ကချင်လွတ်လပ်ရေးတပ်မတော် KIO/KIA နှင့် တအာင်း(ပလောင်) အမျိုးသားလွတ်မြောက်ရေးတပ်မတော် PSLF/TNLA နှစ်ဘက်တပ်ဖွဲ့ ဆွေးနွေးပွဲအတွက် ရှေ့ပြေးညှိနှိုင်းရေးများ စတင်နေပြီဖြစ်ကြောင်း ဒုဗိုလ်ချုပ်ကြီး ဂွမ်မော် က ပြောဆိုလိုက်သည်။

ယနေ့ (ဧပြီလ ၉ ရက်) နေ့စွဲဖြင့် ကချင်လွတ်လပ်ရေးကောင်စီ(KIC) ၏ ဒုတိယဥက္ကဋ္ဌဖြစ်သူ ဒုဗိုလ်ချုပ်ကြီး ဂွမ်မော်က ၎င်း၏ လူမှုကွန်ရက် စာမျက်နှာမှတဆင့် အသိပေးထုတ်ပြန်လာခဲ့ပြီး KIO နှင့် PSLF နှစ်ဖွဲ့ ဆွေးနွေးပွဲအတွက် ရှေ့ပြေးညှိနှိုင်းရေးများ စတင်နေပြီဖြစ်ကြောင်း၊ သက်ဆိုင်ရာ ဒေသတွင်းရှိ မိဘပြည်သူများ နားလည်ကူညီပေးကြရန် ရေးသားထားသည်။

အလားတူ အွန်လိုင်းသုံးစွဲသူများ၊ မီဒီယာများ၊ အကြံပေး ထောက်ပြလိုသူများထံမှလည်း အပြုသဘောဆောင်သော ကူညီပံ့ပိုးမှုများကို မျှော်လင့်ကြောင်း မေတ္တာရပ်ခံထားသည်။

“နှစ်ဖွဲ့ကြား လောလောဆယ်မှာ ဖြစ်နေတာက လူမျိုးရေးပြဿနာလည်း မဟုတ်ဘူး၊ ဒါနိုင်ငံရေးပြဿနာပေါ့လေ။ နိုင်ငံရေးအရ နိုင်ငံရေးနည်းလမ်းနဲ့ နယ်မြေပြဿနာ ဖြေရှင်းဖို့အတွက်ကိုလည်း စဉ်းစားနေတဲ့ အချိန်ကာလပေါ့လေ။ လူမျိုးရေး အသွင်ဆောင်တဲ့ အဖြစ်ကိုလည်း မလိုလားဘူး၊ အရင်ကတည်းက အတူနေလာတဲ့ လူမျိုးစုကြားမှာ ပြဿနာတွေ မဖြစ်စေချင်ဘူး”ဟု ကွတ်ခိုင်ဒေသခံ ကချင်လူငယ်တစ်ဦးက သျှမ်းသံတော်ဆင့်ကို ပြောသည်။

KIO/KIA နှင့် PSLF/TNLA နှစ်ဖွဲ့ဆွေးနွေးပွဲအတွက် ရှေ့ပြေးညှိနှိုင်းရေး စတင်နေပြီဖြစ်ကြောင်း KIA ဘက်မှ ဒုဗိုလ်ချုပ်ကြီးဂွမ်မော်က ပြောဆိုသော်လည်း နှစ်ဘက်ခေါင်းဆောင်များ မည်သည့်အချိန်၊ နေရာနှင့် မည်သည့် အကြောင်းအရာတို့ကို ဆွေးနွေးမည်ဖြစ်ကြောင်း ထုတ်ဖော်ပြောဆိုခြင်း မရှိသေးပေ။

ယခုကိစ္စနှင့် ပတ်သက်၍ TNLA ဘက်မှ သဘောထားကို သိရှိနိုင်ရန် သျှမ်းသံတော်ဆင့်မှ TNLA သတင်းနှင့် ပြန်ကြားရေးတာဝန်ခံ လွေးယေဦးထံသို့ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

ယခုနှစ် ၂၀၂၅ ဇန်နဝါရီလမှ စတင်ပြီး TNLA ထိန်းချုပ်ထားသည့် မန်တုံနှင့် ကွတ်ခိုင်မြို့နယ်များတွင် နယ်မြေစိုးမိုးရေးနှင့် ပတ်သက်၍ TNLA နှင့် KIA နှစ်ဘက်အောက်ခြေတပ်သားများ မကြာခဏ ထိတွေ့မှု ဖြစ်ကာ ခိုက်ရန်ဖြစ်ပွားခဲ့ကြသည်။

ထို့နောက် ဖေဖော်ဝါရီလ (၂၈) ရက်တွင် မန်တုံမြို့၌ ကျင်းပခဲ့သည့် လူထုတွေ့ဆုံပွဲသို့ TNLA စစ်ဦးစီးချုပ် ဗိုလ်ချုပ်တားဟိုပလန် သွားရောက်ကာ TNLA နှင့် KIA အကြား မြေပြင်ပွတ်တိုက်မှုများ၊ ပဋိပက္ခ တင်းမာမှုများ ဆက်လက်မကြီးထွားစေရန် ထိန်းထိန်းသိမ်းသိမ်း ဆောင်ရွက်သွားရမည်ဟု တိုက်တွန်းပြောဆိုခဲ့ကြောင်း TNLA သတင်းနှင့် ပြန်ကြားရေးဌာနမှ ပြီးခဲ့သည့် မတ် ၁ ရက် တွင် ထုတ်ပြန်ခဲ့သည်။

သို့သော် မတ်လ (၇) ရက်တွင် ကွတ်ခိုင်မြို့ပေါ် ဖွင့်လှစ်ထားသည့် KIA ဆက်ဆံရေးရုံးသို့ TNLA ဘက်မှ အင်အားအများအပြားဖြင့် ရောက်ရှိလာပြီး ဆက်ဆံရေးရုံးနှင့် နားနေဆောင်ရှိ နေရာ (၂) ခုမှ KIA တပ်သား (၄၀) ခန့်ကို ကားတင်ခေါ်ဆောင်ကာ နမ့်ဖတ်ကာဘက်သို့ ပို့ဆောင်လိုက်ရာမှ နှစ်ဘက်တပ်ဖွဲ့အကြား တင်းမာမှု အထွတ်အထိပ်သို့ ရောက်ရှိခဲ့သည်။

ထိုစဉ်က နှစ်ဘက်တပ်ဖွဲ့ကြား ဖြစ်ပွားနေသည့် နယ်မြေစိုးမိုးရေး ပြဿနာကို သျှမ်းပြည်မြောက်ပိုင်းရှိ လူထုနှင့် အစည်းအဝေး ပြုလုပ်ပြီး လူထုသဘောထား ရယူကာ ဆုံးဖြတ်ချက် ချနိုင်မည်ဟု ထင်မြင်ကြောင်း ဒုဗိုလ်ချုပ်ကြီး ဂွမ်မော်က ၎င်း၏ လူမှုကွန်ရက် စာမျက်နှာမှတဆင့် အသိပေးခဲ့သည်။