မြန်မာနိုင်ငံတွင် အလွန်ပြင်းထန်သည့် ငလျင်လှုပ်ခတ်မှုကြောင့် အသက်ဆုံးရှုံးမှုများနှင့် ပျက်စီးဆုံးရှုံးရမှုများအတွက် နိုင်ငံတော်အဆင့် ဝမ်းနည်းခြင်း အထိမ်းအမှတ်နေ့ရက်အဖြစ် ယနေ့ မတ်လ ၃၁ ရက်နေ့၌ ထုတ်ပြန်ကြေညာထားသည်။

မတ်လ ၃၁ ရက်မှ ဧပြီ ၄ ရက်အထိ ၇ ရက်တာကာလကို နိုင်ငံတော်အဆင့် ဝမ်းနည်းခြင်း အထိမ်းအမှတ်နေ့ရက်အဖြစ် သတ်မှတ်ကြောင်း စစ်ကောင်စီက ကြေညာလိုက်သည်။

မတ်လ ၂၈ ရက်နေ့က မန္တလေးအနီး ဗဟိုပြု၍ လှုပ်ခတ်ခဲ့သည့် အင်အားရစ်ချ်တာစကေး ၇ ဒဿမ ၇ ရှိ အလွန်ပြင်းထန်သော ငလျင်ကြောင့် အသက်ဆုံးရှုံးမှုများနှင့် ပျက်စီးဆုံးရှုံးရမှုများကို ၃ ရက်ကြာမှ ဝမ်းနည်းကြောင်း စစ်ကောင်စီက ကြေညာလိုက်ခြင်း ဖြစ်သည်။

သို့သော် စစ်ကောင်စီတပ်သည် သျှမ်းပြည် မြောက်ပိုင်း၊ ကရင်နီ၊ ပဲခူးတိုင်း၊ စစ်ကိုင်းတိုင်း၊ မန္တလေးတိုင်း မတ္တရာမြို့နယ်နှင့် မကွေးတိုင်း ကမ္မမြို့နယ် စသည့်နေရာများကို ဗုံးကြဲဆက်တိုက်ခိုက်နေလျက်ရှိသည်။

ယနေ့ (မတ်လ ၃၁) ရက် နံနက် ၁၀ နာရီအချိန်တွင် နောင်ချိုမြို့နယ် ကျောက်ကြမ်းကျေးရွာကို စစ်ကောင်စီတပ်မှ ဒရုန်းဖြင့် လာရောက်ဗုံးကြဲတိုက်ခိုက်ခဲ့ကြောင်း TNLA ၏ထုတ်ပြန်ချက်အရ သိရသည်။

ပြီးခဲ့သည့် မတ်လ ၂၈ ရက်နေ့တွင်လည်း နိုင်ငံတဝှမ်း အင်အားပြင်း ငလျင်လှုပ်ခတ်နေသည့်အချိန်တွင် နောင်ချိုမြို့နယ် နောင်လင်ကျေးရွာအတွင်း စစ်ကောင်စီတပ်မှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ ဒေသခံ နေအိမ် ၃ လုံးနှင့် စာသင်ကျောင်း ၂ ကျောင်း ထိမှန်ပျက်စီးပြီး၊ ဓနုတပ် -DPLA စစ်မေ ၆ ဦးနှင့် တပ်သား ၁ ဦး စုစုပေါင်း ၇ ဦးကျဆုံးခဲ့ကြောင်း သိရသည်။

ယမန်နေ့ ညနေပိုင်း ၄ နာရီဝန်းကျင်အချိန်တွင် ကရင်နီပြည်နယ် ဖရူဆိုမြို့နယ်အတွင်းတွင်စစ်ကောင်စီတပ်မှ လေကြောင်းဖြင့် ဗုံး ၂ လုံး တိုက်ခိုက်မှုပြုလုပ်ရာတွင် အမျိုးသားတစ်ဦးထိခိုက်ဒဏ်ရာရရှိပြီး နေအိမ် ၂ လုံးထိခိုက်ဖျက်ဆီးသွားကြောင်း ဒေသခံတစ်ဦးကသျှမ်းသံတော်ဆင့်ကို ပြောသည်။

