ထိုင်းနိုင်ငံတွင် ကျောင်းသားဗီဇာ ဖြင့် တရားမဝင် အလုပ်လုပ်ကိုင်နေမှုကိုတားဆီးရန် ခွင့်ပြုသည့်သက်တမ်းကို ထိုင်းနိုင်ငံ အဆင့်မြင့် ပညာရေး၊ သိပ္ပံ၊ သုတေသန နှင့် တီထွင်ဆန်းသစ်မှု ဝန်ကြီးဌာနနှင့်လူဝင်မှုကြီးကြပ်ရေး ဝန်ကြီးဌာန တို့ပူးပေါင်း ကာ ပြန်လည်စိစစ်သွားမည်ဟု သတင်းရရှိသည်။
ထိုင်းနိုင်ငံ၏ ဥပဒအရ နိုင်ငံတကာကျောင်းသားများ၏ ဗီဇာများကို တစ်ကြိမ်လျှင်ရက် (၉၀)နှင့် တစ်နှစ်ထက် မပိုသော ကာလထိ နေထိုင်ခွင့်ပြုထားပြီး ထိုဗီဇာဖြင့် တရားမဝင်အလုပ်လုပ်ကိုင် နေမှုများ စုံစမ်းတွေ့ရှိမှု ကြောင့် ခွင့်ပြုထားသော အချိန်ကာလ နှင့် အကြောင်းအရာပေါ်မူတည်ပြီး ပြန်လည်ပြင်ဆင် သတ်မှတ် သွားမည်ဟု ထိုင်းအာဏာပိုင်များက မီဒီယာများအား ပြီးခဲ့သည့် ဗုဒ္ဓဟူးနေ့က ပြောကြားသည်။
ခွင့်ပြုကာလပြန်လည်သတ်မှတ်မည့်ကိစ္စနှင့်ပတ်သက်ပြီး အမှန်တကယ်ကျောင်းတက်နေသည့် ကျောင်းသား များအတွက် ဝန်ထုပ်ဝန်ပိုး တစ်ခုဖြစ်လာနိုင်ကြောင်းကို ရာ့ချဖတ်တက္ကသိုလ် လူမှုရေးသိပ္ပံဌာနမှ ဒေါက်တာ ဆုထိရာ ခနားထမ် က သျှမ်းသံတော်ဆင့်သို့ပြောသည်။
“အမှန်တကယ် ကျောင်းတက်နေတဲ့ ကျောင်းသားတွေရဲ့ နေ့စဉ်လူနေထိုင်မှုဘဝကို အနှောက်ယှက်ဖြစ်လာနိုင် မှာပဲ၊ ဥပမာ ခနခန သက်တမ်းလိုက်တိုး နေမယ့်ကိစ္စလိုမျိုးပေါ့၊ ကျမတို့ နယ်ပယ်မှာတော့ Politic of Daily Life လို့ခေါ်တယ်၊ ကြောက်စိတ်ပေါ့၊ ကိုယ်မမှားရင်တောင် လဝကနဲ့ တခြားရုံးလိုမျိုး ခနခနသွား ရင်ကြောက် စိတ်က မသိမသာ ဖြစ်နေတတ်တယ်” ဟု ၎င်းကပြောသည်။
ထို့အတူ ထိုင်းနိုင်ငံရှိ တက္ကသိုလ်တစ်ချို့တွင် တရားမဝင်အလုပ်လုပ်ကိုင်နေသည့် ကိစ္စနှင့် ပတ်သက်ပြီး တင်းတင်းကြပ်ကြပ် သတိပေးထားတာမျိုးရှိပြီး ယခုလို ဥပဒကို ပြန်လည်စိစစ် တာက ကောင်းသည့်လုပ်ရပ် ဖြစ်ပြီး ဗီဇာ နှင့်လုပ်စားနေသည့်ကျောင်းတွေကို ပညာပေးလိုက်တာဖြစ်ကြောင်း မယ့်ဖလုံတက္ကသိုလ်တွင် တက်ရောက် သင်ကြား နေသည့် လူငယ်တစ်ဦးက ဆိုသည်။
“ဒီကိစ္စနဲ့ ပတ်သက်ပြီး … ကျောင်းကလဲ တရားမဝင်အလုပ်တွေ မလုပ်ဖို့ကို ခဏခဏ ပြောတယ်။ တခုခုဆိုသူတို့က လိုက်ရှင်းပေးနေရလို့ … မှန်မှန်ကန်ကန်လုပ်ရင်တော့ ကျောင်းသားတွေပေါ် Impact သိပ်မရှိနိုင်လောက်ဘူး၊ ကျောင်းမှာတော့ ဖြေရှင်းဖို့ဌာန(International Affair) တစ်ချို့ရှိတယ်လေ ၊ ပြီးတော့ Student Status ရှိနေသ၍ ကြောက်စရာမလိုဘူး၊ ဗီဇာရောင်းစား နေတဲ့ကျောင်း တွေနဲ့ အကျင့်ပျက်ဝန်ထမ်းကို ကောင်းကောင်းနှိပ်ကွပ်လိုက်တာပဲ၊ ကျောင်းသားဗီဇာက ကျောင်းသားအတွက်ပဲ ရှိသင့်တာ’’ ဟု ၎င်းလူငယ်ကပြောသည်။
ဗီဇာကိစ္စ ပြန်လည်စိစစ်ပြီး ပြင်ဆင်သတ်မှတ်မှုကို ထိုင်းနိုင်ငံအဆင့်မြင့်ပညာ၊ သိပ္ပံ၊ သုတေသနနှင့်တီထွင် ဆန်းသစ်မှု ဝန်ကြီးဌာနနှင့် လူဝင်ကြီးကြပ်ရေးဝန်ကြီးဌာနတို့ ပူးပေါင်းကာ ဥပဒေမူဘောင်တစ်ရပ် သတ်မှတ်ရန် အတွက် နားလည်မှုစာချွန်လွှာ (MoU) ကို မကြာမီ လက်မှတ်ရေးထိုးပြီး စိစစ်သွားဖို့ရှိကြောင်းသိရသည်။
မတ်လ ၂၈ ရက် ငလျင်ကြောင့် ပြိုကျသွားသော ဘန်ကောက်ရှိ အဆောက်အုံ၏ တာဝန်ရှိသူကို စုံစမ်း ဖော်ထုတ်ရာတွင် ကျောင်းသားဗီဇာဖြင့် တရားမဝင်လုပ်ကိုင်နေသော တရုတ်လူမျိုး အင်ဂျင်နီယာ ကိုတွေ့ရှိသဖြင့် ယခုကဲ့သို့ ပြန်လည်စိစစ်တာ ဖြစ်ကြောင်းစုံစမ်းသိရှိရသည်။
အလုပ်သင် သတင်းထောက် စိုင်းဟန်မော(ဝ်) ရေးသားသည်။
Leave a Comments