တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်နယ်မြေထဲသို့ လူသုံးကုန်နှင့် ဆေးဝါးများ သယ်ယူပို့ဆောင်နိုင်ရေးအတွက် ဖြတ်သန်းသွားလာခွင့်ပြုရန် စစ်ကောင်စီနှင့် ‌တွေ့ဆုံစဉ် ဆွေးနွေးခဲ့ကြောင်း စုံစမ်းသိရသည်။

ယနေ့ (မေလ ၄ ရက်) နံနက်ပိုင်းတွင် အွန်လိုင်းမှတဆင့် ပြုလုပ်ခဲ့သည့် PSLF/TNLA ၏ ပထမအကြိမ် သတင်းစာရှင်းလင်းပွဲ၌ ဧပြီလ ၂၈-၂၉ ရက်တို့တွင် တရုတ်ကြားဝင်စီစဉ်မှုဖြင့် TNLA နှင့် စစ်ကောင်စီတို့ ကူမင်းမြို့၌ တွေ့ဆုံဆွေးနွေးခဲ့ကြစဉ် နှစ်ဘက်စလုံး၏ တောင်းဆိုချက်များကို TNLA ပြောရေးဆိုခွင့်ရှိသူ လွေးယေဦးက ရှင်းလင်းတင်ပြခဲ့သည်။

TNLA ဘက်မှ နှစ်ဘက်တပ်အနေဖြင့် ရောက်ရှိသည့်နေရာတွင် ရပ်တန့်ပြီး အပစ်အခတ် ရပ်စဲရန်၊ စစ်ရေးလှုပ်ရှားမှုများတွင် ထိုးစစ်ပြုလုပ်ခြင်း မပြုရန်၊ နှစ်ဘက်ထိန်းချုပ် နယ်မြေဒေသများတွင် ဒေသခံပြည်သူများ၏ စားဝတ်နေရေးနှင့် ဆေးဝါးများ သယ်ယူပို့ဆောင်နိုင်ရေးအတွက် ဖြတ်သန်းသွားလာခွင့်ပြုရန် အပါအဝင် အချက်(၃) ချက်တို့ကို စစ်ကောင်စီနှင့် ဆွေးနွေးခဲ့ကြောင်း သိရသည်။

“ပိတ်ဆို့မှု ၂ ခု ကြားထဲက လူထုတွေတော့ တော်တော်လေး ခက်ခဲမှု ရှိနေတယ်။ ဒါကို နည်းလမ်းပေါင်းစုံ သုံးပြီးမှ ကျော်လွှားနိုင်ဖို့ ကျနော်တို့ ကြိုးစားနေပါတယ်။ စားစရာတွေ၊ ဆေးဝါးတွေ၊ လူသုံးကုန်တွေရဖို့ ကျနော်တို့လည်း အတော်လေးကို ခက်ခက်ခဲခဲနဲ့ ကြိုးပမ်းနေရပါတယ်”ဟု TNLA တွဲဖက်အထွေထွေအတွင်းရေးမှူး(၂) ဖြစ်သူ ဗိုလ်မှူးကြီး တားပန်လ က သတင်းစာရှင်းလင်းပွဲတွင် ပြောကြားခဲ့သည်။

ဧပြီလ ၂၈-၂၉ ရက်တို့တွင် တရုတ်နိုင်ငံ၏ ကြားဝင်စီစဉ်မှုဖြင့် TNLA မှ ဒုတိယဗိုလ်ချုပ်ကြီး တားဂျုတ်ဂျား ဦးဆောင်သည့် ကိုယ်စားလှယ်အဖွဲ့နှင့် စစ်ကောင်စီဘက်မှ ဒုတိယဗိုလ်ချုပ်ကြီး ကိုကိုဦး ဦးဆောင်သည့် အဖွဲ့တို့ ကူမင်းမြို့၌ (၇) ကြိမ်မြောက် တွေ့ဆုံဆွေးနွေးခဲ့ကြသည်။

သို့သော် စစ်ကောင်စီ ကိုယ်စားလှယ်များဘက်မှ TNLA ထိန်းချုပ်ထားသည့် နောင်ချို၊ ကျောက်မဲ၊ သီပေါ၊ မိုးကုတ်နှင့် မိုးမိတ် စသည့် ဒေသများကို လက်လွတ်ပြီး ပလောင်ကိုယ်ပိုင်အုပ်ချုပ်ခွင့်ရဒေသ ဖြစ်သည့် နမ့်ဆန်နှင့် မန်တုံမြို့နယ်အထိ TNLA တပ်ဆုတ်ခွာပေးရန် တောင်းဆိုမှုကို TNLA ဘက်မှ သဘောမတူနိုင်ခဲ့ကြောင်း မေလ (၁) ရက်တွင် ထုတ်ပြန်ထားသည်။

၎င်းနောက် စစ်ကောင်စီဘက်မှ TNLA ထိန်းချုပ်ထားသည့် မိုးကုတ်နှင့် နောင်ချိုမြို့နယ်များသို့ လေကြောင်းဗုံးကြဲ တိုက်ခိုက်မှုများ ဆက်တိုက်လှုပ်ဆောင်လာပြီး လက်နက်ကြီးပစ်ခတ်ခြင်း၊ ဒရုန်းဖြင့် ဗုံးကြဲတိုက်ခိုက်ခြင်းကဲ့သို့ စစ်ရေးတိုးမြှင့် လှုပ်ရှားလာကြောင်း TNLA ဘက်မှ ပြောသည်။

