စစ်ကိုင်းငလျင်ကြောင့် မန္တလေးမြို့ရှိ Sky Villa ကွန်ဒိုပြိုကျမှုအတွင်း သီပေါမြို့မှ စစ်ဘေးရှောင် မိသားစုလိုက် သေဆုံးခဲ့ကြောင်း စုံစမ်းသိရသည်။

မတ်လ ၂၈ ရက်တွင် စစ်ကိုင်းပြတ်ရွေ့ ငလျင်ကြောင့် မန္တလေးမြို့ရှိ Sky Villa ကွန်ဒိုပြိုကျမှုအတွင်း သီပေါမြို့မှ စစ်ဘေးတိမ်းရှောင်နေသည့် SSPP မှ စဝ်လွယ်မောဝ်၏ ဆွေမျိုးများဖြစ်သည့် သားသမီး၊ မြေးမြစ်များ အပါအဝင် အမျိုးသမီး (၅) ဦးနှင့် ကလေး (၃) ဦး အပါအဝင် စုစုပေါင်း (၁၀) ဦး သေဆုံးသွားခဲ့ကြောင်း မိသားစုနှင့် နီးစပ်သူတစ်ဦးက ပြောသည်။

“Sky Villa ကွန်ဒို ပြိုကျတဲ့အထဲ စဝ်လွယ်မောဝ်တို့ရဲ့ အမျိုးတွေ ဆုံးသွားကြတယ်လို့ ကြားတယ်၊ သူ့ရဲ့ ချွေးမတစ်ယောက်တော့ လွတ်တယ်။ အားလုံးပေါင်း ပျောက်နေတာ (၁၀) ယောက် ရှိမယ်။ ခမည်းခမက်ဖြစ်တဲ့ ဒေါ်နန်းရွှေဆာ ကတော့ ဆုံးသွားတယ်။ ချွေးမနဲ့ မြေးမြစ်တွေကတော့ မတွေ့သေးဘူး”ဟု မိသားစုနှင့် နီးစပ်သည့် ၎င်းအမျိုးသားက သျှမ်းသံတော်ဆင့်ကို ပြောသည်။

ယမန်နေ့ (ဧပြီလ ၁ ရက်)တွင် Sky Villa ကွန်ဒိုပြိုကျမှုအတွင်း သေဆုံးခဲ့သူနှင့် ပျောက်ဆုံးနေသူများကို ရည်စူး၍ ကျန်ရစ်သူ မိသားစုများမှ ကုသိုလ်ပြုပေးခဲ့ကြောင်း သိရသည်။

အလားတူ ငလျင်ကြောင့် ပြိုကျပျက်စီးသွားသည့် မန္တလေး Sky Villa ကွန်ဒိုကြီးအောက် အသက် ၂၄ နှစ်အရွယ် မူဆယ်မြို့နေ နန်းခမ်းလဲ့(ခ)နန်းအေဌေး တစ်ယောက်လည်း ပိမိနေသဖြင့် မူဆယ်မှ မိဘနှစ်ဉီးက အပြိုအပျက်များရှေ့ လာရောက်စောင့်ဆိုင်းကာ သမီးဖြစ်သူအား ငိုကြွေး၍ အားပေးစကားပြောဆိုခဲ့သည်။

ငလျင်ကြောင့် ပြိုကျသွားသော Sky Villa ကွန်ဒို တိုက်ခန်းသည် တိုက် ၃ တိုက်တွဲလျက်ရှိနေပြီး တစ်တိုက်လျှင် ၁၁ ထပ်ရှိသည်။

လက်ရှိတွင် ၂ တိုက်သည် လုံးဝ ပြိုကျပျက်စီးသွားပြီး ကျန်တစ်တိုက်မှာ ၅ ထပ်သာ မပျက်စီးဘဲကျန်နေသည်ကိုတွေ့ရသည်။ အဆိုပါတိုက်ခန်း တစ်တိုက်တွင် နေထိုင်သူ လူဉီးရေ ၂၀၀ ခန့်ရှိရာ ငလျင်ကြောင့် တိုက်ပြိုကျမှုအတွင်း လူဉီးရေ မည်မျှပိကျန်နေပြီး သေဆုံးသူ အရေအတွက်ကို အတိအကျ မသိရသေးပေ။

မတ် ၂၈ ရက်မှ မတ် ၃၀ ရက် ညနေပိုင်းအထိ Sky Villa ကွန်ဒို တိုက်ခန်းအပြိုအပျက်အတွင်း လူ ၃၇ ဉီးကို ရှာဖွေတွေ့ရှိခဲ့ကြောင်း၊ ထိုသူများအနက် အသက်ရှင်လျှက် ၂၉ ဉီးရှိပြီး ၈ ဉီးမှာ သေဆုံးသွားကြောင်း၊ အမျိုးသမီး ၅ လောင်း နှင့် အမျိုးသား ၃ လောင်း ပါဝင်ကြောင်း ကူညီကယ်ဆယ်ရေးအဖွဲ့က သျှမ်းသံတော်ဆင့်အား ပြောသည်။