အင်အားပြင်း ငလျင်လှုပ်ခတ်မှုကြောင့် ပြိုကျပျက်စီးသွားသော မန္တလေးမြို့ရှိ ဂရိတ်ဝေါဟိုတယ်အတွင်း မိတ်မိနေ သူများနှင့် သေဆုံးအလောင်းများအား ရှာဖွေကယ်ဆယ်ပေးရန် ကျန်ရစ်သူ မိသားစုဝင်များက တောင်းဆိုနေသည်။

မတ်လ ၂၈ ရက်နေ့က မန္တလေးမြို့အနီးကို ဗဟိုပြု၍ လှုပ်ခတ်ခဲ့သော ရစ်ချ်တာစကေး ၇ ဒဿမ ၇ အဆင့်ရှိ အလွန်ပြင်းထန်သည့် ငလျင်ကြောင့် ဂရိတ်ဝေါဟိုတယ် ပြိုကျပျက်စီးခဲ့ရာ ယခုဆိုလျှင် ၁ ပတ်ရှိသွားပြီ ဖြစ်သည်။

မတ်လ ၃၁ ရက် ညနေပိုင်းမှစတင်ကာ အဆိုပါဟိုတယ်အတွင်း ပိတ်မိနေသူများနှင့် သေဆုံးသူ အလောင်းများ ထုတ်ယူဖော်ယူခွင့်ကို ဟိုတယ်ပိုင်ရှင်ဘက်မှ ကန့်သတ်ထားကြောင်းသဖြင့် လက်ရှိတွင် ၎င်းတို့ကို ထုတ်ယူဖော်ယူ၍မရသေးကြောင်း မြို့ခံတစ်ဦးက သျှမ်းသံတော်ဆင့်ကို ပြောသည်။

“အဲ့ဒါနိုင်ငံတော်က လုပ်ပေးလို့ရမယ်၊ သူတို့လုပ်ပေးလို့ မရဘူးဆိုပြီး ပြောတာ။ အထဲမှာ သုံးယောက် ရှင်နေသေးတယ်လို့ ပြောတယ်။ အဲ့သုံးယောက်ကိုလည်း ဘယ်သူမှ မကယ်ပေးဘူး။ ဟိုတယ်ပိုင်ရှင်ဘက် ကတော့ ဘယ်သူ့မှမရှိဘူးလို့ပြောတယ်” ဟု မြို့ခံတစ်ဦးက ပြောသည်။

လက်ရှိအချိန်ထိ ဂရိတ်ဝေါဟိုတယ်အတွင်း အသက်ရှင်လျက် ကယ်ထုတ်နိုင်သူ ၂ ဦးနှင့် သေဆုံးအလောင်း ၂ လောင်းကိုသာ ထုတ်ယူနိုင်ကြောင်း သိရသည်။

ကယ်ဆယ်ရေးအဖွဲ့များကမှု ပိတ်မိနေသူများနှင့် သေဆုံးအလောင်းများကို ရှာဖွေကယ်ဆယ်ထုတ်ယူရန် ကြိုးစားသော်လည်း ဟိုတယ်ပိုင်ရှင်ဘက်မှ နိုင်ငံတော်ခွင့်ပြုချက်မရသေးသောကြောင့် ထုတ်ယူ၍ မရကြောင်း ပြောဆိုခဲ့သည်ဟု သိရသည်။

”နိုင်ငံတော်က ခွင့်ပြုမှရမယ်တဲ့ ဟိုတယ်ပိုင်ရှင်က ပြောတယ်။ အခုက နိုင်ငံတော် ခွင့်မပြုလို့တဲ့၊ နိုင်ငံတော်က ပြည်သူတွေကို ဘယ်လိုကြည့်နေလဲ၊ ကယ်ပေးမယ့်သူတွေက ရောက်နေပြီ၊ နိုင်ငံတော် ခွင့်ပြုချက်စောင့်နေလို့ပါ၊ ကယ်ကြပါဦး” ဟု လူမှုကွန်ရက်စာမျက်ပေါ်၌ ပြန့်နှံ့လာသည့် ရုပ်သံဖိုင်တွင် ကျန်ရစ်သူ မိဘတစ်ဦးက တောင်းဆိုထားသည်။

မိသားစုဝင်များနှင့် ပရဟိတအဖွဲ့များ ပူးပေါင်းကာ ရှာဖွေကယ်ဆယ်ရေးကို မိမိအစီစဉ်ဖြင့် ဆောင်ရွက်မည်ဟု ဟိုတယ်ကို အကြောင်းကြားသော်လည်း ဟိုတယ်အုပ်ချုပ်ရေးဘက်က ဆက်တိုက်ငြင်းဆန်လျက်ရှိကြောင်း သိရသည်။

အဆိုပါ ငြင်းဆန်နေရခြင်း အကြောင်းအရင်းကို ရှင်းရှင်းလင်းလင်း သိနိုင်ရန် မိသားစုများက လိုလားနေကြောင်း သိရသည်။

သို့သော် လက်ရှိအချိန်ထိ ဟိုတယ်ပိုင်ရှင်ဘက်က မည်သည့်အကြောင်းအရာမှ တုံ့ပြန်ထားခြင်း မတွေ့ရသေးပေ။

အဆိုပါဟိုတယ်တွင် ကျားဖြန့်ကဲ့သို့သော တရားမဝင် ကိစ္စရပ်များ၊ တရားမဝင် ပစ္စည်းများ၊ တရားမဝင် လုပ်ငန်းများရှိနေသည့် အတွက်ကြောင့် ဟိုတယ်အား အင်အားအပြည့်ရှာဖွေကယ်ဆယ်ရန် ခွင့်မပေးခြင်း ဖြစ်နိုင်ကြောင်းလည်း သတင်းများ ထွက်ပေါ်နေသည်။