သျှမ်းပြည် ကွတ်ခိုင်မြို့နယ်တွင် လက်နက်ခဲယမ်း လာဝယ်သည့် စစ်ကိုင်း PDF တပ်သားများကို တအာင်း(ပလောင်) အမျိုးသားလွတ်မြောက်ရေး တပ်မတော် TNLA က ပြန်လည် ဖမ်းဆီးခဲ့ကြောင်း စုံစမ်းသိရသည်။

ပြီးခဲ့သည့် မတ်လ ၁၆ ရက်တွင် ကွတ်ခိုင်မြို့သို့ လက်နက်ခဲယမ်းများ လာဝယ်သည့် စစ်ကိုင်းတိုင်း PDF တပ်ဖွဲ့မှ တပ်သား ၁၀ ဦးကို လက်နက်ကိုင်ဆောင်မှုဖြင့် TNLA ဘက်မှ ကွတ်ခိုင်မြို့ပြင်ရှိ ထမင်းဆိုင်နေရာတွင် ဝင်ရောက်ဖမ်းဆီးခဲ့ပြီး ငွေသား ကျပ်သိန်း ၁ ထောင်ကျော်၊ Star Link စတားလင့် ဝိုင်ဖိုင်စက်နှင့် ဖုန်းတို့ကိုလည်း သိမ်းဆည်းခဲ့ကြောင်း ကွတ်ခိုင်မြို့ ဒေသခံအမျိုးသား တစ်ဦးက သျှမ်းသံ‌တော်ဆင့်ကို ပြောသည်။

“TNLA စစ်သားတွေ ရှုပ်ရှုပ်ရှက်ရှက် ဖြစ်နေတာတွေ့လို့ သူတို့ကိစ္စဖြစ်နေတဲ့ နေရာနား မနီးမဝေးကနေ သွားကြည်ခဲ့တာ။ သူတို့ကတော့ စစ်ကိုင်းဘက်ကနေ တက်လာပြီး လက်နက်တွေ လာဝယ်တဲ့ PDF တွေလို့ ပြောတယ်။ ပြီးတော့ ပြည်သူတွေကို လက်နက်အရောင်းအဝယ်တွေ ပေးမလုပ်ဘူးလို့ ပြောလိုက်သေးတယ်။ သူတို့ပဲ အရောင်းအဝယ် လုပ်တာလေ”ဟု ဖြစ်စဉ်သိရှိသူ ကွတ်ခိုင်မြို့ ဒေသခံအမျိုးသား တစ်ဦးက ပြောသည်။

ယခုဖြစ်စဉ်နှင့် ပတ်သက်၍ စုံစမ်းမေးမြန်းနိုင်ရန် သျှမ်းသံတော်ဆင့်မှ TNLA သတင်းနှင့် ပြန်ကြားရေးတာဝန်ခံ လွေးယေဦးထံသို့ ဆက်သွယ်ရန် ကြိုးစားခဲ့သော်လည်း အဆက်အသွယ် မရရှိခဲ့ပေ။

ထိုဖမ်းဆီးထိန်းသိမ်းခံရသည့် PDF တပ်သား ၁၀ ဦးကို TNLA မှ ပြန်လွှတ်ပေးခဲ့သော်လည်း ငွေသားများနှင့် လက်နက်များကို ဆက်လက်သိမ်းဆည်း ထားကြောင်း သိရသည်။

ကွတ်ခိုင်မြို့နယ်တွင် TNLA မှ ဖမ်းဆီးပြီး ပြန်လွှတ်ပေးခဲ့သည့် ၎င်း စစ်ကိုင်း PDF တပ်သား ၁၀ ဦးမှာ အပြန်လမ်းဖြစ်သည့် မန်တုံမြို့နယ်တွင်လည်း မတ်လ ၁၈ ရက် ညနေ ၃ နာရီဝန်းကျင်ခန့်၌ မန်ပန်ရွာအနီး TNLA တပ်သားများ၏ ဖမ်းဆီးစစ်ဆေးမှုကို ထပ်မံကြုံတွေ့ခဲ့ကြောင်း သိရသည်။

ကွတ်ခိုင်မြို့နယ်တွင် လက်နက်ခဲယမ်းများကို ကချင်လွတ်လပ်‌ရေးတပ် KIA ၊ တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA တို့မှ အောက်ခြေတပ်သားများထံတွင် ဝယ်ယူလို့ရကြောင်း ဒေသခံများက ပြောဆိုသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ခြင်း မရှိပေ။