သျှမ်းပြည်တောင်ပိုင်း၊ တောင်ကြီးမြို့ သို့ စစ်ခေါင်းဆောင် မင်းအောင်လှိုင်လာမည်ဆိုသည့်သတင်းကြောင့် မြို့အဝင် အထွက် တွဲကားများကို ဖြတ်သန်းခွင့် ပိတ်လိုက်သည်ဟု စုံစမ်းသိရှိရသည်။

လာမည့် ဧပြီလ (၁၁)ရက်တွင် ရွှေဘုန်းပွင့်ဘုရားထီးတင်ပွဲပြုလုပ်မည်ဖြစ်ပြီး ထိုပွဲသို့ စစ်ခေါင်းဆောင် မင်းအောင်လှိုင်တက်ရောက်မည် ဖြစ်သောကြောင့် မြို့တွင်း အဝင်အထွက် ကားများကို စစ်ဆေးမှုတင်းကြပ်နေပြီး တွဲကားများကိုလည်း ဖြတ်သန်းခွင့် ပိတ်ပင်ထားသည်ဟု သိရသည်။

“ရွှေဘုန်းပွင့်ဘုရား ထီးတင်ရှိတော့ မင်းအောင်လှိုင်လာမယ်ဆိုလို့ ကားတွေပိတ်တာဖြစ်မယ်။ တောင်ကြီးမှာလည်း အခု အစစ်ဆေးအရမ်းကြမ်းနေတယ်။ ဘယ်လမ်းကြည့်ကြည့် ရဲတွေ စစ်သားတွေ မော်တော်ပီကယ်တွေနဲ့ပဲ။ စစ်ခေါင်းဆောင်လာမှာမို့ အကုန်ပိတ်ထားတာထင်တယ်။”ဟု မြို့ခံ အမျိုးသမီးတစ်ဦးက ပြောသည်။

ပြီးခဲ့သည့် ဧပြီလ (၉)ရက်မှ (၁၂)ရက်အထိ တောင်ကြီးသို့ အဝင်အထွက် ဖြတ်သန်းမည့် ဆယ်ဘီးကား ၊ဆယ့်နှစ်ဘီးကားများကို စစ်ကောင်စီမှ ဖြတ်သန်းခွင် မပြုတော့ကြောင်း ကားသမားများထံမှသိရသည်။

“တောင်ကြီးက အတက်အဆင်း ကားတွေကို ပိတ်ထားတယ်။သူတို့က ဆယ့်နှစ်ရက်အထိလို့ပြောတယ်။ ကြိုလည်း မပြောထားတော့ ကားတွေ အများကြီး ပိတ်မိနေတယ်။ အောက်ဘက် အညာဘက် ဆင်းမဲ့ကားတွေတော့ မြို့ရှောင်လမ်း တစ်လမ်းတော့ရှိတယ်။ တောင်ကြီး ထုံးဘိုဂိတ်လည်း ပိတ်ထားတယ်။” ဟု ကားသမားတစ်ဦးက သျှမ်းသံတော်ဆင့်ကို ပြောသည်။

ထိုကဲ့သို့ ပိတ်မိနေသည့်ကားများသည် အစီး (၅၀) ဝန်းကျင်ရှိပြီး ပြန်လှည့်သွားသည့် ကားများလည်းရှိပြီး ပြန်လှည့်လို့မရသည့် ကားများသည် ညအိပ်စောင့်နေကြရသည်ဟု ၎င်းကဆက်ပြောသည်။

စစ်ခေါင်းဆောင် မင်းအောင်လှိုင်တောင်ကြီး ရောက်နေသောကြောင့် မြို့ခံများအနေဖြင့် အသွားအလာ ဂရုစိုက်သင့်ကြောင်း မြို့ခံလူငယ်တစ်ဦးက အကြံပြုပြောထားသည်။

ပိတ်မိနေသည့် ကုန်ကားအများစုသည် ဘိလပ်မြေတင်ကား၊ ကျောက်မီးသွေးကားများနှင့် အခြားသောကုန်ကြမ်းပစ္စည်းတင်ဆောင်သည့် ကားများဖြစ်ကြောင်း သိရသည်။

အလားတူ နမ့်စန်၊ပင်လုံ၊ တာချီလိတ် ဘက်တွင်လည်း တောင်ကြီးဘက်သို့ တက်မည့် ကုန်ကားများကို ဖြတ်သန်းခွင့် ပိတ်ပင်ထားကြောင်းသိရသည်။