ယနေ့ ( ဧပြီလ ၂၄) ရက်တွင် ကျရောက်သော ရှမ်းပြည်တပ်မတော် SSA ထူထောင်ခြင်း (၆၁) နှစ်ပြည့် အခမ်းအနားကို SSPP ဌာနချုပ် ဝမ်ဟိုင်းဒေသ နှင့် တရုတ်-မြန်မာ နယ်စပ် ထုန့်မော(ဝ်) ဒေသတွင် ကျင်းပကြောင်း စုံစမ်း သိရသည်။

ရှမ်းပြည်တပ်မတော် ၏ ၆၁ နှစ်ပြည့် တည်ထောင်ခြင်းအခမ်းနားကို ရှမ်းပြည်တိုးတက်ရေးပါတီ၊ ရှမ်းပြည်တပ်မတော် ဌာနချုပ် ရှိရာ သျှမ်းပြည်တောင်ပိုင်း ကျေးသီး မြို့နယ် ဝမ့်ဟိုင်းဒေသနှင့် တပ်မ ၉၈၉ ရှိရာ ထုန့်မော(ဝ်) ဒေသ မူဆယ်မြို့နယ် တာစန့်ရွာတွင် ကျင်းပပြီး အရပ်ဖက် အဖွဲ့အစည်း၊နိုင်ငံရေးပါတီ၊ သံဃာတော်များနှင့် ပြည်သူလူထု ထောင်ချီတက်ရောက်ကြောင်း သိရသည်။

ဌာနချုပ်တွင် ကွန်မန်ဒို နှင့် တပ်သားစစ်သည်တော်များက စစ်ရေးပြသပြီး SSPP/SSA နာယက ဗိုလ်ချုပ်ကြီး ဆေထဲန် က အဖွင့်မှာစကား မိန့်ခွန်းပြောကြားသည်။

ထို့နောက် SSPP/SSA ဥက္ကဌ ဗိုလ်ချုပ်ကြီး ပန်ဖ၊ ရှမ်းတိုင်းရင်းသားများဒီမိုကရေစီ အဖွဲ့ချုပ် (SNLD) နှင့် ပအိုဝ်းအမျိုးသားလွတ်မြောက်ရေးတပ်မတော် (PNLO/PNLA) မှပေးပို့သော သ၀ဏ်လွှာ များကိုဖတ်ကြားခဲ့သည်။

SSPP ဌာနချုပ် ရှိအခမ်းအနားသို့ SSPP/SSA နာယက ဗိုလ်ချုပ်ကြီး ဆေထဲန်၊ ဗိုလ်ချုပ်ကြီး လွယ်မော(ဝ်) အစရှိသည့် ထိပ်ပိုင်းခေါင်းဆောင်များနှင့် ဒေသခံ စုစုပေါင်း ၆၅၀၀ ကျော် တက်ရောက်ခဲ့သည်။

ထို့အတူ ထုန့်မော(ဝ်) ဒေသတွင် ကျင်းပသော အခမ်းအနားတွင် အချင်းချင်းစည်းလုံးညီညွှတ်ကြရန် တိုက်တွန်းခဲ့ ကြောင်းသိရသည်။

“ခုချိန်ကစ ကျနော်တို့ ဘယ်လို အားထုတ်ရှေ့ဆက်ရမလဲဆိုတာ သမိုင်းက ကျနော်တို့ကို သင်ခန်းစာပေးနေပြီ၊ တိုင်းပြည်မှာလဲ အစိတ်စိတ်အမွှာမွှာ၊ နိုင်ငံရေးပါတီတွေလဲ တစ်ကွဲတစ်ပြားစီ၊ ကျနော်တို့ သျှမ်းတပ်တွေလဲ တစ်ကွဲ တစ်ပြားစီ၊ ဒီချွတ်ယွင်းချက်ကို ကျနော်တို့ လက်ထက်မှာ မပြုပြင်ပြောင်းလဲရင် လူမျိုးခြားအာဏာရှင်အောက်မှာပဲ ပျောက်ကွယ်သွားမယ်၊ အာ့ကြောင့် ပြည်သူအချင်းချင်း စစ်တပ်အချင်းချင်း စည်းလုံးညီညွှတ်ကြဖို့တိုက်တွန် နှိုးဆော်ပါတယ်’’ ဟု ၎င်းအခမ်းအနားတွင် SSPP မှ ဗိုလ်မှူးကြီး ဟန်ခမ်းက ပြောကြားသွားသည်။

SSA နှစ်ပတ်လည်နှင့် ပတ်သက်၍ ပြည်သူကို ပြန်ကြည့်ပြီး ကာကွယ်စောင့်ရှောက်ပေး စေလိုကြောင်း နမ့်ခမ်းဒေသခံ လူငယ်တစ်ဦးက သျှမ်းသံတော်ဆင့် သို့ပြောသည်။

“ကျနော်သျှမ်းပြည်ထဲက စစ်တပ်တွေ ကိုယ့်စီးပွားရေးနဲ့ ကိုယ်ကျိုးအတွက်ပဲ လုပ်နေကြတာခုက၊ ပြည်သူကို ပြန်လှည့်ကြည့်ပြီး စောင့်ရှောက်ပေးတဲ့ စစ်တပ် ဖြစ်စေချင်တာပေါ့” ဟု နမ့်ခမ်း လူငယ်က ဆိုသည်။

ထိုအခမ်းအနားတွင် SSPP /SSA ဒုဥက္ကဌ ဒုတိယ ဗိုလ်ချုပ်ကြီး စဝ်ခွန်ဆိုင် တက်ရောက်ပြီး ထုန့်မော(ဝ်) ဒေသရှမ်းစာပေနှင့်ယဉ်ကျေးမှုအသင်းများ၊ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD)၊ ရှမ်းတိုင်းရင်းသားများ ဒီမိုကရက်တစ်ပါတီ(SNDP)၊ သံဃာတော်နှင့် ဒေသခံများ စုစုပေါင်း ၁၇၀၀ ကျော်တက် ရောက်ကြောင်းစုံစမ်းသိရသည်။

ရှမ်းပြည်တပ်မတော် SSA ကို ၁၉၆၄ ခုနှစ်တွင် မြန်မာနိုင်ငံပထမဆုံး သမ္မတ ၏ ကတော် မဟာဒေဝီ စဝ်နန်းဟိန်းခမ်း က ဉီးဆောင်ဖွဲ့စည်းသည်။

ထို့နောက်ပိုင်း နိုင်ငံရေးဉီးဆောင်ပါတီအဖြစ် ရှမ်းပြည်တိုးတက်ရေးပါတီကို SSPP တိုးချဲ့ဖွဲ့စည်းသည်။

လက်ရှိမှာမူ ဝ တပ်ဖွဲ့ဉီးဆောင်ထားသည့် မြောက်ပိုင်း ၇ ဖွဲ့ မဟာမိတ် FPNCC တွင်ပါဝင်ထားပြီး ရှမ်းတိုင်းရင်းသားများဒီမိုကရေစီအဖွဲ့ချုပ် SNLD နှင့် အတူ ရှမ်းပြည်ပူးပေါင်းဆောင်ရွက်ရေးကော်မတီ SSJAC တွင်လည်းပါဝင်သည်။

အလုပ်သင် သတင်းထောက် စိုင်းဟန်မော(ဝ်) ရေးသားသည်။