“စစ်ကောင်စီက လေကြောင်း ဖိအားပေးမှုတွေ ပိုမိုလုပ်လာပါတယ်။ အများဆုံးဆို နောင်ချို၊ မိုးကုတ်က ရင်ဆိုင်နေရပါတယ်။ စစ်ကောင်စီဘက်က စစ်ရေး တိုးမြှင့်လှုပ်ရှားတာမျိုး၊ လက်နက်ကြီးတွေ ပိုမိုပစ်ခတ်တာမျိုး လုပ်နေတာ တွေ့ရပါတယ်။ ဘယ်လိုပြန်ပြီး တုံ့ပြန်ဖို့ရှိလဲဆိုတော့ လတ်တလောမှာ စစ်ကောင်စီရဲ့ စစ်ရေးလှုပ်ရှားမှုကို ဆက်လက်ပြီး စောင့်ကြည့်နေတယ်”ဟု TNLA ပြောရေးဆိုခွင့်ရှိသူ လွေးယေဦးက သတင်းစာရှင်းလင်းပွဲတွင် ပြောဆိုသည်။

လက်ရှိတွင် ငလျင်ဒဏ်ခံရသည့် ဒေသများတွင် ကယ်ဆယ်ရေး ဆက်လက်လုပ်ဆောင်နိုင်ရန် ညီနောင်မဟာမိတ်များဘက်မှ မေလ (၁) ရက်မှ (၃၁) ရက်နေ့အထိ တစ်လတာ ထပ်မံအပစ်ရပ်ထားခြင်းကြောင့် TNLA အနေဖြင့် ထိုးစစ်ဆင် တိုက်ခိုက်ခြင်း လုပ်မှာမဟုတ်သလို မိမိကိုယ်မိမိ ခုခံ ကာကွယ်ပိုင်ခွင့်ကို ဆောင်ရွက်မည်ဖြစ်ကြောင်း လွေးယေဦးက ဆက်ပြောသည်။

အလားတူ စစ်ကောင်စီနှင့် TNLA တွေ့ဆုံနိုင်ရန် တရုတ်အစိုးရမှ စီမံဆောင်ရွက်ပေးပြီး ရလဒ်ကောင်းထွက်ရန် တရုတ်အစိုးရ၏ ပါဝင်ကူညီမှုမှာ အရမ်းအရေးကြီးကြောင်း TNLA ဘက်မှ ပြောဆိုသည်။

အခြားတစ်ဘက်တွင် ကိုးကန့်တပ်ဖွဲ့ MNDAA မှ လားရှိုးမြို့ကို စစ်ကောင်စီထံ ပြန်လွှဲအပ်သလို TNLA ထိန်းချုပ်နယ်မြေများတွင် ထိုကဲ့သို့ မဖြစ်လာနိုင်ရန်အတွက် ပြည်သူလူထုအပါအဝင် မဟာမိတ်တပ်ဖွဲ့များအားလုံး ပူးပေါင်းဆောင်ရွက်ရန် လိုအပ်ကြောင်း TNLA တွဲဖက်အထွေထွေအတွင်းရေးမှူး(၂) ဖြစ်သူ ဗိုလ်မှူးကြီး တားပန်လ က သတင်းစာရှင်းလင်းပွဲတွင် ပြောဆိုသည်။

“၁၀၂၇ စစ်ဆင်ရေး” ဒုတိယပိုင်း ပြန်လည်စတင်ခဲ့သည့် ယမန်နှစ် ၂၀၂၄ ဇွန်လနောက်ဆုံးပတ်မှ စတင်၍ TNLA နှင့် MNDAA ထိန်းချုပ်ထားနိုင်ခဲ့သည့် မြန်မာ-တရုတ် နယ်စပ်ဂိတ်များကို တရုတ်ဘက်မှ ဖြတ် (၅) ဖြတ် လုပ်ဆောင်ကာ ပိတ်ပင်ခဲ့သလို စစ်ကောင်စီဘက်မှလည်း ညီနောင်မဟာမိတ် ထိန်းချုပ်နယ်မြေများသို့ ကုန်စည်စီးဆင်းမှုကို ပိတ်ဆို့ခဲ့သည်။

ဇန်နဝါရီလ တတိယပတ်တွင် စစ်ကောင်စီနှင့် ကိုးကန့်တပ်ဖွဲ့တို့ တရားဝင် အပစ်အခတ်ရပ်စဲရေး သဘောတူနိုင်ခဲ့ပြီးနောက် MNDAA ထိန်းချုပ်နယ်မြေရှိ နယ်စပ်ဂိတ်များကို တရုတ်ဘက်မှ အားလုံးနီးပါး ပြန်ဖွင့်ပေးခဲ့သော်လည်း TNLA ထိန်းချုပ်ထားသည့် နမ့်ခမ်းမြို့နယ်ရှိ နောင်တောင်း-ပိန်းမိုင် ကုန်အဝင်အထွက် သီးသန့်ဂိတ်ကို ပြန်လည်ဖွင့်လှစ်ပေးခြင်း မရှိသေးကြောင်း သိရသည်။