သျှမ်းပြည်တဝှမ်း လေပြင်းတိုက်ခတ်မှုကြောင့် ပြည်သူနေအိမ်နှင့် ဘုန်းကြီးကျောင်းများ ထိခိုက်ပျက်စီးခဲ့ကြောင်း စုံစမ်းသိရသည်။
ယမန်နေ့ (ဧပြီလ ၂၇ ရက်) ည ၇ နာရီခန့်တွင် တာချီလိတ်မြို့နယ် တာလေမြို့နယ်ခွဲရှိ မိုင်းလင်းကျေးရွာအုပ်စု၌ လေပြင်းတိုက်ခတ်ခဲ့ရာ ဝမ်ဟကျေးရွာ ဘုန်းကြီးကျောင်း၏ ခေါင်မိုးများ ထိခိုက်ပျက်စီးခဲ့ပြီး ပြန်လည်ပြုပြင်ရန် လိုအပ်နေကြောင်း ဒေသခံများထံမှ သိရသည်။
“မိုင်းလင်းဘက် ဝမ်ဟ ဘုန်းကြီးကျောင်းမှာ ဖြစ်သွားတာ၊ လေဆင်နှာမောင်းလို့ ပြောရမလား။ ကျောင်းပေါ်က ထီးတော်ကနေစပြီး သွပ်မိုးတွေ လန်သွားပြီး ပြုတ်ကျလာတယ်။ လေတိုက်တာ ပြင်းတော့ ပြတင်းတံခါးလည်း မှန်တွေ ကွဲကုန်တယ်။ အကုန်လုံး အသစ်ပြန်ပြင်ရမယ်၊ လက်သမားတွေ လာတွက်ပေးတာ ဘတ် (၆) သိန်းလောက် ကုန်မယ်ပြောတယ်”ဟု ဝမ်ဟ ဘုန်းကြီးကျောင်းမှ ခူးဝါးနွဲ့ ဆရာတော်က သျှမ်းသံတော်ဆင့်ကို မိန့်ကြားသည်။
အလားတူ လားရှိုးမြို့နယ် မိုင်းယော်တိုက်နယ်တွင်လည်း လေပြင်းတိုက်ခတ်မှုကြောင့် ပြည်သူနေအိမ် (၁၀) လုံးကျော် ထိခိုက်ပျက်စီးပြီး လူထိခိုက်မှု မရှိသော်လည်း နေအိမ်ပြိုကျမှုကြောင့် ကျွဲနွားများ သေဆုံးခဲ့ကြောင်း ဒေသခံများထံမှ သိရသည်။
ထို့အပြင် ကလောမြို့နယ် အောင်ပန်းမြို့အနီးတွင်လည်း မိုးရွာသွန်းမှုနှင့် လေပြင်းတိုက်ခတ်မှုတို့ကြောင့် နေအိမ်ခေါင်မိုးလန်ကာ ခရမ်းချဉ်နှင့် မုန်လာစိုက်ခင်းများလည်း ဧကများစွာ ပျက်စီးဆုံးရှုံးခဲ့ရကြောင်း ဒေသခံများက လူမှုကွန်ယက်တွင် မျှဝေထားသည်။
ဧပြီလ ၂၈ ရက်မှ မေလ ၃ ရက်နေ့အတွင်း အချိန်အခါမဟုတ်ဘဲ မိုးရွာသွန်းနိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနမှ ယမန်နေ့ (ဧပြီလ ၂၇ ရက်) တွင် သတင်းထုတ်ပြန်ထားသည်။
သျှမ်းပြည်တွင် နေရာကျဲကျဲမှ နေရာစိပ်စိပ် မိုးထစ်ချုန်း ရွာပြီး အချို့ဒေသများတွင် နေရာကွက်၍ မိုးကြီးနိုင်ကြောင်း သိရပြီး အချိန်အခါမဟုတ် မိုးရွာခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းရွာခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်းနှင့် မြေပြိုခြင်းများ ဖြစ်နိုင်ကြောင်း ကြိုတင်သတိပေးထားသည်။
Leave a Comments