ငလျင်ဘေးဒဏ်ခံနေရသည့် သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသကို စစ်ကောင်စီနှင့် PNO ပြည်သူ့စစ်တို့က ဒရုန်းဖြင့် ဗုံးကြဲ တိုက်ခဲ့သဖြင့် အရပ်သား (၁)ဦးထိခိုက်ပြီး နေအိမ် (၂)လုံးပျက်စီးသွားကြောင်း စုံစမ်းသိရှိရသည်။
ယမန်နေ့ မတ်လ (၃၁)ရက်နေ့ မနက် (၆) နာရီမှ ညနေ (၆)နာရီအချိန်တွင် စစ်ကောင်စီနှင့် PNOပြည်သူ့စစ်တို့က အင်းလေးတောင်ဘက်ခြမ်းရှိ ဘုရားတောင်ကျေးရွာနှင့် ရေပူကျေးရွာဘက်သို့ ဒရုန်းဖြင့် ဗုံးကြဲတိုက်ခိုက်ခဲ့ရာ ရေပူကျေးရွာရှိ နေအိမ် (၂)လုံးထိခိုက်ပျက်စီးသွားပြီး အရပ်သား တစ်ဦး ထိခိုက်ခဲ့သည်ဟု ဒေသခံများထံမှ သိရသည်။
“မနေ့ကထိ လေယောဉ် လေးစင်းလောက်ရှိမယ် ရေပူဘက်သွားတာ။ ဗုံးကြဲခံရတာကြားတယ်။ နေအိမ်တွေပျက်တယ်တဲ့။ လူတစ်ယောက်တော့ ထိတယ်။ဘယ်ရွာကလည်းတော့ မသိဘူး။ဒီဖက်မှာလည်း ကယ်ဆယ်ရေးတွေ လုပ်နေရတော့ သွားမကြည်ရသေးဘူး။” ဟု ဒေသခံ အမျိုးသားတစ်ဦးက ပြောသည်။
ထို့အပြင် အဆိုပါ ရေပူကျေးရွာတွင် ပြည်သူများ သည် လက်ရှိအချိန်ထိ စစ်ဘေးတိမ်းရှောင်နေကြရပြီး စစ်ကောင်စီနှင့် PNOတပ်ဖွဲ့တို့မှလည်း ရွာအနီးနားတွင် လာရောက် ကင်းလှည့်လေ့ရှိသည်ဟု ၎င်းက ဆက်ပြောသည်။
ယခုကဲ့သို့ အင်းလေးဒေသတွင် ငလျင်ကြောင့် ထိခိုက်သေဆုံးနေချိန် စစ်ကောင်စီက ဗုံးထပ်မံလာကြဲသောကြောင့် ဝမ်းနည်းမိကြောင်းနှင့် လူသားချင်းစာနာထောက်ထားစေလိုကြောင်း အင်းလေးပရဟိတ လုပ်နေသည့် လူငယ်တစ်ဦးက ပြောသည်။
“ဒါကတော့ အရမ်းလွန်တယ်။ဒီဘက်ခြမ်းက လူသေပြီး ထိခိုက်ပျက်စီးနေတာ ဟိုဘက်ခြမ်းကို ဗုံးသွားကြဲတာတဲ့။ ကြားလို့မှမကောင်းဘူး။ အရမ်းလည်း ဝမ်းနည်းတယ်။ ကျနော်တို့ပြည်သူတွေကို ငဲ့ကြည့်ပေးစေချင်တယ်။ သူတို့ အာဏာအတွက်ပဲ မလုပ်ဘဲနဲ့ လူသားချင်းစာနာမှုလေး ထားပေးစေချင်တယ်။” ဟု အဆိုပါ အမျိုးသားက ပြောသည်။
ပြီးခဲ့သည့် မတ်လ(၃၀) ရက်နေ့ ညနေ (၆)နာရီအချိန်တွင်စစ်ကောင်စီမှ ဘုရားတောင်ကျေးရွာသို့ ဗုံးကြဲတိုက်ခိုက်ခဲ့သောကြောင့် နေအိမ်တစ်လုံးပျက်စီးခဲ့သည်ဟု သိရသည်။
မတ်လ (၂၀)ရက်နေ့မှစပြီး တစ်ပတ်ကျော်ကာလအတွင်း အင်းလေး ဒေသကို စစ်ကောင်စီမှ ဒရုန်း၊ လက်နက်ကြီးဖြင့် ပစ်ခတ်တိုက်ခိုက်ခဲ့မှုမှာ အကြိမ်ရေ (၃၀)ကျော်ရှိပြီး ဗုံးသီး အလုံးရေ(၄၀) ကျော်ဖြင့် တိုက်ခိုက်ခံခဲ့ရသည်ဟု ပအိုဝ်းလူငယ်အစည်းရုံးမှ ဖော်ပြထားသည်။
Leave a Comments