သျှမ်းပြည် လားရှိုးမြို့ရှိ ဆင်နှစ်ကောင်ဟိုတယ်တွင် ကိုးကန့်တပ်ဖွဲ့ MNDAA၊ စစ်ကောင်စီနှင့် တရုတ်ကိုယ်စားလှယ်တို့ ထပ်မံတွေ့ဆုံ ဆွေးနွေးနေကြောင်း စုံစမ်းသိရှိရသည်။

ယနေ့ (ဧပြီ ၂၁ ရက်)တွင် လားရှိုးမြို့ ဆင်နှစ်ကောင်ဟိုတယ်တွင် ကိုးကန့်တပ်ဖွဲ့ MNDAA လားရှိုးမြို့မှ ထွက်ခွာသွားရန်နှင့် စစ်ကောင်စီအတွက် နေရာပြန်လည်ချမှတ်ရေးအတွက် ထပ်မံတွေ့ဆုံဆွေးနွေးခဲ့ကြောင်း လားရှိုးမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

“ဒီနေ့တော့ တရုတ်၊ ကိုးကန့်၊ စစ်ကောင်စီတို့ ၃ ဖွဲ့လုံးတွေ့ကြတာ။ ၃ ဖွဲ့လုံးတွေ့ကြမှပဲ နိုင်ငံရေး အဖြေထွက်မယ်လေ။ ကျနော်တို့အထင်ကတော့ သူတို့ ၃ ဖွဲ့စလုံး အဆင်ပြေမယ်လို့ ယုံကြည်တယ်။ အပေးအယူကလည်း ရသင့်သလောက် ရထားကြပြီလေ။ ပြောရရင် ဒီနေ့ကတော့ အချောသပ် ဆွေးနွေးတာပဲ ဖြစ်မှာပေါ့။ အကြမ်းထည်ကတော့ သူတို့ တရုတ်နိုင်ငံထဲမှာ ဆွေးနွေးပြီးပြီဆိုတော့ ဒီနေ့တော့ အလွတ်သဘော အချောသပ်ကြတာပေါ့” ဟု လားရှိုးမြို့ဒေသခံ အမျိုးသားတစ်ဦးက ပြောသည်။

လက်ရှိ စစ်ကောင်စီနှင့် ကိုးကန့်တပ်ဖွဲ့တို့ ပြေလည်သွားကြသော်လည်း တိုက်ပွဲအတွင်း ပျက်စီးသွားခဲ့သည့် ပြည်သူနေအိမ်၊ အဆောင်အအုံတွေအပေါ် တာဝန်ယူမှု တာဝန်ခံမှု ရှိခိုင်းစေလိုကြောင်းနှင့် ပြည်သူနစ်နာမှုအတွက်ပါ ထည့်တွေးစေချင်ကြောင်း ဒေသခံအမျိုးသမီးတစ်ဦးက တောင်းဆိုလိုက်သည်။

“တာဝန်ယူမှု တာဝန်ခံမှု ရှိရင်တော့ သိပ်ကောင်းတာပေါ့။ တချိန်တုန်းကတော့ သူတို့တွေ ရန်ဖြစ်တယ်။ အိုးအိမ်တွေ ဖြိုခွဲကြတယ်။ အခုတော့ ပြန်ပြေလည်သွားကြတယ်။ ကျမတို့ ပြောချင်တာတော့ တစ်ခြားဟာတွေပဲ ဆွေးနွေးမနေနဲ့။ ကျမတို့ ပြည်သူတွေအပေါ် ပျက်စီးသွားတဲ့ အိမ်တွေကို ဘယ်လိုပြန်ဖြည့်ဆည်းပေးမလဲ ဆိုတာလည်း ထည့်စဉ်းစားခိုင်းစေချင်တယ်”ဟု ဒေသခံအမျိုးသမီးတစ်ဦးက ပြောသည်။

