မြန်မာနိုင်ငံတဝှမ်း ငလျင်ဘေးဒဏ်ကြောင့် ပူဆွေးဝမ်းနည်းနေချိန် တောင်ကြီးမြို့နှင့် ဟိုပုံးမြို့တွင် သင်္ကြန်ပွဲ ကျင်းပရန်အတွက် စစ်ကောင်စီမှ အလှူငွေ ကောက်ခံနေကြောင်း စုံစမ်းသိရသည်။

မတ်လ (၂၈)ရက် မွန်းလွဲပိုင်းတွင် မန္တလေးမြို့အနီး ဗဟိုပြုလှုပ်ခတ်ခဲ့သည့် ပြင်းအား ရစ်ချ်တာစကေး ၇ ဒဿမ ၇ အဆင့်ရှိ ငလျင်ဒဏ်ကြောင့် မြန်မာနိုင်ငံတဝှမ်း သေဆုံးသူ ၃၀၈၅ ဉီး ရှိနေချိန် စစ်ကောင်စီက သျှမ်းပြည်မြို့တော် တောင်ကြီးမြို့တွင် သင်္ကြန်ပွဲကျင်းပရန် ပြင်ဆင်နေသည်။

ဧပြီလ ပထမပတ်အတွင်း တောင်ကြီးမြို့ပေါ်ရှိ အလှူရှင်များထံ စာပို့၍ သင်္ကြန်ပွဲ၌ ယိမ်းအကများ၊ စတုဒီသာ ကျွေးမွေးမှုများနှင့် နေ့ညလုံခြုံရေး လုပ်ငန်းများအတွက် အလှူငွေများကို ကောက်ခံနေကြောင်း တောင်ကြီးမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သင်္ကြန်အတွက် အလှူခံဖို့ စာတွေပို့လာပါတယ်၊ သင်္ကြန်အတွက် ဆိုပြီး ပိုက်ဆံတောင်းတာပါ။ လမ်းလျှောက်သင်္ကြန်နဲ့ စတုဒီသာကျွေးဖို့ ဟိုတယ် ၁ လုံးကို ၁ သိန်းကျပ် အလှူငွေထည့် ပေးရမယ်တဲ့။ ရပ်ကွက်အတွင်း ဘာမှ လုပ်ပေးတာမျိုး မရှိဘူး၊ ငလျင်ဒဏ် ခံရတဲ့ တချို့အိမ်တွေကို ဘာမှ ကူညီတာလည်း မရှိဘူး။ အရက်မူးပြီး ပိုက်ဆံတောင်းဖို့ စိတ်ကူးပဲ ရှိကြတာ” ဟု တောင်ကြီးမြို့မှ ဒေသခံအမျိုးသမီးတစ်ဦးက ပြောသည်။

ထို့အပြင် မတ်လ ၂၈ ရက်တွင် လှုပ်ခတ်ခဲ့သည့် ငလျင်ကြောင့် တောင်ကြီးမြို့တွင်လည်း ပျက်စီးဆုံးရှုံးမှုများ ရှိခဲ့သကဲ့သို့ တောင်ကြီးမြို့နှင့် ၁၉ မိုင် ဝေးကွာသည့် ညောင်ရွှေမြို့နယ် အင်းလေးဒေသတွင် ငလျင်ဒဏ်ကြောင့် သေဆုံးသူ ၁၀၀ ကျော်ရှိပြီး နေအိမ်အများအပြား ပျက်စီးနေသည်။

“တောင်ကြီး ဘေးပတ်ပတ်လည် ငလျင်ဘေးသင့်နေချိန် တောင်ကြီးမှာ သင်္ကြန်လုပ်တာက မဖြစ်သင့်ဘူး။ အင်းလေးမှာဆိုရင် ပြန်လည်ထူထောင်ဖို့က အရမ်းလိုအပ်နေတာလေ။ အိမ်တွေပျက်စီး၊ လူတွေလည်း ညမအိပ်ရတဲ့ အနေအထားပဲ၊ ဒါကို စစ်ကောင်စီက ငလျင်ဘေးအတွက် ငွေမကောက်ဘဲ သင်္ကြန်အတွက် ငွေကောက်တာက အရမ်းရုပ်ဆိုးတယ်” ဟု တောင်ကြီးမြို့ ဒေသခံအမျိုးသမီးက ဆိုသည်။

အလားတူ သျှမ်းပြည် ဟိုပုံးမြို့တွင် ငလျင်ကြောင့် ပျက်စီးသွားသည့် သမိုင်းဝင် သီရိမင်္ဂလာ ရွှေချမ်းသာ ဟိုပုံးမွေတော် စေတီရှေ့တွင်လည်း စစ်ကောင်စီမှ ဗဟိုမဏ္ဍပ် ဆောက်၍ ပျော်ပွဲရွှင်ပွဲ ပြုလုပ်ရန် စီစဉ်နေကြောင်း ဟိုပုံးမြို့ ဒေသခံအမျိုးသားတစ်ဦးက ပြောဆိုသည်။

“ဟုတ်တယ် ဟိုပုံးမွေတော်ဘုရားက ငလျင်ကြောင့် ပျက်စီးနေတာကို အဲ့ရှေ့မှာပဲ ဗဟိုမဏ္ဍပ် ဆက်လုပ်နေတာ မဖျက်ဘူး။ ပြီးတော့ သင်္ကြန်မှာ ကပြဖျော်ဖြေဖို့ ရပ်ကွက်အလိုက်ကို ယိမ်းတွေ လေ့ကျင့် နေကြတာ။ နိုင်ငံမှာ ဒီလိုအရေးပေါ် အခြေအနေ ဖြစ်နေတာကို သူတို့တွေ ဒီလိုလုပ်နေတာကတော့ ခံစားလို့မရဘူး၊ မဖြစ်သင့်ဘူးပေါ့”ဟု ၎င်းဒေသခံက ပြောသည်။

မတ်လ ၂၈ ရက်တွင် လှုပ်ခတ်ခဲ့သည့် ငလျင်ကြောင့် ဟိုပုံးမြို့ရှိ သမိုင်းဝင် ဟိုပုံးမွေတော် (သီရိမင်္ဂလာ ရွှေချမ်းသာ) စေတီ၏ ထီးတော် မြေခပျက်စီးခဲ့ပြီး ပြန်လည်ပြုပြင်မှု ပြုလုပ်ရန်လည်း အလှူငွေ ကောက်ခံမှုများ ပြုလုပ်နေကြောင်းကို ၎င်းက ဆက်ပြောသည်။

သျှမ်းပြည်အတွင်း တိုင်းရင်းသားလက်နက်ကိုင်တပ်ဖွဲ့များဖြစ်သည့် UWSA၊ NDAA၊ MNDAA နှင့် TNLA တို့ ထိန်းချုပ်ထားသည့် နယ်မြေများတွင် ငလျင်ဘေးသင့်သူများကို စာနာသည့်အနေဖြင့် သင်္ကြန်ပွဲများ၊ ပျော်ပွဲရွှင်ပွဲများကို ဖျက်သိမ်းကြောင်း ကြေညာထားသည်။