သျှမ်းပြည် ညောင်ရွှေမြို့နယ်တွင် စစ်ကောင်စီက လေကြောင်း၊ ဒရုန်း နှင့် လက်နက်ကြီးများဖြင့် ကျေးရွာအတွင်းသို့ ပစ်ခတ်မှုများ ပြုလုပ်နေကြောင်း သတင်းရရှိသည်။
ယနေ့ (မေလ ၅ ရက်) မနက် ၁၁ နာရီဝန်းကျင်တွင် ညောင်ရွှေမြို့နယ် ရေပူ (ထီခိုး) ရွာကို စစ်ကောင်စီက ပေါင်း ၅၀၀ ဗုံး ၄ လုံးဖြင့် လေကြောင်း ဗုံးကြဲတိုက်ခိုက်ခဲ့ကြောင်း သတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“ဒီနေ့ (မေလ ၅ ရက်) နေ့လည်လောက်မှာ စစ်ကောင်စီက လေကြောင်းနဲ့ ဗုံးလာကြဲသွား ပါတယ်။ပေါင် ၅၀၀ ဗုံးကို ၄ လုံးကြဲသွားတာပါ။ လူထိခိုက်မှုမရှိပါဘူး။ နေအိမ်ထိခိုက်မှုကတော့ စစ်ရေးမြေပြင်အခြေနေအရ မဖော်ပြနိုင်သေးပါဘူး။ဗုံးကြဲပြီးနောက် စစ်ရေးတင်းမာမှုတော့ ရှိနေပါတယ်။” ဟု ၎င်းကပြောသည်။
ထိုစစ်ကောင်စီမှ ရေပူ (ထီခိုး) ရွာကို ဗုံးကြဲတိုက်ခိုက်ခဲ့ခြင်းကြောင်း အနီးနားရှိ ကျေးရွားများထိ အသံများကြားနေရပြီး၊ ယခု မေလ ပထမပတ်အတွင်း စစ်ကောင်စီမှ စစ်အင်းအားဖြည့်နေခြင်းကြောင့် ကျေးရွာအတွင်းကို လက်နက်ကြီးလေးကြောင်းများရမ်းတမ်းပစ်ခတ်နေကြောင်း စံကားဒေသခံ အမျိုးသမီးတစ်ဦးက ထပ်မံလောင်းပြောသည်။
“ဒီမနက် ၁၁ နာရီဝန်းကျင်ကလည်း ဗုံးအသံကတော့ အကျယ်ကြီး။ပြီးခဲ့တဲ့ ၃ ရက်ကစပြီး လက်နက်ကြီးတွေ ဗုံးသံတွေကြားနေရတာ။ကျမတို့ရွာနဲ့လည်း မဝေးဘူးတော့ ကြားနေရတာ။ ပြီးခဲ့တဲ့ မေလ ၃ ရက်လောက်က စစ်ကားတွေ ၁၈ စီးလောက်ရှိမယ် လမ်းမကြီးပေါ်ဖြတ်သွားတာ” ဟု ၎င်းကပြောသည်။
ညောင်ရွှေမြို့နယ် မှ ဖယ်ခုံမြို့ လမ်းတကြောတွင် စစ်ကောင်စီ နှင့် လက်အောက်ခံ ပအိုဝ်းပြည်သူ့စစ် PNO တို့သည် ယခုရက်တပတ်အတွင်း လေကြောင်း ၊ ဒရုန်း နှင့် လက်နက်ကြီးများအသုံးပြု ပစ်ခတ်နေပြီး တော်လှန်ရေးတပ်ဖွဲ့များ နှင့် စစ်ရေးတင်းမာမှုများရှိနေကြောင်း သိရသည်။
အလားတူ ပြီးခဲ့သည့် မေလ ၂ ရက်တွင်လည်း စစ်ကောင်စီ နှင့် လက်အောက်ခံ ပအိုဝ်းပြည်သူ့စစ် PNO တို့သည် ဖယ်ခုံအင်းအရှေ့ဘက်ကမ်းရှိ နမ့်တုတ်ကျေးရွာ၊ကုန်းသာ (ခ) မဆုန့်ခွမ်ကျေးရွာ ကို လက်နက်ကြီးများဖြင့် ပစ်ခတ်ခဲ့ပြီး နေအိမ်များပျက်စီးခဲ့ကြောင်း သိရသည်။
Leave a Comments