သျှမ်းပြည် နောင်ချိုမြို့ရှိ စိန်ရတနာ ပရိယတ္တိ စာသင်တိုက် လေကြောင်းဗုံးကြဲ တိုက်ခိုက်ခံရခြင်းသည် ဖုန်းလိုင်း ခေတ္တပြန်ဖွင့်ပြီးနောက် ဖြစ်ပွားခဲ့ကာ စစ်ကောင်စီထံ သတင်းပေးမှုကြောင့် ဖြစ်နိုင်ကြောင်း ဒေသခံများက ပြောဆိုလိုက်သည်။

ယမန်နေ့ (မတ်လ ၁၆ ရက်) ညနေပိုင်းတွင် နောင်ချိုမြို့ တောင်ရပ်ကွက်ရှိ စိန်ရတနာ ပရိယတ္တိ စာသင်တိုက်ကို စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ ကိုရင်(၈)ပါး၊ ဦးပဉ္ဇင်းတစ်ပါး၊ အမျိုးသမီး (၃)ဦးနှင့် အမျိုးသား (၂) ဦး၊ စုစုပေါင်း (၁၄) ဦး သေဆုံးသွားခဲ့ကြောင်း ဒေသခံများက ပြောဆိုသည်။

အလားတူ ထိခိုက်ဒဏ်ရာ ရရှိထားသည့် ကိုရင်နှင့် ပြည်သူ (၁၅) ဦးထဲမှ ဒဏ်ရာပြင်းထန်သည့် ကိုရင် (၁) ပါး ယနေ့ (မတ်လ ၁၇ ရက်) နံနက်ပိုင်းတွင် ထပ်မံသေဆုံးသွားခဲ့ကြောင်း နောင်ချိုဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ဆုံးတာက ဘုန်းကြီးကျောင်းမှာ ဝေယျာဝစ္စ လုပ်တဲ့လူနဲ့ ကိုရင်လေးတွေလို့ ပြောတယ်။ မြို့ထဲက အိမ်တွေမှာ ပြည်သူတွေ မနေရဲလို့ ဘုန်းကြီးကျောင်းမှာ လာနေကြတာ။ အဲ့တာကို စစ်တပ်ကလည်း သိတော့ ဘာမှမစဉ်းစားဘဲနဲ့ ဗုံးလာချသွားတယ်။ ဒီမနက် ဒဏ်ရာပြင်းတဲ့ ကိုရင်လေး နောက်တစ်ပါး ထပ်ဆုံးသွားတယ်”ဟု နောင်ချိုဒေသခံ ၎င်းအမျိုးသားက ပြောသည်။

ယမန်နေ့ လေကြောင်းတိုက်ခိုက်မှုနှင့် ပတ်သက်ပြီး စိန်ရတနာ စာသင်တိုက်ရှိ သံဃာတော် (၁၃) ပါး နှင့် ပြည်သူ (၄) ဦး ထိခိုက်ဒဏ်ရာ ရရှိခဲ့ပြီး ကျောင်းဆောင်အများအပြား ဗုံးထိမှန် ပျက်စီးသွားခဲ့ကြောင်း TNLA သတင်းနှင့် ပြန်ကြားရေးမှ ယနေ့နံနက်ပိုင်းတွင် ထုတ်ပြန်ထားသည်။

နောင်ချိုမြို့ပေါ် လေကြောင်းဗုံးကြဲ တိုက်ခိုက်ခံရခြင်းသည် စစ်ကောင်စီဘက်မှ ဖုန်းလိုင်း ခေတ္တ ပြန်ဖွင့်ပြီးနောက် ဖြစ်ပွားခဲ့ကာ စစ်ကောင်စီသတင်းပေးသူ (ဒလန်)များကြောင့် ဖြစ်နိုင်ကြောင်း ဒေသခံများအကြား သုံးသပ်ပြောဆိုမှုများလည်း ရှိနေသည်။

