သျှမ်းပြည်တောင်ပိုင်း၊ ရွာငံမြို့နယ် ကျေးရွာဘက်သို့ စစ်ကောင်စီမှ စစ်ကြောင်းထိုးလာစဉ် အမျိုးသားတစ်ဦးကို ဖမ်းဆီးသွားကြောင်း ဒေသခံများထံမှ သိရသည်။
ပြီးခဲ့သည့် မတ်လ (၂၆) ရက်တွင် စစ်ကောင်စီ အင်အား(၂၀၀)ခန့်သည် ရွာငံမြို့နယ် ကျောက်ကူတိကျေးရွာဘက်သို့ စစ်ကြောင်းထိုးလာနေချိန် လမ်း၌ ဆိုင်ကယ်မောင်းလာသည့်အမျိုးသားတစ်ဉီးကို ခေါ်ယူစစ်ဆေးပြီး ဖမ်းဆီးသွားကြောင်း ရွာငံမြို့မှ ဒေသခံအမျိုးသားတစ်ဉီးကပြောသည်။
အဆိုပါ ဖမ်းဆီးခံရသည့်အမျိုးသားသည် ရွာငံမြို့နယ် မြကုန်းကျေးရွာတွင် နေထိုင်သူဖြစ်သည်။
“စစ်သားတွေက ခဏခဏ စစ်ကြောင်းလာထိုးနေကြပဲ။ အဲနေ့ မြကုန်းရွာသား တစ်ယောက်က စစ်ကြောင်းထိုးတဲ့ဘက်ကို ဆိုင်ကယ်နဲ့ လာမိသွားတော့ ဖမ်ထားလိုက်တာ။ နင်က PDFလား ဘာလား မေးပြီး ဖမ်းတယ်ပြောတယ်” ဟု ၎င်း ဒေသခံ အမျိုးသားကပြောသည်။
ထိုဖမ်းခံရသည့် အမျိုးသားကို ရွာငံမြို့နယ် ရပ်ရွာအုပ်ချုပ်ရေးမှူးများက ပြန်လည်လွှတ်ပေးရန်လည်း သွားရောက် တောင်းဆိုခဲ့ရကြောင်း စစ်ကောာင်စီကို ကျပ်ငွေ ၁၀သိန်း ပေးဆောင်ပြီး ယနေ့ (မတ် ၂၇)ရက် မနက်ပိုင်းတွင် ပြန်လွှတ်လာကြောင်း သိရသည်။
“ စစ်ကောင်စီ တပ်သားက ခြေထောက်နဲ့ ကန်တာ၊ သေနတ်နဲ့ ဉီးခေါင်းရိုက်တာတွေတော့ လုပ်တယ်။ ဒဏ်ရာအနည်းငယ်တော့ ရထားတယ်” ဟု အကြောင်းသိသည့် အမျိုးသားက သျှမ်းသံတော်ဆင့်ကိုပြောသည်၊
ဆက်လက်ပြီး စစ်ကောင်စီတပ်သားများသည် စစ်ကြောင်းမကြာခဏထိုးပြီး၊ ထိုစစ်ကြောင်းများဖြင့် ထိပ်တိုက်ကြုံတွေ့လျှင် ဖမ်းဆီးခေါ်ဆောင်ခံရသဖြင့် တောယာသွားသူများလည်း မသွားရဲကြကြောင်း ဒေသခံ အမျိုးသမီး က ပြောသည်။
“သူတို့ စစ်ကြောင်းထိုးနေတုန်း တောထဲမှာတွေ့ရင် ရိုက်နှက်ဖမ်းသွားမှာ ကြောက်လို့ ဘယ်မှမသွားရဲဘူး။ လဖက်ခူးလည်း မသွားဘူး။ လက်ဖက်ရွက် ရင့်ရင် ရင့်ပလေ့စေ ထားလိုက်တယ်။ သူတို့ကိုပဲ ကြောက်နေရတာ။ခေတ်ပျက်ကြီးထဲမှာ နေရတာလည်း မပျော်တော့ဘူး။” ဟု ၎င်းအမျိုးသမီး ကဆိုသည်။
စစ်ကောင်စီ တပ်သားများသည် တောတောင်ထဲတွင် PDF များရှိနေနိုင်သည်ဟုဆိုကာ တစ်လကို (၂)ကြိမ်ခန့် လာရောက်စစ်ကြောင်းထိုးလေ့ရှိပြီး ကျေးရွာဘုန်းကြီးကျောင်းတွင် တပ်စွဲလေ့ရှိကြောင်း ၎င်းက ထပ်လောင်းပြောသည်။
ပြီးခဲ့သည့် ဇန်နဝါရီလတွင်လည်း စစ်ကောင်စီတပ်သားများသည် ရွာငံမြောက်ဘက် ကျေးရွာသို့လာရောက်တပ်စွဲ၍ ဒေသခံများကို သေနတ်ဖောက်ခြိမ်းခြောက်ခဲ့သည်ဟု သိရသည်။
Leave a Comments