သျှမ်းပြည်မြို့တော် တောင်ကြီးရှိ ရွှေဘုန်းပွင့်စေတီတော် အနီးတောင်စောင်းနေရာများတွင်  တောမီး နှစ်ရက်ဆက်တိုက် လောင်ကျွမ်းနေကြောင်း တောင်ကြီးမြို့ခံများထံ စုံစမ်းသိရသည်။

ယမန့်နေ့ (မတ် လ ၁၄ ရက်) ည ၇ နာရီအချိန်မှ စတင်ကာ တောင်ကြီးမြို့ ရွှေဘုန်းပွင့်တောင်ပေါ်တွင် တောမီးလောင်ကျွမ်းခဲ့ပြီး ယနေ့ (မတ်လ ၁၅ ရက်) နေ့လည်ပိုင်းတွင် ပြန်လည် ငြိမ်းသက်သွားသော်လည်း ယခု (မတ် ၁၅)ရက် ည ၈ နာရီဝန်းကျင်တွင် ပြန်လည်လောင်ကျွမ်းနေကြောင်း တောင်ကြီးမြို့ခံတစ်ဦးက သျှမ်းသံတော်ဆင့်သို့ပြောသည်။

“မနေ့ည ၇ နာရီလောက်ကလောင်တာ၊ ဒီနေ့နေ့လည်ပိုင်းကျတော့ ငြိမ်းသွားတယ်၊ ညနေ ၄ နာရီလောက်ကျတော့ စက်ဘီးသွားတဲ့သူတွေက မီးထပ်လောင်နေတာကိုတွေ့ခဲ့တယ်” ဟု မြို့ခံ အမျိုးသမီးတစ်ဦးက သျှမ်းသံတော်ဆင့်သို့ပြောသည်။ 

ရွှေဘုန်းပွင့်တောင်သည် နှစ်စဉ်နှစ်တိုင်း နွေရာသီရောက်သည့်အချိန်တိုင်း တောမီးလောင်ကျွမ်းမှုများ ဖြစ်ပေါ်တတ်လေ့ရှိပြီး ယခုနှစ်မီးလောင်ကျွမ်းမှုမှာ နှစ်ရက်ဆက်တိုက်ရှိလာပြီဖြစ်သည်။

ရာသီဥတုခြောက်သွေ့ပူပြင်းလာသည့်ကာလအတွင်း တောမီးလက်လွတ်စပယ်ရှို့မှုများကြောင့် တောမီးလောင်မှုများသည်လည်း မြို့ခံပြည်သူများကို စိုးရိမ်မှုများမြင့်တက်စေလျက်ရှိသည်။

“နှစ်တိုင်းတော့ လောင်တာပဲ၊ ခုက နှစ်ရက်ရှိလာပြီ ငြိမ်းပြီးမှ ပြန်လောင်တာလို့ပြောတယ်၊ ညလည်းကောင်းကောင်းမအိပ်ရဲဘူး၊ မသိလိုက်ခင်မှာ အောက်ထိရောက်လာမှာကြောက်လို့၊ အိမ်နားရောက်လာမှာတော်တော်ကြောက်တာ” ဟု သစ်တောရပ်ကွက်တွင် နေထိုင်သည့် အမျိုးသမီးတစ်ဦးက ပြောသည်။ 

ထို့အပြင် ယနေ့ (မတ်လ ၁၅ ရက်) နေ့လည်ပိုင်းတွင်လည်း တောင်ကြီးမြို့ ရတနာသီရီရပ်ကွက်အတွင်း အိမ်တစ်အိမ် မီးပြင်းထန်စွာလောင်ကျွမ်းခဲ့သည်။ မီးလောင်မှုကြောင့် နေအိမ်တစ်လုံးပျက်စီးဆုံးရှုံးခဲ့ပြီး လူထိခိုက်မှုမရှိကြောင်းသိရသည်။  

တောင်ကြီးမြို့သည် မြို့အလယ်ပိုင်းရှိလမ်းများမှာ သွားရလာရလွယ်ကူသော်လည်း၊ တောင်ကြီးမြို့ အရှေ့ဘက်နှင့် အနောက်ဘက် တောင်စောင်းနေရာများတွင် ဆောက်လုပ်ထားသည့် နေအိမ်များမှာ ကားအဝင်အထွက် လမ်းကျဉ်းမြောင်းခြင်း၊ မတ်စောက်ခြင်းများကြောင့် မီးဘေးအန္တရာယ်ဖြစ်လာလျှင် အန္တရာယ်များစွာရှိနိုင်သည့်အတွက် ပြည်သူများအနေဖြင့် အထူးဂရုစိုက်ရန်လည်းလိုအပ်သည်။