သျှမ်းပြည် လားရှိုးမြို့တွင် ပွဲအမျိုးမျိုး အကြောင်းပြပြီး သုံးလနီးပါး လောင်းကစားဝိုင်းများ အကြီးအကျယ် ဖွင့်လှစ်နေကြောင်း စုံစမ်းသိရသည်။

ကိုးကန့်တပ်ဖွဲ့ (MNDAA) ထိန်းချုပ်ထားသည့် လားရှိုးမြို့နယ်တွင် ပြီးခဲ့သည့် ဇန်နဝါရီလမှ စတင်၍ လက်ရှိ မတ်လအထိ ၃လနီးပါး ပွဲအမျိုးမျိုး အကြောင်းပြကာ လောင်းကစားဝိုင်းများကို MNDAA ခွင့်ပြုချက်ဖြင့် အကြီးအကျယ် ဆက်တိုက်ဖွင့်လှစ်နေကြောင်း လားရှိုးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အခု ဘုရားပွဲမှာ ၁၀ ရက်လောက် လုပ်တာ၊ အဲ့တာကို လောင်းကစားဝိုင်းတွေပါ လုပ်တယ်။ ၃ လလောက် လားရှိုးမှာက ပွဲတွေ ဆက်တိုက် လုပ်နေတာ။ တစ်နေရာပြီး တစ်နေရာ လုပ်နေတာ လုပ်တဲ့ နေရာတိုင်းမှာလည်း လောင်းကစားဝိုင်းက ရှိတယ်။ ဇန်နဝါရီလကတည်းက စတာ ခုထိ”ဟု လားရှိုးမြို့ ဒေသခံ အမျိုးသာတစ်ဦးက ပြောသည်။

ထိုသို့ လောင်းကစားဝိုင်းများ ပေါများလာခြင်းသည် တရုတ်နှစ်သစ်ကူး ကာလမှ စ၍ တပေါင်းပွဲ အချိန်ထိ ပွဲအကြောင်းပြကာ လောင်းကစားဝိုင်းများကို အဆက်မပြတ် ဖွင့်လှစ်ခွင့်ပြု ထားခြင်းကြောင့် ခိုးဆိုးလုနှိုက်နှင့် ဓားပြတိုက်မှု အန္တရာယ်အပြင် လုံခြုံရေး စိုးရိမ်ရကြောင်း လားရှိုးမြို့ ဒေသခံအမျိုးသားတစ်ဦးကို ပြောသည်။

“အခုကတော့ သူခိုးတွေ ပေါလာတယ်။ နာရေးတောင် မကျန်ဘူး၊ ဂုံးဂင်းဝိုင်းတွေက ရှိတယ်။ ပြည်သူတချို့ အတွက်တော့ အခက်အခဲ ဖြစ်စေတယ်။ တချို့ကြတော့လည်း ရှာလို့ ရသလောက်နဲ့ လာလောင်းပြီး သွားဆော့၊ ပြီးရင် အကုန်ရှုံး။ တချို့လည်း အိမ်မှာနေပြီး ခိုးတာတွေကို သတိထား နေရတာပေါ့။ သင်္ကြန်မှာ‌တောင် လောင်းကစားဝိုင်းတွေ ရှိမယ်လို့ ပြောသံကြားနေရတာ”ဟု လားရှိုးမြို့ဒေသခံ ၎င်းအမျိုးသားက ဆက်ပြောသည်။

လားရှိုးမြို့တွင် ဂုံးဂင်းဝိုင်း၊ ရှမ်းကိုးမီး ဖဲဝိုင်း၊ ငါးပစ်ဝိုင်း စသည့် လောင်းကစားဝိုင်း အမျိုးမျိုး ဖွင့်လှစ်ထားပြီး၊ ထိုလောင်းကစားဖွင့်လှစ်ထားသော ဒိုင်များသည် ကိုးကန့်တပ်ဖွဲ့ MNDAA ထံ အခွန်ပေးဆောင်ကာ ခွင့်ပြုချက်ရယူပြီး ဖွင့်လှစ်ကြကြောင်း သိရသည်။

အဆိုပါ လောင်းကစားဝိုင်းများသည် MNDAA ထံ အခွန်ပေးဆောင်ကာ လားရှိုးမြို့၌ ပေါ်ပေါ်ထင်ထင် ဖွင့်လှစ်ထားပြီး၊ လက်ရှိ MNDAA ထိန်းချုပ်ထားသော ဒေသများတွင် လောင်းကစားဝိုင်းများအပြင် KTV ၊ မာဆက် အနှိပ်ဆိုင်များနှင့် ပြည့်တန်ဆာ လုပ်ငန်းများလည်း ပိုမို ပေါများလာကြောင်း ဒေသခံများက ပြောသည်။

လားရှိုးမြို့ပေါ်တွင် ပြည့်တန်ဆာ လုပ်ငန်းအတွက် ပွင့်လင်းစွာ ပိုစတာများကပ်ပြီး ကြော်ငြာလာသည် အထိ ဈေးကွက်ရှာဖွေလာကြောင်း သိရသည်။

လားရှိုးမြို့တွင် သင်္ကြန်ပွဲတော် ကျင်းပရန်အတွက် MNDAA က အစည်းအဝေး ခေါ်ယူပြီး ဧပြီလ ၁၃ ရက်မှ ၁၇ ရက်နေ့အတွင်း သင်္ကြန်အကြိုနေ့မှ မြန်မာနှစ်ဆန်းတစ်ရက်နေ့အထိ ငါးရက်တိုင်တိုင် လားရှိုး မြို့တော်ခန်းမတွင် ဗဟိုမဏ္ဍပ် ထားရှိကာ ရပ်ကွက်အလိုက် ယိမ်းအကအဖွဲ့များနှင့် တိုင်းရင်းသား ရိုးရာအကများဖြင့် ဖျော်ဖြေနိုင်ရန် စီစဉ်နေကြောင်း သိရသည်။