သျှမ်းပြည် လားရှိုးမြို့တွင် ကိုးကန့်တပ်ဖွဲ့ MNDAA မှ ရာဇဝတ်မှု ကျူးလွန်သူများကို အများပြည်သူရှေ့ သေဒဏ် ချမှတ်ပြီး ချက်ချင်းကွပ်မျက်ခဲ့ကြောင်း စုံစမ်းသိရသည်။

ယနေ့ (ဧပြီလ ၁၀ ရက်) နံနက်ပိုင်းတွင် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ် မန်ဆူကျောင်းတိုက်နှင့် အဝေရာလမ်းသွယ် အနီးတွင် MNDAA စစ်ရေးအုပ်ချုပ်မှုကော်မတီမှ ဖမ်းဆီးရမိထားသည့် ရာဇဝတ်မှု ကျူးလွန်သူ (၈) ဦးကို အများပြည်သူရှေ့ သေဒဏ်နှင့် တစ်သက်တစ်ကျွန်းထောင်ဒဏ် စီရင်ချမှတ်ခဲ့သည်။

၎င်းရာဇဝတ်မှု ကျူးလွန်သူ (၈) ဦးထဲမှ မုဒိမ်းမှုကျူးလွန်သူ တစ်ဦးကို တစ်သက်တစ်ကျွန်း ထောင်ဒဏ် ချမှတ်ပြီး လူသတ်မှု၊ ခိုးမှုနှင့် လုယက်မှု ကျူးလွန်သူ အမျိုးသား (၇) ဦးတို့ကို သေဒဏ်ချမှတ်ခဲ့ပြီးနောက် လားရှိုးလေဆိပ်ဘက်သို့ ခေါ်ဆောင်သွားကာ ချက်ချင်းကွပ်မျက်လိုက်ကြောင်း လားရှိုးဒေသခံများက ပြောသည်။

“မန်ဆူဘက် ကြားနာပွဲလုပ်တာ၊ အပြစ်သားလို့ ပြောတာ အားလုံးပေါင်း (၈) ယောက်။ တစ်ယောက်က ကိုယ့်သမီးအရင်းကို မုဒိမ်းကျင့်တာ၊ အဲ့တာက တစ်သက်တစ်ကျွန်း ထောင်ဒဏ်။ သေဒဏ်ပေးခံရတာ ၇ ယောက်၊ အကုန်လုံးက လူသတ်မှုနဲ့ ခိုးမှု ဓားပြမှု။ အရင်ရက်ကပဲ လူသတ်လို့ ဖမ်းထားတာ၊ မြို့ပေါ်လိုက်ပြပြီး လေယာဉ်ကွင်းဘက် ကိစ္စတုံး(သတ်)လိုက်တယ်”ဟု ကြားနာပွဲသို့ ကိုယ်တိုင်တက်ရောက်နားထောင်ခဲ့သူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

၎င်းရာဇဝတ်မှု ကျူးလွန်သူများကို အမှုကြားနာစဉ် မုဒိမ်းမှု၊ လူသတ်မှု၊ ခိုးမှုနှင့် လုယက်မှုတို့ကို ဖြစ်စဉ် (၁၀) ခုထက်မနည်း ကျူးလွန်ခဲ့ကြကြောင်း MNDAA အရာရှိများမှ ဖတ်ကြားခဲ့သည်ဟု ကိုယ်တိုင်တက်ရောက် နားထောင်ခဲ့သူများထံမှ သိရသည်။

သေဒဏ်ချမှတ်ခံရသူ (၇) ဦးထဲမှ (၅) ဦးကို လားရှိုးလေယာဉ်ကွင်းဘက်သို့ ခေါ်ဆောင်သွားပြီး အသင့်တူးဖော်ထားသည့် မြေကျင်းများရှေ့တွင် သေနတ်ပစ်ခတ်ကာ ချက်ချင်းကွပ်မျက်ခဲ့ကြောင်း ဒေသခံများက ပြောဆိုသည်။