မတ်လ ၂၈ ရက်နေ့ ငလျင်လှုပ်ပြီးနောက်တွင် မြန်မာနိုင်ငံတစ်နိုင်ငံလုံးသာ ဒုက္ခရောက်နေချိန်အတွင်း စစ်ကောင်စီတပ်သည် အခွင့်ကောင်းယူပြီး စစ်ရှောင်နေအိမ်နှင့်ကျေးရွာများတွင် ဗုံးကြဲတိုက်ခိုက်မှုများ ဆက်တိုက်ပြုလုပ်နေခြင်းသည် စာနာထောက်ထားမှုကင်းမဲ့သည့် လုပ်ရပ်ဖြစ်နေကြောင်း ၎င်းက ဆက်ပြောသည်။

“ငလျင်လှုပ်လို့ ပြည်သူတွေ ဒုက္ခရောက်နေတဲ့အချိန်ကို စစ်တပ်က အခွင့်ကောင်းယူပြီးဗုံးကြဲတိုက်ခိုက်မှုတွေ ပြုလုပ်တယ်။ မနေ့က ညနေပိုင်း ကရင်နီပြည်ဘက်မှာ ဗုံးကြဲလို ၁ဦးထိသွားတယ်။ နေအိမ်တွေလည်းပျက် ဘေးကင်းမလားလို့ စစ်ရှောင်နေလဲလက်နက်ကြီးတွေနဲ့ မကင်းနိုင်ပါလား”ဟု ၎င်းက ပြောသည်။

ထို့အပြင် သျှမ်းပြည်မြောက်ပိုင်း နောင်ချိုမြို့တွင် ယခင် မတ်လအတွင်းတွင် TNLAပူပေါင်းတပ် နှင့် စစ်ကောင်စီတို့ကြား တိုက်ပွဲများပြင်းထန်လျက်ရှိပြီး ပြီးခဲ့သည့် မတ်လ ၂၈ရက်နေ့ ငလျင်လှုပ်ပြီးနောက် စစ်ကောင်စီမှ လေကြောင်းတိုက်ခိုက်မှု အပြင်းအထန်တိုက်ခိုက်နေကြောင်း နှစ်ဖက်လုံးတွင် ထိခိုက်သေဆုံးသူလည်း ရှိနေကြောင်းနောင်ချိုဒေသခံတစ်ဦးက ပြောသည်။

“အဲနေ့ ငလျင်လှုပ်ပြီး စစ်တပ်က လေယာဉ်နဲ့ ဗုံးတွေကြဲတယ်။ လေယာဉ်တွေ ၂ စီး၃စီးလောက်နဲ့ အပြင်းအထန်ကို လာကြဲသွားတယ်။ နှစ်ဖက်စလုံးက တပ်သားတွေထိခိုက်သေဆုံးသူလည်း များတယ်လို သိရတယ်။ အုမ္မခါးရွာဆို နေအိမ် ၃ အိမ်မီးလောက်ဖျက်ဆီးသွားတယ်။ အခု ၃ ရက်လောက်တော့ တိုက်ပွဲတွေ ပြန်ငြိမ်သွားတယ်”ဟု၎င်းက ပြောသည်။

အလားတူ ပြီးခဲ့သည့် မတ်လ (၂၆) ရက်ကလည်း နောင်ချိုမြို့နယ် သုံးဆယ်ရွာ၊ရွှေညောင်ပင်ရွာနှင့် အုမ္မခါးရွာတို့ကို စစ်ကောင်စီတပ်က ဂျက်ဖိုက်တာ (၂) စီးဖြင့်
လေကြောင်းဗုံးကြဲ တိုက်ခိုက်ခဲ့ရာ အမျိုးသမီး (၂) ဦး အပါအဝင် အရပ်သား (၄) ဦးသေဆုံးပြီး (၄)ဦး ဒဏ်ရာရရှိခဲ့ကြောင်း ဒေသခံများထံမှ သိရသည်။

မြန်မာနိုင်ငံတဝှမ်းလုံး အင်အားပြင်းထန်သည့် ငလျင်လှုပ်ခတ်နေစဉ် သျှမ်းပြည်နောင်ချိုမြို့နယ်သို့ လေကြောင်းဗုံးကြဲ တိုက်ခိုက်ခဲ့သည့် စစ်ကောင်စီသည် လူသေဆုံးမှုနှင့်ထိခိုက်ပျက်စီးမှု များပြားသည့် ငလျင်ဒဏ်သင့် သျှမ်းပြည်တောင်ပိုင်းနှင့် မြောက်ပိုင်းအပါအဝင် ရန်ကုန်၊ မန္တလေး၊ မကွေး၊ ပဲခူးနှင့် နေပြည်တော်တို့ကို အရေးပေါ်အခြေအနေကြေညာထားသည်။