မြန်မာ-တရုတ်နယ်စပ် မူဆယ်မြို့နယ် မန့်ဟီးရိုးမြို့ရှိ နယ်စပ်ဂိတ်ကို တရုတ်နိုင်ငံဘက်မှ စမ်းသပ်ဖွင့်လှစ်ပေးခဲ့ပြီး ဒေသခံအချို့ ဖြတ်သန်းနိုင်ကြောင်း စုံစမ်းသိရသည်။
ယမန်နေ့ (မတ်လ ၂၆ ရက်) နံနက်ပိုင်းမှ စတင်ပြီး မူဆယ်မြို့နယ် မန်ဟီးရိုးမြို့ရှိ မြန်မာ-တရုတ် နှစ်ပြည်တစ်ရွာ နယ်စပ်ဂိတ်ကို တရုတ်နိုင်ငံဘက်မှ စမ်းသပ်ဖွင့်လှစ်ပေးခဲ့ရာ ရွှေလီမြစ်တစ်ဘက်ကမ်း မန်ဟီးရိုးမြို့နှင့် အနီးတဝိုက် ကျေးရွာများမှ ယာယီနယ်စပ်ဖြတ်သန်းခွင့် စာအုပ်အစိမ်းရှိသူများ ဖြတ်သန်းသွားလာနိုင်ကြောင်း ဒေသခံများက ပြောသည်။
“မန့်ဟီးရိုးမှာ စာအုပ် အနီနဲ့ အစိမ်းလုပ်ပြီး တရုတ်ဘက်ကို အဝင်အထွက် လုပ်လို့ရပြီ ပြောတယ်။ မနေ့ကတော့ အစမ်းဖွင့်တာ လူ ၄၀ လောက်ပဲ ပေးဝင်သေးတယ်၊ မူဆယ်က လူတောင် မရဘူးပြောတယ်။ ပန်ခမ်း၊ နောင်ယန်း၊ တိန်းလုံ အဲ့ဘက်ရွာက လူတွေပဲ ဝင်လို့ရတယ်၊ ပစ္စည်းတော့ ထုတ်လို့ မရသေးဘူး”ဟု မန့်ဟီးရိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လတ်တလော စမ်းသပ်ကာလအတွင်း ရွှေလီမြစ်တစ်ဘက်ကမ်း မန့်ဟီးရိုးမြို့နှင့် အနီးတဝိုက် ၁၉ ရွာ အိမ်ထောင်စု (ဢိူင်ႇ 19 ဝၢၼ်ႈ) များသာ ယာယီနယ်စပ်ဖြတ်သန်းခွင့် စာအုပ်အစိမ်းဖြင့် အဝင်အထွက် ပြုလုပ်နိုင်ကြောင်း သိရသည်။
လက်ရှိတွင် မန့်ဟီးရိုးမြို့ နယ်စပ်ဂိတ်ကို ပြန်လည်ပြင်ဆင်နေပြီး လူနှင့် ကုန်ပစ္စည်း အဝင်အထွက် ပြုလုပ်နိုင်ရန် တရားဝင် ခွင့်ပြုမည့်အချိန်ကို စောင့်ဆိုင်းရဦးမည်ဟု ဒေသခံများထံမှ သိရသည်။
စစ်ကောင်စီ ထိန်းချုပ်ထားသည့် မူဆယ်မြို့နှင့် တအာင်း(ပလောင်) အမျိုးသားလွတ်မြောက်ရေး တပ်မတော် TNLA ထိန်းချုပ်ထားသည့် နမ့်ခမ်းမြို့အကြား လမ်းမကြီးတလျှောက်တွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA နှင့် ကချင်လွတ်လပ်ရေးတပ် KIA တို့လည်း သွားလာလှုပ်ရှားနေသည်။
မူဆယ်မြို့ရှိ စစ်ကောင်စီ ထိန်းချုပ်ထားသည့် နန်းတော်ဂိတ်နှင့် ဆင်ဖြူဂိတ်တွင် ပြီးခဲ့သည့် ဖေဖော်ဝါရီ (၁၂) ရက်မှ စတင်ပြီး စစ်မှုထမ်းရန် အကျုံးဝင်သည့် အသက် (၁၈) နှစ်မှ (၃၅) နှစ်အတွင်း အမျိုးသားများနှင့် အသက် (၂၇) နှစ်အောက်ရှိ အမျိုးသမီးများကို စစ်ကောင်စီလက်အောက်ခံ ရဲတပ်ဖွဲ့နှင့် လူဝင်မှုကြီးကြပ်ရေး လဝက တာဝန်ရှိသူများက နယ်စပ်ဖြတ်သန်းခွင့် တားမြစ်ကန့်သတ်လိုက်ကြောင်း ဒေသခံများက ပြောသည်။
Leave a Comments