သျှမ်း-ကရင်နီ နယ်စပ် မိုးဗြဲမြို့တွင် ယခုရက်ပိုင်း စစ်ကောင်စီနှင့် တော်လှန်ရေးတပ်ပေါင်းစုတို့ကြား တိုက်ပွဲဆက်လက် ပြင်းထန်နေကြောင်း စုံစမ်းသိရသည်။

စစ်ကောင်စီတပ်သည် မိုးဗြဲမြို့ကို ပြန်လည်ထိန်းချုပ်နိုင်ရန် ယခု ရက်သတ္တပတ်အတွင်း အပြင်းအထန် ထိုးစစ်ဆင် တိုက်ခိုက်မှုများ ပြုလုပ်နေသဖြင့် တိုက်ပွဲများ ဆက်လက် ပြင်းထန်ကာ လေကြောင်းမှ မီးလောင်းဗုံးများဖြင့် တိုက်ခိုက်မှုများ ပြုလုပ်ခဲ့ကြောင်း တော်လှန်ရေးတပ်ပေါင်းစုမှ စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

“တိုက်ပွဲတွေကတော့ ပြင်းထန်နေတုန်းပဲ။ ပြီးခဲ့တဲ့ မတ်လ ၂၄ ရက်က ပိုပြီးတော့ အခြေအနေ ဆိုးတယ်၊ လေယာဉ်နဲ့လည်း ဗုံးကြဲသွားတယ်။ ခါတိုင်းလိုပဲ ဒီစစ်ကောင်စီတပ်ဘက်က စစ်ကြောင်းထိုးလာတာ။၂၃ ရက်နေ့ကလည်း မီးလောင်ဗုံး သုံးပြီး တိုက်နေတာ ဟုတ်တယ်”ဟု ၎င်းစစ်ရေးသတင်းရင်းမြစ်က ပြောသည်။

တိုက်ပွဲပြင်းထန်နေသည့် မိုးဗြဲရှေ့တန်းစစ်မျက်နှာပြင်တွင် အမှတ် ၈၀၅ တပ်ရင်း၊ နေပြည်တော် ပြည်သူ့ကာကွယ်ရေးတပ်၊ ထနောင်းစစ်ကြောင်း တပ်ခွဲ (၁) တွင် တာဝန်ထမ်းဆောင်နေသော ဒုတပ်ခွဲမှူး ရဲဘော် ငတေ သည် ပြီးခဲ့သည့် မတ်လ ၂၂ ရက်နေ့ ရှေ့တန်းတွင် ကျဆုံးခဲ့သည်။

သျှမ်း – ကရင်နီ နယ်စပ် မိုးဗြဲမြို့တွင် စစ်ကောင်စီနှင့် တော်လှန်ရေး တပ်‌ပေါင်းစုတို့အကြား ပြီးခဲ့သည့် နှစ်ဆန်းပိုင်းမှ စ၍ လက်ရှိအချိန်ထိ နှစ်လကျော်ကြာ နေ့စဉ်နီးပါး တိုက်ပွဲပြင်းထန်နေပြီး နှစ်ဘက်ထိခိုက် ကျဆုံးမှု များနေပြီး နေအိမ်မီးလောင်မှုများလည်း ရှိကြောင်း သိရသည်။

ထို့ပြင် စစ်ကောင်စီမှ လက်နက်ကြီး၊ ဒရုန်းနှင့် လေကြောင်းဗုံးကြဲ တိုက်ခိုက်မှုများ အပြင်းအထန် အသုံးပြု၍ တိုက်ခိုက်နေသည့်အပြင် ကာမီကာဇေ (အသေခံ) ဒရုန်း နှင့် မီးလောင်ဗုံးများကိုပါ အသုံးပြု၍ တိုက်ခိုက်နေကြောင်း ရှေ့တန်းရောက် တော်လှန်ရေးတပ်သားများက ပြောသည်။ ။

မိုးဗြဲမြို့သည် နေပြည်တော်နှင့် မိုင်း ၁၀၀ ဝန်းကျင်ခန့်သာ ဝေးကွာသည့်အပြင်၊ မိုးဗြဲမြို့၏ မြောက်ဘက်တွင် ပင်လောင်း၊ ညောင်ရွှေနှင့် ဆီဆိုင်၊ တောင်ဘက်တွင် ဖရူဆိုနှင့် သံတောင်၊ အရှေ့ဘက်တွင် လွိုင်ကော်နှင့် ဒီးမော့ဆို ၊ အနောက်ဘက်တွင် ပျဉ်းမနားမြို့နယ်တို့နှင့် နယ်နိမိတ်ချင်း ထိစပ်နေသည့်အတွက် နှစ်ဘက်တပ်တို့၏ စစ်ရေးအရ အရေးပါသည့် နေရာဖြစ်ကြောင်း သိရသည်။