ပြင်းအား ၇.၇ စစ်ကိုင်းငလျင်ကြောင့် သျှမ်းပြည်တောင်ပိုင်း ပင်လောင်းမြို့နယ် အတွင်းက ကျေးရွာများ အိမ်ခြေ ရာဂဏန်း ထိခိုက်ပျက်စီးသွားသောကြောင့် ပြန်လည်ထူထောင်ပြီး ဒေသခံများနေရပ်ပြန်နေနိုင် ဖို့ရန်ခက်ခဲနေသည်ဟု ပင်လောင်းမြို့ခံများကပြောသည်။
သျှမ်းပြည်တောင်ပိုင်း တောင်ကြီးခရိုင် ပင်လောင်းမြို့ နယ် တောင်ထီဗွာကျေးရွာအုပ်စု နန်းပန်းရွာ အိမ်ခြေ ၁၀၀ ကျော် ၊ ပင်လောင်းကြီး ကျေးရွာအုပ်စု ပင်လောင်းကြီးရွာ အိမ်ခြေ ၂၀ ကျော်၊ မြောက်ထီဗွာ ကျေးရွာအုပ်စု ကောင်ထိုရွာ အိမ် ၄၀ ကျော် က စစ်ကိုင်းငလျင်ကြောင့် ထိခိုက်ပျက်စီးသွားပြီး ပြန်လည်ထူ ထောင်ရေးအတွက် အကူညီများလိုအပ်နေသည်ဟု ငလျင်ဒဏ်သင့်ပြည်သူများက ပြောသည်။
“ ပြန်လည်ထူထောင်ဖို့တော့အကူညီလိုတယ်၊ လုံးလုံးပြိုကျသွားတဲ့အိမ်ဆို ဝါးခုတ်ပြီးတဲထိုးနေရတယ်၊ ချက်ချင်း ပြန်လည်ထူထောင်ဖို့ ငွေရေးကြေးရေးအဆင်မပြေဘူး၊ သူတို့ရဲ့ ငရုတ်စိုက်ခင်း တချို့လဲပျက်စီး တော့ ဝင်ငွေမရှိဘူး” – ဟု အမည်မဖေါ်လိုသည့် ဒေသခံတစ်ဦးက ပြောသည်။
ပင်လောင်းမြို့နယ်ရှိ ဒေသခံပြည်သူများသည် လက်ဖက်၊ ငရုတ်၊ ပြောင်း စသည့်သီးနှံများအဓိထား စိုက်ပျိုးသည့် တောင်သူဉီးကြီးများဖြစ်ကြောင်း ငလျင်လှုပ်ခတ်မှုကြောင့် အခြေခံစားသောက် ကုန်များဖြစ်ဖြစ်သည့် ဆန်၊ ဆီ၊ ဆား နှင့် ဆေးဝါးများ ခက်ခဲလာနေကြောင်း ၎င်းကဆက်ပြောသည်။
“လောလောဆယ် တစ်ဖွဲ့ပဲလာလှူပေးတာ မိုးကာတွေ ဆန်၊ ဆီ၊ ဆားတွေတော့ပါလာတယ်၊ ဒါပေမယ့် အလွန်ဆုံး ၄ ရက် ၅ ရက်စာပဲခံမှာ၊ တခြားအဖွဲ့တွေလဲလာမယ်လို့ကြားတယ် ဒါမယ့်ရောက်မလာ သေးဘူး” ဟု ဒေသခံ ပြည်သူတစ်ဦးက ပြောပြသည်။
မတ်လ ၂၈ ရက်နေ့တွင် လှုပ်ခတ်ခဲ့သော ၇.၇ ရစ်ချ်တာစကေး ပြင်းအားရှိ စစ်ကိုင်းငလျင်ကြောင့် နေပြည်တော်၊ ပျဉ်းမနား၊ မန္တလေး၊ စစ်ကိုင်း တို့တွင် ပျက်စီးမှုများပြီး သေဆုံးသူများလည်း ထောင်ချီ ရှိသည်။
ထို့အတူ သျှမ်းပြည်တောင်ပိုင်းတွင်လည်း အဆောက်အဉီ အများအပြားထိခိုက်ပျက်စီးပြီး သေဆုံးသူများမှာမူ အောင်ပန်းမြို့တွင် သေဆုံးသူ ၁၅ ဉီး၊ ညောင်ရွှေ အင်းလေးဒေသတွင် ၁၃၅ ဉီး၊ ပင်လောင်းမြို့နယ် ၂ ဉီး သေဆုံးသွားသည်ဟု DVB Data Team အရ သိရပါသည်။
အလုပ်သင် သတင်းထောက် စိုင်းဟန်မောဝ် ရေးသားသည်။
Leave a Comments