အလားတူ ယနေ့ ကိုးကန့်တပ်ဖွဲ့၊ တရုတ်ကိုယ်စားလှယ်နှင့် စစ်ကောင်စီတို့ တွေ့ဆုံမှုတွင် လားရှိုးမြို့အတွင်း အထင်ကရနေရာတွင် စိုက်ထူထားသော ကိုးကန့်တပ်ဖွဲ့ MNDAA အလံကိုလည်း ရုတ်သိမ်းသွားခဲ့ကြောင်း သိရသည်။

၎င်းအလံကို ရုတ်သိမ်းလိုက်သော်လည်း လက်ရှိအချိန်ထိ ကိုးကန့်တပ်ဖွဲ့သည် လားရှိုးမြို့အတွင်း လုံခြုံရေး စောင့်ကြည့်ပေးနေသေးကြောင်း၊ စစ်ကောင်စီဘက်မှ တပ်အင်အား ဝင်ရောက်လာခြင်း မရှိသေးကြောင်း အထက်ပါ အမျိုးသားက ဆက်ပြောသည်။

“ဒီနေ့ ထူးခြားတာတော့ လားရှိုးမြို့တွင်းက ကိုးကန့်အလံတွေ လွင့်ထားတဲ့နေရာတိုင်းက အလံတွေကို သိမ်းလိုက်ပြီ။ အခုထိတော့ ကိုးကန့်တပ်ဖွဲ့တချို့ကတော့ လားရှိုးမြို့ပေါ် ရှိသေးတယ်။ သူတို့တွေ့ဆုံ ဆွေးနွေးမှုကို လုံခြုံရေး ယူထားပေးတာလည်း ကိုးကန့်တပ်ပဲလေ။ စစ်ကောင်စီဘက်ကနေ တိုင်းမှူးတို့၊ ဆေးရုံအုပ်တို့ ၊ ရာထူးကြီးတဲ့သူတွေတော့ ရောက်နေပြီ။ စစ်အင်အား၊ စစ်သားတွေ လက်နက်ကိုင်ပြီးတော့ ဝင်လာတာတော့ မရှိသေးဘူး” ဟု ၎င်းက ဆက်ပြောသည်။

ဧပြီ ၁၉ ရက်တွင် လားရှိုးမြို့ပေါ်သို့ တရုတ်နိုင်ငံ အလံနှင့် “ပစ်ခတ်ရပ်စဲမှု စောင့်ကြည့်ရေးအဖွဲ့” ဟူ၍ တရုတ်နှင့် မြန်မာစာတန်းရေးထိုးထားသည့် ကားအစီးရေ (၃၀)ခန့် ယာဉ်တန်းဖြင့် စတင်ဝင်ရောက်လာပြီး၊ လားရှိုးမြို့ကို တရုတ်အထူးကိုယ်စားလှယ် မစ္စတာ တိန့်ရှီကျွင်း ကိုယ်တိုင် ရောက်ရှိလာခဲ့သည်။

“၁၀၂၇ စစ်ဆင်ရေး”သည် ၂၀၂၃ အောက်တိုဘာလမှ စတင်လာခဲ့ပြီး ၂၀၂၄ ဩဂုတ်လအတွင်း ကိုးကန့်တပ်ဖွဲ့က လားရှိုးမြို့ကို အလုံးစုံ သိမ်းပိုက်နိုင်ခဲ့သည်။

ထို့နောက် တရုတ်၏ ကြားဝင်စေ့စပ် ညှိနှိုင်းပေးမှုကြောင့် စစ်ကောင်စီနှင့် ကိုးကန့်တပ်ဖွဲ့တို့ တရုတ်နိုင်ငံ ကူမင်းမြို့တွင် ၇ ကြိမ်တွေ့ဆုံပြီးနောက် ၂၀၂၅ ဇန်နဝါရီလအတွင်းမှာ အပစ်အခတ် ရပ်စဲရေး ကြေညာနိုင်ခဲ့ပြီး ယခုဧပြီလအတွင်း ကိုးကန့်တပ်ဖွဲ့သည် လားရှိုးမြို့မှ တပ်ဆုတ်ပေးရန်အထိ ဖြစ်လာခဲ့သည်။