သျှမ်းပြည် ညောင်ရွှေမြို့နယ် စံကားမြို့တွင် စစ်ကောင်စီတပ်မှ လမ်းများ ပိတ်ဆို့ထားခြင်းကြောင့် ကျန်ရှိနေသည့် စစ်ဘေးရှောင် ၆၀၀ ကျော်သည် နေရပ်မပြန်နိုင်သေးကြောင်း သတင်းရရှိသည်၊၊
ဇန်နဝါရီလ နောက်ဆုံးပတ်မှ စတင်၍ စစ်ကောင်စီတပ်နှင့် တော်လှန်ရေးတပ်ဖွဲ့များသည် ညောင်ရွှေ – ပင်လောင်း – ဖယ်ခုံမြို့နယ် အစပ်တို့တွင် စစ်ရေးတင်းမာမှုကြောင့် စံကားမြို့ အတွင်းသို့ စစ်ဘေးရှောင် ၆၀၀ ကျော် ထွက်ပြေးတိမ်းရှောင်လာခဲ့ရသည်။
စစ်ကောင်စီသည် ပြီးခဲ့သည့် ဖေဖော်ဝါရီလ ဒုတိယပတ်မှစတင်၍ ကုန်းလမ်း၊ ရေလမ်းများ ပိတ်ဆို့ထားသဖြင့် စံကားမြို့ပေါ် ရောက်ရှိနေသော စစ်ဘေးရှောင် (၆၁၇) ဦးသည် ယခုအချိန်ထိ နေရပ်မပြန်နိုင်ကြကြောင်း အသက် ၄၀ ဝန်းကျင် စစ်ဘေးရှောင်အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အခု စံကားကနေ စက်လှေနဲ့ သွားလို့လည်းမရဘူး။ စံကား အနောက်ဘက်က လွိုင်ကော်ကားလမ်းကိုလည်း သွားလို့မရဘူး။ အကုန်ပိတ်ထားတာ၊ ဘယ်မှ သွားလို့မရသေးဘူး။ တချို့က ပစ္စည်းပြန်ယူချင်တာ၊ စိုက်ထားတဲ့ သီးနှံ ပြန်ကြည့်ချင်ကြတာ” ဟု အသက် ၄၀ အရွယ်ရှိ ၎င်းစစ်ဘေးရှောင်အမျိုးသမီးက ဆိုသည်။
လက်ရှိတွင် ၎င်းစစ်ဘေးရှောင်များသည် နီးစပ်ရာ ဆွေမျိုးများ၊ ပြောင်းပွဲရုံနှင့် ဘုန်းကြီးကျောင်းတို့တွင် ထွက်ပြေး တိမ်းရှောင်နေရသည့်အတွက် နေရာထိုင်ခင်းအပြင်၊ စားသောက်ရန် အခက်အခဲများ ကြုံတွေ့နေရကြောင်း ၎င်းက ဆက်ဆိုသည်။
“ပြီးခဲ့တဲ့ ရက်ပိုင်းက မိုးရွာတော့ နေတဲ့ နေရာတွေက နေလို့ မရတာမျိုးတွေ ကြုံရတာပေါ့။ ပြောင်းပွဲရုံမှာ နေတဲ့လူတွေအတွက် အခက်အခဲ ဖြစ်တာပေါ့။ ဘာမှ မပါလာကြတော့ အရင်လိုပဲ စားသောက်ဖို့ကတော့ အကူအညီ လိုအပ်နေပါတယ်”ဟု အသက် ၄၀ ဝန်းကျင် စစ်ဘေးရှောင်အမျိုးသမီးက ထပ်လောင်းပြောသည်။
တိုက်ပွဲကြောင့် ထွက်ပြေးတိမ်းရှောင်နေရသော ဒေသခံများမှာ ဘုရားတောင်၊ လွယ်နွဲ့၊ ရေပူ၊ ညောင်လေးပင်၊ နန်းတုတ်၊ ကုန်းသာ၊ အိမ်မူ၊ တောင်ပို့ကွဲ၊ ဟိုပန် စသည့် ကျေးရွာဒေသခံများဖြစ်ပြီး လူဦးရေ (၃) ထောင်ကျော် ထွက်ပြေး တိမ်းရှောင်နေရကြောင်း သိရသည်။
Leave a Comments