မြေငလျင်ကြီးတစ်ခု ဧပြီလ ၂၁ ရက်တွင် လှုပ်ခတ်မည်ဟု Tiktok အကောင့်မှတစ်ဆင့် မဟုတ်မမှန် သတင်းအမှား ဖြန့်ဝေခဲ့သည့် John(Palmistry) အကောင့်ပိုင်ရှင် ဂျွန်မိုးသဲအား ဖမ်းဆီးရမိကြောင်း စစ်ကောင်စီက သတင်းထုတ်ပြန်သည်။

ဧပြီလ ၂၂ ရက်တွင် စစ်ကောင်စီတပ်ဖွဲ့ဝင်များမှ မုံရွာမြို့ မြဝတီရပ်ကွက်၊ တိုးချဲ့ကွက်သစ်ရပ်၊ နယ်မြေ (၁၂) ရွှေညောင်ပင်လမ်းရှိနေအိမ်သို့ သွားရောက်ရှာဖွေခဲ့ရာ တရားခံ John(Palmistry) အကောင့်ပိုင်ရှင် ဂျွန်မိုးသဲအား ဖမ်းဆီးရမိခဲ့ကြောင်း သိရသည်။

၎င်းသည် ၂၀၂၁ ခုနှစ် ဖေဖော်ဝါရီလ ၁ ရက်နောက်ပိုင်း မုံရွာမြို့ပေါ်၌ ပြုလုပ်သည့် ဆန္ဒပြပွဲများတွင် ၂၀ ကြိမ်ခန့် လိုက်ပါဆောင်ရွက်ခဲ့သဖြင့် မုံရွာနယ်မြေရဲစခန်းမှ ရာဇသတ်ကြီး ဥပဒေပုဒ်မ ၅၀၅-ကဖြင့် အမှုဖွင့်အရေးယူခဲ့ကြောင်း စစ်ကောင်စီ၏ ထုတ်ပြန်ချက်၌ ဖော်ပြသည်။

သို့သော် အသက်မပြည့်သူ ကလေးသူငယ်ဖြစ်သဖြင့် မိဘအုပ်ထိန်းမှုအောက်တွင် ကောင်းမွန်စွာနေထိုင်ရန် မုံရွာခရိုင်တရားရုံးမှ အမိန့်ချမှတ်ခြင်း ခံခဲ့ရသူဖြစ်ကြောင်း ဆိုသည်။

ထို့အပြင် ၂၀၂၁ ခုနှစ် မေလ ၂၈ ရက်တွင် ကော့ကရိတ်မြို့မှတစ်ဆင့် ကရင်အမျိုးသား ကာကွယ်ရေးအဖွဲ့ KNDO တပ်ရင်း (၆)သို့ သွားရောက်ခဲ့ပြီး သင်တန်းသား ၇၅ ဦးနှင့်အတူ သင်တန်းတက်ရောက်ခဲ့ကြောင်း၊ ထို့နောက် အဖွဲ့အစည်းအတွက် အွန်လိုင်းမှတစ်ဆင့် အလှူငွေများကောက်ခံ ထောက်ပံ့ပေးခဲ့ကြောင်း ထုတ်ပြန်ချက်၌ ဖော်ပြသည်။

ထို့နောက် ၂၀၂၁ ခုနှစ် စက်တင်ဘာလ တတိယပတ်ခန့်တွင် မုံရွာမြို့သို့ ပြန်လည်ရောက်ရှိနေထိုင်စဉ် အောက်တိုဘာလ ၃၀ ရက်တွင် ဖမ်းဆီးခဲ့ကြောင်း၊ နိုဝင်ဘာလ ၁၄ ရက်တွင် မုံရွာမြို့ အမှတ် (၁) ရဲစခန်း၌ အကြမ်းဖက်မှု တိုက်ဖျက်ရေးဥပဒေ ပုဒ်မ-၅၀ (က)/ ၅၂ (က)ဖြင့် အမှုဖွင့်လှစ်ခဲ့ပြီး မုံရွာခရိုင်တရားရုံးမှ ၂၀၂၂ ခုနှစ် အောက်တိုဘာလတွင် ထောင်ဒဏ် ၂ နှစ်ပြစ်ဒဏ်ချမှတ်ခဲ့ကြောင်း သိရသည်။

ထောင်ဒဏ် ၂ နှစ်ပြစ်ဒဏ်ချမှတ်ခဲ့သည့်အတွက် မန္တလေးမြို့ရှိ လူငယ်ထိန်းသိမ်းရေး သင်တန်းကျောင်း၌ ထိန်းသိမ်းခဲ့ပြီး ၂၀၂၃ ခုနှစ် ဇွန်လတွင် ပြန်လည်လွတ်မြောက်လာခဲ့ကြောင်း သိရသည်။

ဂျွန်မိုးသဲအနေဖြင့် ထောင်မှလွတ်မြောက်ပြီးနောက် ဗေဒင်လက္ခဏာပညာအား အသုံးချ၍ ပြည်သူလူထု ထင်ယောင်ထင်မှား ဖြစ်စေရန် ရည်ရွက်ချက်ဖြင့် ၂၀၂၄ ခုနှစ် ဖေဖော်ဝါရီလတွင် Johmoe5.t အမည်ဖြင့် Tiktok အကောင့်ဖွင့်လှစ်ကာ အကြမ်းဖက်အဖွဲ့အစည်းများနှင့် ပတ်သက်သည့် Post များ၊ မြေငလျင်နှင့် ပတ်သက်သည့် Post များ၊ အများပြည်သူအထိတ်တလန့်ဖြစ်စေရန် ရည်ရွက်ချက်ဖြင့် မဟုတ်မမှန် ရေးသားဖော်ပြခဲ့ကြောင့် ဥပဒေအရ ထိထိရောက်ရောက် အရေးယူသွားမည်ဖြစ်ကြောင်း ထုတ်ပြန်ချက်၌ ဖော်ပြသည်။

ထို့အပြင် မဟုတ်မမှန် သတင်းအမှားများ ရေးသားဖြန့်ဝေသူများကိုလည်း စိစစ်ဖော်ထုတ်၍ ထိထိရောက်ရောက် အရေးယူသွားမည်ဖြစ်ကြောင်း စစ်ကောင်စီက အသိပေးထားသည်။