လားရှိုးမြို့ကို ထိန်းချုပ်ထားသည့် MNDAA မှ ဧပြီလကုန်ပိုင်းတွင် စစ်ကောင်စီထံ ပြန်အပ်မည်ဟု သတင်းထွက်ပေါ်နေချိန် ယခုကဲ့သို့ ပထမဆုံး ပြစ်ဒဏ်စီရင်ခြင်း လုပ်ဆောင်လာသည့်အတွက် ဒေသခံများ ထိတ်လန့်နေရကြောင်း ဒေသခံများက ပြောဆိုသည်။

“အခုကျတော့လည်း လန့်စရာကြီးလေ။ သေဒဏ်ချပြီး ချက်ချင်း သတ်လိုက်တာဆိုတော့ အရင်က မကြားဖူးတဲ့ ကိုယ်တွေတောင် အံ့ဩတယ်။ ဒါက ဖြစ်သင့်လား မဖြစ်သင့်ဘူးလား ဆိုတာ ပြည်သူတွေ သဘောတူ လက်ခံထားတဲ့ ဥပဒေနဲ့ ဆုံးဖြတ်တာ မဟုတ်တော့ ပြောရခက်တယ်၊ ဥပဒေလို့ ပြောရင်တောင် တရားသော ဥပဒေမျိုး ဖြစ်ရမယ်”ဟု လားရှိုးမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နှစ် ၂၀၂၄ ဧပြီလနှင့် ဒီဇင်ဘာလတို့တွင်လည်း လောက်ကိုင်မြို့၌ ကိုးကန့်တပ်ဖွဲ့ MNDAA မှ ပြန်ပေးဆွဲမှု၊ ငွေညှစ်မှု၊ မုဒိမ်းမှုနှင့် လူသတ်မှု စသည့် ရာဇဝတ်မှု ကျူးလွန်သူများကို သေဒဏ် အပါအဝင် တစ်သက်တစ်ကျွန်းထောင်ဒဏ်များ လူစုလူဝေးရှေ့မှောက် နှစ်ကြိမ်တိုင်တိုင် စီရင်ချက် ချမှတ်ခဲ့သည်။

ထိုသို့ သေဒဏ်ချမှတ်ခဲ့စဉ်က ဥရောပသမဂ္ဂ EU မှ အပြင်းထန်ဆုံး ရှုတ်ချပြီး သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံးက ထုတ်ပြန်ခဲ့သည်။

၎င်းထုတ်ပြန်ချက်ထဲတွင် သေဒဏ်သည် လူမဆန်သည့် ယုတ်ညံ့သော ပြစ်ဒဏ်ဖြစ်ပြီး လူ့ဂုဏ်သိက္ခာကို အဆုံးစွန်သော ငြင်းပယ်မှုကို ကိုယ်စားပြုကြောင်း ဖော်ပြထားပြီး ဖက်ဒရယ် ဒီမိုကရေစီ ရရှိရေးအတွက် နိုင်ငံတကာ စံနှုန်းများနှင့်အညီ တရားဥပဒေ စိုးမိုးရေးကို ထိန်းသိမ်းရန်လည်း ကိုးကန့်တပ်ဖွဲ့ MNDAA ကို တိုက်တွန်းထားသည်။

လက်ရှိတွင် တရုတ်၏ ဖိအားပေးမှုကြောင့် လားရှိုးမြို့ပေါ်မှ ကိုးကန့်တပ်ဖွဲ့ MNDAA တပ်ဆုတ်ခွာရန် ပြင်ဆင်နေပြီး သင်္ကြန်အပြီး မြန်မာနှစ်ဆန်း (၁) ရက်နေ့ ဖြစ်သည့် ဧပြီလ (၁၇) ရက်အထိ အချိန်ပေးထားကြောင်း ဒေသခံများ ပြောဆိုနေကြသည်။

လာမည့် ဧပြီလ (၂၂) ရက်တွင် တရုတ်၏ စီစဉ်ပေးမှုဖြင့် စစ်ကောင်စီနှင့် ကိုးကန့်တပ်ဖွဲ့ MNDAA တို့သည် တရုတ်နိုင်ငံ ကူမင်းမြို့၌ ထပ်မံတွေ့ဆုံ ဆွေးနွေးကြမည်ဖြစ်ကြောင်း ဝါရင့် တော်လှန်ရေးရဲဘော် တစ်ဦးက သျှမ်းသံတော်ဆင့်သို့ ပြောဆိုထားသည်။