင်လမ်းတွင် လမ်းကျဉ်းခြင်း၊ မတ်စောက်ကာ လမ်းအကွေ့အကောက် များခြင်းနှင့် လမ်းချော်ခြင်းတို့ကြောင့် အဆိုပါ မြို့ရှောင်လမ်းကို အသုံးမပြုခိုင်းတော့ဘဲ သက်ဆိုင်ရာ အာဏာပိုင်များမှ ယမန်နေ့ မေလ (၅)ရက်နေ့မှ စ၍ တွဲကားများကို အနောက်မြို့ပတ်လမ်း မှတစ်ဆင့် ယာယီပြန်လည် ဖြတ်သန်းခွင့်ပြုခဲ့ကြောင်း မြို့ခံများက ပြောသည်။

တောင်ကြီးမြို့ရှိ အနောက်မြို့ပတ်လမ်းတွင် ကုန်ကားကြီးများဖြင့် လမ်းအပြည့် နေရာယူ မောင်းနှင်နေကြပြီး ကားဟွန်းတီးသံနှင့် ကားကြီးအသံများကြောင့် ကလေးငယ်များနှင့် အသက်ကြီးရွယ်အိုများ အပါအဝင် စိုးရိမ်ထိတ်လန့်နေကြပြီး ယာဉ်အန္တရာယ်များအတွက်ပါ စိုးရိမ်မှုရှိနေကြသည်ဟု အသက် (၃၀)ဝန်းကျင် တောင်ကြီးမြို့ခံ အမျိုးသားတစ်ဦးက ပြောသည်။

“မနေ့ညတုန်းက အနောက်မြို့ပတ်လမ်းမှာ မုန့်သွားစားတာ၊ ဆိုင်ထဲတောင် ငလျင်လှုပ်တာလား ထင်ရတယ် လန့်ပါလန့်တယ်။ ကုန်ကားတွေ အရမ်းများတယ်၊ ကားကြီးတွေက ယာဉ်ငယ်တွေကို အရမ်းကျော်တက်တာ။ ကားဟွန်းတီးသံတွေကြောင့် အဲဒီဆိုင်ထဲက ကလေးငယ်လေးဆို အရမ်းလန့်နေရှာတာ။ အသက်ကြီး နှလုံးရောဂါရှိသူဆို မလွယ်ဘူး”ဟု အဆိုပါ အမျိုးသားက သျှမ်းသံတော်ဆင့်ကို ပြောသည်။

ထို့အပြင် အနောက်မြို့ပတ်လမ်းတွင် ကျောက်မီးသွေးကား၊ ဘိလပ်မြေတင်ကားနှင့် ကုန်စိမ်းကားများ ဖြတ်သန်းကြပြီး အခြားသော ကုန်ကြမ်းပစ္စည်းကားများလည်း ဖြတ်သန်းသွားလာနေကြသည်ဟု ၎င်းက ဆက်ပြောသည်။

ဆက်လက်ပြီး ကုန်တင်ကားသမားများကို စည်းကမ်းရှိစွာ မောင်းနှင်စေချင်ကြောင်းနှင့် ကားသမားများသည် အသက်နှင့်ရင်း၍ ကုန်ကားမောင်းနေရပြီး အများပြည်သူလူထုနှင့် သဟဇာတဖြစ်အောင် မောင်းနှင်စေလိုသည်ဟု ကားသမားတစ်ဦးက ပြောသည်။

“မြို့ခံပြည်သူကိုလည်း ကိုယ်ချင်းစာပါတယ်၊ ကျနော်တို့ ကားသမားတိုင်းတော့ မဆိုလိုဘူး။ တချို့သော ကားသမားတွေက အရမ်းဆိုးတယ်။ ကားဟွန်းကို အသားကုန် တီးတာ၊ ပြီးရင် ရှေ့ကို ကျော်တက်ကြတာ။ လူထုတွေကိုလည်း စာနာစေချင်တယ်၊ ကျနော်တို့ကလည်း မြို့ရှောင်လမ်းက အရမ်းအန္တရာယ်များတော့ အခုလို မြို့ပေါ်ကနေပြီး ဖြတ်သန်းရတာပါ” ဟု ကားသမား တစ်ဦးက ပြောသည်။

တောင်ကြီးမြို့ရှောင်လမ်းသည် ညောင်ရွှေမြို့မှ ညိုမီးရွာအနီးသို့ လမ်းပြန်ပေါက်ကာ တောင်ကြီးနှင့် အေးသာယာကို ရှောင်ကွင်းသွားလာနိုင်သော လမ်းဖြစ်သည်။

မိုင်းပွန်-တောင်ကြီး လမ်းပိုင်းတွင်လည်း စစ်ကောင်စီဂိတ်များက ကုန်ကားများကို အစစ်အဆေး တင်းကြပ်ထားပြီး ကားတစ်စီးလျှင် ငွေကျပ်(၄သောင်း)မှ (ငါးသောင်း) အထိတောင်းခံပြီးမှ ဖြတ်သန်းခွင့်ပြုသည်ဟု ခရီးသွားများထံမှ သိရသည်။