ကိုးကန့်တပ်ဖွဲ့ MNDAA နှင့် စစ်ကောင်စီတို့ တရုတ်နိုင်ငံကူမင်းမြို့ဆွေးနွေးပွဲတွင် သဘောတူညီချက်မရရှိဘဲ ပြီးဆုံသွားကြောင်း စုံစမ်းသိရှိရသည်။

ပြီးခဲ့သည့် မတ်လ ၂၂ ရက်နေ့တွင် တရုတ်၏ကြားဝင်စေ့စပ်ညှိနှိုင်းမှုဖြင့် စစ်ကောင်စီ နှင့် ကိုးကန့်တပ်ဖွဲ့ MNDAA တို့ တရုတ်နိုင်ငံ ကူမင်းမြို့တွင် သွားရောက်တွေ့ဆုံကြပြီ နယ်မြေအုပ်ချုပ်ရေးနှင့် ပတ်သက်ပြီဆွေးနွေးရာခဲ့သည်။

အဆိုပါ ဆွေးနွေးပွဲအတွင်း ကိုးကန့်တပ်ဖွဲ့သည် လားရှိုးမြို့အတွင်း နယ်မြေခွဲအုပ်ချုပ်ဖို့တောင်းဆိုခဲ့ပြီ စစ်ကောင်စီဘက်မှ ကိုးကန့်တပ်ဖွဲ့ MNDAA ကို လားရှိုးမြို့မှ တပ်ဆုတ်သွားပေးရန်တောင်းဆိုခဲ့သည့်အတွက်ကြောင့် ဘဘောတူညီချက်မရရှိခဲ့ဘဲ ဆွေးနွေးပွဲမအောင်မြင်ခဲ့ကြောင်း စစ်ရေး သတင်းရင်းမြစ်ထံ သိရသည်။

ထိုသို့ဆွေးနွေးပွဲမအောင်ခဲ့သည့်အတွက်ကြောင့် ကိုးကန်ထိန်းချုပ်နယ်မြေအတွင်းနေထိုင်ကြသည့် ဒေသခံများသည် တိုက်ပွဲတစ်ဖန်ထပ်ဖြစ်မှာကို စိုးရိမ်နေကြောင်း လားရှိုးမြို့ ဒေသခံ အမျိုးသားတစ်ဦးက ပြောသည်။

“ ဆွေးနွေးပွဲမအောင်မြင်တော့ ကျနော်တို့လည်း တိုက်ပွဲပြန်ဖြစ်မှာကိုတော့ စိုးရိမ်တာပေါ့။ လေယာဉ်နဲ့ဗုံးလာကြဲမှာကိုပိုကြောက်ရတယ်။ တိုက်ပွဲဖြစ်ရင် ကျနော်တို့ ပြည်သူတွေကပိုပြီထိခိုက်ကြတယ်လေ” ဟု ၎င်းအမျိုးသားကပြောသည်။

ထိုဆွေးနွေးမှုမတိုင်ခင် စစ်ကောင်စီ နဲ့ MNDAA တို့ကို တရုတ်က တစ်ဖွဲ့ချင်းသီသန့် အရင်ခေါ်တွေ့ခဲ့ကြောင်းသိရသည်။

ဆွေးနွေးမှုမအောင်မြင်ခဲ့သော်လည်း လက်ရှိအချိန်ထိ လားရှိုးမြို့အတွင်း ငြိမ်သက်မှုရှိနေပြီ ကိုးကန်တပ်ဖွဲ့ဘက်လည်း တပ်ဆုတ်ခွာခြင်းမရှိသေးပေ။

“ အခုလောလောဆယ်တော့ အေးအေးချမ်းချမ်းပဲရှိနေပါသေးတယ်။ ကိုးကန့်တပ်သားတွေလည်း ပုံမှန်သွားလာနေတယ်။ သူတို့လည်း ပြည်သူတွေနားမှာ မြေတွေငှားယူနေကြတယ်။ ကျနော်တို့ကြားတာတော့ ငှက်ပျောသီးစိုက်မယ်တဲ့။ ကျနော်တို့အထင်တော့ ကိုးကန့်တပ်ကတော့ လားရှိုးကနေ လွယ်လွယ်နဲ့ပြန်ဆုတ်ပေးမှာမဟုတ်ဘူး။ အခုတောင်သူတို့အလုပ်လုပ်ဖို့အတွက် ကျနော်တို့ပြည်သူတွေကနေ တစ်နှစ်စာချုပ်နဲ့ မြေကွက်တွေငှားနေတာလေ” ဟု၎င်းက ဆိုပြန်သည်။

အလားတူ လာမည့်သင်္ကြန်အတွက် လားရှိုးမြို့အတွင်းကိုးကန့်တပ်ဖွဲ့ ဦးဆောင်ပြီး မဏ္ဍပ်ပြုလုပ်ပေးနေသည်။

ကိုးကန့်တပ်ဖွဲ့သည် လားရှိုးမြို့မှ တပ်ဆုတ်ခွာရန် ရှိ ၊ မရှိကို သိရှိရန်အတွက် ကိုးကန့်တပ်ဖွဲ့ MNDAA ၏ပြောရေးဆိုခွင့်ရှိသူကို သျှမ်းသံတော်ဆင့်မှ ဆက်သွယ်ခဲ့သော်လည်း ဆက်သွယ်၍မရခဲ့ပေ။

ကိုးကန့်တပ်ဖွဲ့ နှင့် စစ်ကောင်စီတို့ တွေ့ဆုံဆွေးနွေးမှုအပြီ ဧပြီလအတွင်းတွင် စစ်ကောင်စီ နှင့် တအာင်း အမျိုးသား လွတ်မြောက်ရေး တပ်မတော် TNLA တို့ တွေ့ဆုံဆွေးနွေးရန်ရှိကြောင်း သိရသည်။

“၁၀၂၇ စစ်ဆင်ရေး” နောက်ပိုင်း စစ်ကောင်စီ နှင့် ညီနောင်မဟာမိတ်တို့သည် တရုတ်နိုင်ငံ၌ ၉ ကြိမ်တိုင်တိုင် တွေ့ဆုံဆွေးနွေးခဲ့ကြသည်။

၂၀၂၅ ဇန်နဝါရီလအတွင်းတွင် စစ်ကောင်စီ နှင့် ကိုးကန်တပ်ဖွဲ့တို့က အပစ်ရပ်စဲကြောင်းကို တရုတ်အာဏာပိုင်ဘက်က ကြေညာခဲ့သော်လည်း ကာယကံရှင်များက တရားဝင် ထုတ်ပြန်ပြောဆိုလာခြင်းမရှိပေ။