သျှမ်းပြည်မြောက်ပိုင်း လားရှိုးမြို့ပေါ်တွင် စစ်ကောင်စီ၏ အုပ်ချုပ်ရေး ယန္တရားများ ပြန်လည်ဝင်ရောက် လာပြီးနောက် သူခိုး၊ ဓားပြများ ပြန် သောင်းကျန်းလာကြောင်း ဒေသခံများထံမှ သိရသည်။
တရုတ်အကူညီဖြင့် ဧပြီလ ၂၂ ရက်နေ့မှစတင်ပြီး လားရှိုးမြို့တွင် စစ်ကောင်စီဘက်မှ လက်နက်အပြည့်အစုံ တပ်ဆင်ကာ စစ်ကားရာနှင့်ချီ ယာဉ်တန်းများ ဝင်ရောက်လာခဲ့ခြင်း ဖြစ်သည်။
“အခုစစ်သားတွေက ဘာမှအလုပ်မလုပ်သေးဘူး။ တပ်တွေ၊ နေရာတွေပဲ ရှင်းနေတုန်း။ သူခိုး၊ ဓားပြတွေကလည်း တောင်းကျန်းနေတယ်။ လမ်းပေါ်မှာ လိုက်လုနေတာ၊ အဓိကတော့ လူပျက်တဲ့နေရာတွေမှာပေါ့” ဟု လားရှိုးမြို့ဒေသခံတစ်ဦးက သျှမ်းသံတော်ဆင့်ကို ပြောသည်။
လက်ရှိ လားရှိုးမြို့ပေါ်တွင် အုပ်ချုပ်ရေးယန္တရားခွဲဝေမှု တိတိကျကျမသိရှိရဘဲ ကြားကာလအုပ်ချုပ်ရေး ဖြစ်နေသည့်အတွက် သူခိုး၊ ဓားပြများကလည်း အခွင့်အရေးကိုယူကာ သောင်းကျန်းနေကြောင်း ၎င်းက ဆိုသည်။
စစ်ကောင်စီတပ်သည် လားရှိုးမြို့ပေါ် ရှိ ရပ်ကွက် ၁၂ ကို အုပ်စိုးစေပြီး ကိုးကန့်တပ် MNDAA သည် ကျေးရွာ ၄၅၀ ကို အုပ်စိုးစေကြောင်း တရုတ်ကကြားဝင်စေ့စပ်ပေးခဲ့သည်ဟု ကောလာဟလသတင်းများလည်း ထွက်ပေါ်နေသည်။
သို့သော် ထိုသတင်းနှင့်ပတ်သက်၍ မည်မျှမှန်ကန်ကြောင်း သျှမ်းသံတော်ဆင့်မှ သီခြားအတည်ပြု၍ မရသေးပေ။
ပြီးခဲ့သည့် ဧပြီလ ၂၃ ရက်တွင်လည်း လားရှိုးမြို့ ပါရမီလမ်းသွယ် ထင်းရှုးမြိုင်သို့သွားသော လမ်းခုလတ် တစ်နေရာ၌ အမျိုးသမီးတစ်ဦး ဖုန်းလုခံရပြီး ဓားခုတ်ခံခဲ့ရသေးကြောင်း သိရသည်။
အဆိုပါ အမျိုးသမီးတစ်ဦးသည် စာသင်ပြီး ပြန်လာသည့်အချိန်တွင် လုယက်ခံရပြီး၊ အမျိုးသားနှစ်ဦးက ၎င်း၏လည်ပင်းကို ဓားကို လှီရန် ဟန်ပြင်နေသည့်အချိန်တွင် ၎င်းအမျိုးသမီး က လက်ဖြင့် ကားလိုက်သဖြင့် ဒဏ်ရာရရှိခဲ့ကြောင်း လားရှိုးမြို့ခံတစ်ဦးက ပြောသည်။
“အခုနိုင်ငံကြီးက ဘာဖြစ်လာမယ်မသိဘူး။ အပြင်သွားရင် တစ်ယောက်တည်း မသွားဖို့လိုတယ်။ အကယ်လို့ အပြင်သွားမယ်ဆိုရင် တန်းဖိုးကြီးပစ္စည်းတွေ လုံခြုံတဲ့နေရာမှာထားဖို့ ပြောချင်တယ်။ လမ်းသွားလမ်း လာရင်လည်း ဖုန်းကြီးဘဲမကြည့်ပါနဲ့။ ဆိုင်ကယ်တစ်စီးတည်း နှစ်ယောက်၊ သုံးယောက်လောက်ထပ်ပြီး စီးလာရင်လည်း ဝေးဝေးရှောင်ပါ။ ဘာလို့ဆိုရင် ဒီမှာဘယ်သူမှလုံခြုံရေး ဝာာဝန်ယူပေးတာမရှိဘူး” ဟု လားရှိုးမြို့ခံတစ်ဦးက ပြောသည်။
လားရှိုးမြို့ပေါ်မှ ကိုးကန့်တပ် MNDAA တပ်ဆုတ်ခွာရပြီး တရုတ်အကူအညီဖြင့် စစ်ကောင်စီတပ် ပြန်လည်ခြေချခွင့် ရရှိခဲ့သော်လည်း နှစ်ဘက်စလုံးမှ တရားဝင် ထုတ်ဖော်ပြောကြားခြင်း မရှိသေးဘဲ တရုတ်နိုင်ငံခြားရေးဝန်ကြီးဌာန တစ်ခုသာ ထုတ်ဖော်ပြောကြားနေခြင်း ဖြစ်သည်။
Leave a Comments