သျှမ်းပြည်တောင်ပိုင်း၊ ရွာငံမြို့နယ် အရှေ့ဘက် ကျေးရွာများကို စစ်ကောင်စီမှ စစ်ကြောင်းထိုးနေပြီး၊ အရပ်သားနေအိမ်တွင် တပ်စွဲကာ၊ ပိုက်ဆံတောင်းပြီး နေအိမ်ရှိ စားနပ်ရိက္ခာများလည်း ယူစားနေကြောင်း စုံစမ်းသိရသည်။

ပြီးခဲ့သည့် ဧပြီလ (၂၄)ရက်နေ့မှ၍ ယနေ့ (ဧပြီ ၃၀)ရက်ထိ ရွာငံမြို့နယ် အရှေ့ဘက်ကျေးရွာများကို စစ်ကောင်စီမှ စစ်ကြောင်းထိုးနေပြီး အရပ်သား နေအိမ်များထဲတပ်စွဲနေထိုင်ခြင်း၊ စားနပ်ရိက္ခာများကို ယူစားခြင်းအပြင် ခြံထဲမွေးထားသည့်ကြက်များကို ဖမ်းဆီး စားသုံးမှု ပြုလုပ်နေကြောင်း ဒေသခံများက သျှမ်းသံတော်ဆင့်ကိုပြောသည်။

“သူတို့စစ်ကြောင်းက ခဏခဏလာတယ်။ သုံးဖွဲ့လောက်လာတယ်။တစ်ဖွဲ့ကို အင်အား(၆၀)လောက်ပါတယ်။ နေအိမ်ထဲဝင်နေတယ်။ ဘုန်းကြီးကျောင်းမှာလည်း ဝင်နေတယ်။ နောက် တစ်အိမ်ကို ကျပ်ငွေ ငါးသောင်း၊ ကြက် (၈)ကောင်ပေးရတယ်” ဟု ရွာငံ ဒေသခံ သတင်းရင်းမြစ် တစ်ဉီးက သျှမ်းသံတော်ဆင့်ကိုပြောသည်။

ထို့အပြင် စစ်ကောင်စီတပ်သားများသည် ကျေးရွာဒေသခံများကို လမ်းပြအဖြစ် ခေါ်ဆောင်ခြင်း၊ ရိုက်နှက်ခြင်းများ ပြုလုပ်ပြီး ဒေသခံများ၏ ဖုန်းများကိုလည်း သိမ်းဆည်း သွားကြောင်း ၎င်းက ထပ်လောင်းပြောသည်။

ဆက်လက်ပြီး စစ်ကောင်စီတပ်သားများသည် ကျေးရွာအနီးရှိ တောတောင်ထဲသို့ စစ်ကြောင်းထိုးချိန်တွင်လည်း လမ်းတွင် တွေ့သမျှအရပ်သားများကို ခေါ်ဆောင်သွားခြင်း၊ လက်ကို ခေါင်းပေါ်တင်ပြီး ပြစ်မှုရှိသည့်အတိုင်း ငုတ်တုတ်ထိုင်ခိုင်းခြင်းများပြုလုပ်လေ့ရှိကြောင်း ရွာငံဒေသခံ အမျိုးသမီး တစ်ဉီးက သျှမ်းသံတော်ဆင့်ကိုပြောသည်။

“ သူတို့ တောထဲ စစ်ကြောင်းထိုးချိန် လမ်းမှာတွေ့ရင်လည်း လမ်းပြခေါ်သွားတာ အချို့ကျတော့ လက်ကိုခေါင်းပေါ်တင်ပြီး ငုတ်တုတ်ထိုင်ခိုင်းတာ။ ကျမတို့ ခြံတောင်မသွားရဲဘူး။ ငတ်ရင်လည်း ငတ်ပါစေ ဆိုပြီး အလုပ်မသွားဘဲနေနေရတယ်” ဟု ၎င်းအမျိုးသမီးက ဆိုသည်။

စစ်ကောင်စီစစ်ကြောင်းသည် ရွာငံမြို့နယ် အရှေ့ဘက်ကျေးရွာများကို စစ်ကြောင်းကို မကြာခဏထိုးသည့် အတွက် တိုက်ပွဲဖြစ်ပွားမည်ကို စိုးရိမ်နေကြောင်း ဒေသခံများကပြောသည်။

ပြီးခဲ့သည့် ဧပြီလ (၁၂)ရက်နေ့တွင်လည်း ရွာငံမြို့နယ် ပါယ်ကင်းရွာမှ ပျူစောထီး (၃)ဦးနှင့် ကလေးတစ်ဦးကို အသတ်ခံရပြီးနောက်ပိုင်း စစ်ကောင်စီမှ ရွာငံမြို့နယ် ကျေးရွာများသို့ မကြာခဏစစ်ကြောင်းထိုးနေပြီး အနီးနားတောတောင်ထဲသို့ သေနတ်ရမ်းသမ်း ပစ်ခတ်ခြင်း၊ လက်နက်ကြီးဖြင့် ပစ်ခြင်းများ ပြုလုပ်နေသည်ဟု သိရသည်။

ရွာငံမြို့နယ်သည် ယခင်က အေးချမ်းသည့် ဒေသဖြစ်သော်လည်း ယခုတွင် စစ်ကောင်စီတပ်သားများက နယ်မြေစိုးမိုးထားပြီး စစ်ကြောင်းထိုး၊ ကျေးရွာမီးရှို့ခြင်းများ ပြုလုပ်နေလျှက်ရှိသည်။