သျှမ်းပြည် နောင်ချိုမြို့ပေါ်ရှိ စိန်ရတနာ ပရိယတ္တိ စာသင်တိုက်ကို စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ခြင်းကြောင့် ကိုရင်(၈)ပါးနှင့် ပြည်သူ (၅)ဦး အပါအဝင် စုစုပေါင်း (၁၄) ဦးထက်မနည်း ထိခိုက်သေဆုံးခဲ့ကြောင်း စုံစမ်းသိရသည်။
ယနေ့ (မတ်လ ၁၆ ရက်) ညနေပိုင်း ၅ နာရီခွဲခန့်တွင် နောင်ချိုမြို့ပေါ်သို့ စစ်ကောင်စီ တိုက်လေယာဉ်များသည် အနီးကပ် ပျံဝဲခဲ့ပြီးနောက် တောင်ရပ်ကွက်ရှိ စိန်ရတနာ ပရိယတ္တိ စာသင်တိုက်ပေါ် ဗုံးကြဲချတိုက်ခိုက်ခဲ့သည်။
ထိုတိုက်ခိုက်မှုကြောင့် ကိုရင်(၈)ပါး၊ ဦးပဉ္ဇင်းတစ်ပါး၊ အမျိုးသမီး (၃)ဦးနှင့် အမျိုးသား (၂) ဦး၊ စုစုပေါင်း (၁၄) ဦး သေဆုံးသွားခဲ့ကြောင်း ဒေသခံများက ပြောဆိုသည်။
“အပြောရောင် ပျောက်ကျား ဂျက်တိုက်လေယာဉ်နဲ့ နိမ့်နိမ့်လေး ပျံပြီးတော့ကို လာချသွားတာ။ တောင်ရပ်ကွက်က ဘုန်းကြီးကျောင်းထဲ ဗုံးထိသွားတယ်၊ အဲ့မှာ ကိုရင်ကော စစ်ရှောင်ကော လူထိတာများတယ်။ စက်သေနတ်တွေနဲ့လည်း နောက်ထပ် လာပစ်သွားသေးတယ်။ အရပ်သားရှိမှန်း သိရက်နဲ့ တမင်ကို ရည်ရွယ်ပြီး လူသတ်သွားတာ”ဟု နောင်ချိုမြို့နယ် ဒေသခံအမျိုးသမီးတစ်ဦးက ပြောသည်။
ယခု လေကြောင်းဗုံးကြဲတိုက်ခိုက်ခံရသည့် ဘုန်းကြီးကျောင်းတွင် စစ်ဘေးရှောင်များလည်း ခိုလှုံနေခြင်းကြောင့် ထိခိုက်သေဆုံးသူ ထပ်ရှိလာနိုင်ပြီး ဒဏ်ရာရသူ အများအပြား ရှိသဖြင့် အရေးပေါ် ဆေးဝါးကုသမှုများ လိုအပ်နေကြောင်း ၎င်းအမျိုးသမီးက ဆက်ပြောသည်။
နောင်ချိုမြို့ပေါ် ဘုန်းကြီးကျောင်းကို စစ်ကောင်စီတပ်မှ ဂျက်ဖိုက်တာဖြင့် ဗုံး (၄) လုံး လာရောက်ကြဲချ တိုက်ခိုက်သည့်အပြင် စက်သေနတ်များဖြင့်လည်း ပစ်ခတ်ခဲ့ကြောင်း TNLA သတင်းနှင့် ပြန်ကြားရေးဌာနမှ ယနေ့ (မတ်၁၆)ရက် ညပိုင်းတွင် သတင်းထုတ်ပြန်လာသည်။
နောင်ချိုမြို့နယ် တောင်းခမ်းဒေသရှိ အမြောက်တပ်ရင်းများဘက်တွင်လည်း စစ်ကောင်စီတပ်နှင့် TNLA ပူးပေါင်းတပ်ဖွဲ့များ တိုက်ပွဲဆက်လက် ပြင်းထန်နေပြီး စစ်ကောင်စီဘက်မှ အဆိပ်ငွေ့ဗုံးများ အသုံးပြုတိုက်ခိုက်သည့်အပြင် မြေပြင်ထိုးစစ်ကို အင်အားဖြည့် တိုက်ခိုက်လာသည်ဟု စစ်ရေးသတင်းရင်းမြစ်များထံမှ သိရသည်။
အလားတူ နောင်ချိုနှင့် ပြင်ဦးလွင်ကြားရှိ အုမ္မသီးလမ်းခွဲ ကျေးရွာများတွင် စစ်ကောင်စီဘက်မှ လှုပ်ရှားမှုအာရုံခံ အဆင့်မြင့် ဗုံးကြဲဒရုန်းများဖြင့် ခပ်စိပ်စိပ် တိုက်ခိုက်လျက်ရှိရာ တော်လှန်ရေးဘက်မှ ထိခိုက်ကျဆုံးမှုများ ရှိပြီး ပြည်သူနေအိမ်များလည်း နေ့တိုင်းနီးပါး မီးလောင်ဖျက်စီးခံနေရကြောင်း ဒေသခံများက ပြောဆိုသည်။
Leave a Comments