သျှမ်းပြည် တောင်ကြီးမြို့တွင် ငလျင်ဘေးဒဏ်သင့်သူများအတွက် လှူဒါန်းမည့်ဆန်များကို ဝိုင်းကူသယ်ရန် လိမ်ညာခေါ်ဆောင်သွားပြီး ဆိုင်ကယ်လုယူသွားကြောင်း သတင်းရရှိသည်။
ပြီးခဲ့သည့် ဧပြီ (၅)ရက်တွင် တောင်ကြီးမြို့ မီးပုံပျံကွင်းစျေးအနီးတွင် ဆိုင်ကယ်ဖြင့် စျေးသို့လာသည့် မြေးအဖွား(၂)ဦးကို အမည်မသိ အမျိုးသားတစ်ဉီးက ငလျင်ဘေးဒဏ်သင့်သူများအတွက် လှူဒါန်းမည့်ဆန်များကို ဝိုင်းသယ်ရန် အကူအညီတောင်းခံပြီး၊ ၎င်းမြေးအဖွား မောင်းလာသည့် ဆိုင်ကယ်ကို လုယူသွားကြောင်း မိသားစုဝင်တစ်ဉီးက သျှမ်းသံတော်ဆင့်ကို ပြောသည်။
“မြေးအဖွားနှစ်ယောက်က ဆိုင်ကယ်နဲ့ စျေးသွားတာ။ အဲ့မှာ အမျိုးသားတစ်ဉီးက လှူမယ့်ဆန် လာကူသယ်ပေးဦး ဆိုပြီး အကူအညီတောင်းတာ ကောင်လေးက ဆိုင်ကယ်နဲ့လိုက်သွားတယ်။ ပြီးတော့ ဆန်က အိတ်ကြီးတယ်၊ နင်ဆိုင်ကယ်မနိုင်ဘူး ငါမောင်းမယ်ဆိုပြီး လုယက်သွားတာပဲ” ဟု ဆိုင်ကယ်လုယက်ခံရသည့် မိသားစုဝင်တစ်ဉီးက ပြောသည်။
ဆိုင်ကယ်လုယက်ခံရသည့် အဆိုပါ မြေးအဖွားနှစ်ဦးမှာ မြေးဖြစ်သူသည် အသက် (၁၃) နှစ် အရွယ်သာ ရှိပြီး၊ အဖွားသည် အသက် (၇၀) အရွယ် ရှိပြီဖြစ်သည်။
ဆိုင်ကယ်လုယက်သွားသည့် အမည်မသိ အမျိုးသားသည် အသက် (၃၀) အရွယ်ခန့်ရှိပြီး၊ ထိုသူသည် မြေးအဖွားနှစ်ဉီးကို တို့ဆေးဖြင့် ပြုလုပ်ကာ လိမ်လည်သွားကြောင်း သိရသည်။
“သူတို့ မြေးအဖွား နှစ်ယောက်က တို့ဆေးမိတာ။ နှစ်ယောက်လုံး အိမ်ရောက်လာတော့ မူမမှန်ဘူး၊ နုံအအလို ဖြစ်နေတယ်”ဟု ၎င်းမိသားစုဝင်တစ်ဦးက ဆက်လက်ပြောဆိုသည်။
တောင်ကြီးမီးပုံးပျံကွင်း အနီးဝန်းကျင်တွင် လုယက်သူများ စုဝေးနေထိုင်တတ်ကြောင်း၊ အုပ်စုဖွဲ့ လုယက်နေကြောင်း၊ သက်ဆိုင်ရာများက သိရှိသော်လည်း ထိရောက်စွာ အရေးယူ ဆောင်ရွက်ပေးခြင်း မရှိကြောင်းလည်း တောင်ကြီးမြို့ခံ အမျိုးသမီးတစ်ဉီးက ပြောသည်။
“အခုက ယုံလွယ်လို့မရဘူး၊ မယုံလွယ်စေနဲ့။ လိမ်ညာတဲ့သူကလည်း မရှိတဲ့သူကို ပိုပြီးအခွင့်ကောင်းယူ လိမ်စားနေတာ။ စိတ်ရော လူရော မလုံခြုံတဲ့ခေတ်ကာလပါ”ဟု ၎င်းအမျိုးသမီးက ဆိုသည်။
တောင်ကြီးမြို့တွင် ခိုးဆိုးလုယက်မှုများ ပိုမိုများပြားလာပြီး လူဦးရေထူထပ်ကာ နေထိုင်စားသောက်ရေး ခက်ခဲလာသည်နှင့်အမျှ ခိုးဆိုးလုယက်မှုများ နေ့စဉ် မကြာခဏ ဖြစ်ပေါ်နေသည်။
ထို့အပြင် ငလျင်ဒဏ်ကြောင့် မြို့ခံများ စိတ်သောက ရောက်နေချိန် စစ်ကောင်စီမှ အမှတ်စဉ်(၁၂)အတွက် စစ်မှုထမ်းစာရင်း ကောက်ခံကာ မဲနှိုက်သွားရန် ဖိအားပေး လုပ်ဆောင်နေသည်ဟု မြို့ခံများထံမှ သိရသည်။
Leave a Comments