သျှမ်းပြည်တောင်ပိုင်း ညောင်ရွှေမြို့နယ် ရေပူကျေးရွာမှ စစ်ဘေးရှောင်များကို ပအိုဝ်းပြည်သူ့စစ် (PNO) တပ်ဖွဲ့ထဲ စစ်မှုထမ်းနိုင်မှသာ နေရပ်သို့ ပြန်ခွင့်ပြုမည်ဖြစ်ကြောင်း စုံစမ်းသိရသည်။
ယခုနှစ် ၂၀၂၅ ဇန်နဝါရီလ အတွင်း စစ်ကောင်စီတပ်နှင့် PNO တပ်ဖွဲ့တို့သည် အင်းလေးဒေသရှိ ကျေးရွာများနှင့် ရေပူကျေးရွာ၊ ဘီလူးချောင်း အရှေ့ဘက်ရှိ နန်းတုပ်ကျေးရွာများကို တစ်လအတွင်း လက်နက်ကြီး၊ လေကြောင်းနှင့် ဒရုန်းပစ်ခတ်မှု အကြိမ်ပေါင်း (၁၃၉) ကြိမ် ပြုလုပ်ခဲ့သည်။
အဆိုပါ ပစ်ခတ်မှုများကြောင့် ၎င်းကျေးရွာများမှ ဒေသခံများ ရွာလုံးကျွတ် ထွက်ပြေးတိမ်းရှောင်နေရပြီး ၎င်းတို့နီးစပ်ရာ အသိဆွေမျိုးများထံနှင့် ဘုန်းကြီးကျောင်းတို့တွင် သွားရောက်ခိုလှုံ နေထိုင်ကြရသည်ဟု စစ်ရှောင်ဒေသခံ အမျိုးသားတစ်ဦးက ပြောသည်။
ထိုကျေးရွာများထဲတွင် ရေပူ(ထီခိုး)ကျေးရွာမှ စစ်ဘေးရှောင် အိမ်ထောင်စု (၂၀၀)ကျော်သည် နီးစပ်ရာကျေးရွာတွင် ခိုလှုံနေရပြီး၊ လက်ရှိ နေရပ်သို့ ပြန်ချင်ပါက PNO တပ်ဖွဲ့အတွင်း စစ်မှုထမ်းနိုင်မှသာ နေရပ်ပြန်ရန် ခွင့်ပြုမည်ကြောင်း ပြောဆိုထားသည်ဟု စစ်ရှောင် ဒေသခံက ဆက်ပြောသည်။
“အခုချိန်ထိ လက်နက်ကြီးသံတွေ ကြားနေရတုန်းပဲ။ စစ်ရှောင်တွေတော့ နေရပ်ပြန်လို့ မရနိုင်သေးလောက်ဘူး၊ အဲ့ရွာတွေမှာ တိုက်ပွဲပြန်ဖြစ်ဖို့ အလားအလာ ရှိနိုင်တယ်။ ရေပူ(ထီခိုး)ရွာမှာဆိုရင် PNO တပ်ဖွဲ့ထဲ စစ်မှုထမ်းနိုင်မှ ပြန်နေခွင့်ပြုတာ။ အဲ့ဘက် လမ်းတကြောမှာ သူတို့ ဂိတ်တွေ အရမ်းစစ်တယ်။ တချို့လမ်းတွေလည်း ပိတ်ထားတယ်”ဟု ၎င်းစစ်ဘေးရှောင် အမျိုးသားက ပြောသည်။
အချို့သော စစ်ဘေးရှောင်များသည် စားဝတ်နေရေး အခက်အခဲများကြောင့် နေရပ်သို့ ပြန်နေရန် လက်မှတ်ထိုးပြီး၊ လက်ရှိတွင် PNO မှ ယူနီဖောင်းနှင့် လက်နက်ထုတ်ပေးကာ ကျေးရွာ လုံခြုံရေး ယူခိုင်းနေပြီး ရှေ့တန်းသို့ ပို့ခံရမည်ကို စိုးရိမ်နေကြောင်း ရေပူဒေသခံတစ်ဦးက ပြောသည်။
“တချို့က လက်နက်ကြီးပစ်တာ ငြိမ်သွားတော့ ပြန်သွားတာလည်း ရှိတယ်။ အဓိကတော့ စားဝတ်နေရေး အခက်အခဲကြောင့် ပြန်သွားကြတာ။ အိမ်ပြန်နေဖို့တောင် လက်မှတ်က ထိုးရသေးတယ်။ သူတို့ကို ဝတ်စုံတွေ လက်နက်တွေပေးပြီး ရွာလုံခြုံရေး တာဝန်ပေးထားတာရှိတယ်၊ ရှေ့တန်းအပို့ခံရမှာကိုပဲ ကြောက်နေတာ”ဟု ၎င်းစစ်ဘေးရှောင် အမျိုးသားက ထပ်လောင်းပြောသည်။
အလားတူ ယခင်လ ဖေဖော်ဝါရီအတွင်း ညောင်ရွှေမြို့နယ် စစ်ကောင်စီဘက်မှ အုပ်ချုပ်ရေးမှူးနှင့် စစ်ဘေးရှောင် တာဝန်ခံများကို ခေါ်ယူတွေ့ဆုံခဲ့ပြီး ညောင်ရွှေမြို့နယ်အတွင်း လာရောက်ခိုလှုံနေသည့် ကရင်နီပြည်နယ်မှ စစ်ဘေးရှောင်များကို နေရပ်ပြန်ရန် ဖိအားပေးခဲ့ခြင်းကြောင့် စစ်ဘေးရှောင်အချို့ စိုးရိမ်စိတ်ဖြင့် နေရပ်ပြန်နေကြရကြောင်း သိရသည်။
Leave a Comments