“ဘုန်းကြီးကျောင်းမှာ ပလောင်စစ်သားတွေ အုပ်စုလိုက် ရေလာချိုးတာတို့ ရှိတယ်၊ အဲ့မှာတော့ မနေဘူး ပြောတယ်။ အခုက သတင်းပေးတဲ့လူ ရှိလို့ လာကြဲတာမျိုး ပြောနေကြတယ်။ နောင်ချိုမှာ ဖုန်းလိုင်းပြန်ဖွင့်ပေးပြီးရင် တခါတည်း ဗုံးကြဲခံရတာ။ အရင်တခေါက်ကလည်း နောင်ချိုနဲ့ ကျောက်မဲဘက်မှာ ဖုန်းလိုင်းပြန်ရတော့ မနက်ပိုင်းရရင် နေ့လယ်ဆို ဗုံးကြဲခံရတယ်”ဟု နောင်ချိုဒေသခံ ၎င်းအမျိုးသားက ထပ်လောင်းပြောကြားသည်။

ယခုနှစ်ဆန်းပိုင်း ၂၀၂၅ ဇန်နဝါရီလ အတွင်းကလည်း နောင်ချိုမြို့ပေါ်ကို စစ်ကောင်စီတပ်မှ အပြင်းအထန် လေကြောင်းဗုံးကြဲ တိုက်ခိုက်ခဲ့ခြင်းကြောင့် လူအစုလိုက် အပြုံလိုက် သေဆုံးမှုများ ရှိခဲ့ပြီး ဒေသခံများ ထပ်မံထွက်ပြေးခဲ့ကြသည်။

ထို့အပြင် နောင်ချိုနှင့် ပြင်ဦးလွင်ကြား ဘန့်ဘွေးရွာအခြေစိုက် စစ်ကောင်စီတပ်မှ အုမ္မသီးလမ်းခွဲ ကျေးရွာများသို့ လှုပ်ရှားမှုအာရုံခံ အဆင့်မြင့် ဗုံးကြဲဒရုန်းများဖြင့် ခပ်စိပ်စိပ် တိုက်ခိုက်လျက်ရှိရာ တော်လှန်ရေးဘက်မှ ထိခိုက်ကျဆုံးမှုများ ရှိပြီး ပြည်သူနေအိမ်များလည်း နေ့တိုင်းနီးပါး မီးလောင်ဖျက်စီးခံနေရကြောင်း ဒေသခံများက ပြောဆိုသည်။

“အခု မြို့ပေါ်မှာက ငွေကြေးမတတ်နိုင်လို့ ဘယ်ကိုမှ မရှောင်နိုင်တဲ့လူတွေပဲ ကျန်နေခဲ့တာ၊ မြို့အဝင်အထွက်ကလည်း နှစ်ဘက်စလုံးက ညှပ်ပြီး ပိတ်ထားတော့ စားနပ်ရိက္ခာတွေလည်း အခက်အခဲဖြစ်တယ်။ နောက်ပြီးတော့ ဆက်သွယ်ဖို့ကလည်း ခက်တယ်၊ ဖုန်းလိုင်း ဖွင့်ပေးပြန်ရင်လည်း ဗုံးလာချတာဆိုတော့ စိတ်ပူရတယ်”ဟု ဒေသခံ အမျိုးသမီးတစ်ဦးက ပြောဆိုသည်။

စစ်ကောင်စီတပ်သည် တိုက်ပွဲဖြစ်ပွားခြင်း မရှိဘဲ အရပ်သားများကို ရည်ရွယ်ချက်ရှိရှိ ဦးတည် ဗုံးကြဲတိုက်ခိုက်နေခြင်းကြောင့် ပြည်သူများအနေဖြင့် စစ်ရေးသတိ အမြဲရှိရန် လိုအပ်ပြီး လေကြောင်းရန် ကာကွယ်ရေးဆိုင်ရာ နည်းလမ်းများ လိုက်နာဆောင်ရွက်ရန် လိုအပ်ကြောင်း TNLA မှ တိုက်တွန်းထားသည်။

TNLA နှင့် စစ်ကောင်စီတို့ကြား ဖေဖော်ဝါရီ လလယ်တွင် တရုတ်နိုင်ငံ ကူမင်းမြို့၌ ပြုလုပ်ခဲ့သည့် ဆွေးနွေးပွဲအတွင်း နှစ်ဖက်အပြန်အလှန် တောင်းဆိုမှုများ ပြုလုပ်ခဲ့ရာ ဆွေးနွေးညှိနှိုင်းရန် ခက်ခဲပြီး သဘောတူညီချက် မရရှိဘဲ ရပ်ဆိုင်းခဲ့ရသည်။