သျှမ်းပြည်တောင်ပိုင်း ညောင်ရွှေမြို့နယ် စံကားဒေသတွင် ပအိုဝ်းပြည်သူ့စစ် (PNO)မှ ပအိုဝ်းလူမျိုးများ နေထိုင်သည့် ကျေးရွာများကို စစ်သားစုဆောင်းမှု ပြုလုပ်နေပြီး အခြားလူမျိုးများထံ လစဉ် ဆက်ကြေး (အခွန်) ကောက်ခံနေကြောင်း စုံစမ်းသိရသည်။

လက်ရှိ ညောင်ရွှေမြို့နယ် စံကားဒေသတွင် ပအိုဝ်းဘာသာစကား နားလည်သူများကို စစ်သားစုဆောင်ရာတွင် ပိုမိုဉီးစားပေး ကောက်ယူနေပြီး၊ အခြားလူမျိုးများထံ လစဉ် ဆက်ကြေး တစ်အိမ်လျှင် ကျပ်ငွေ ၃ သောင်း ကောက်ခံကြောင်း စံကားဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

“ပအိုဝ်းရွာတွေဆို အလှည့်ကျ အကုန် ပြည်သူ့စစ်ထဲ ဝင်ရတယ်။ ကျနော်တို့ဘက်ကတော့ လတိုင်း ဆက်ကြေးထည့်နေရ။ ကိုယ်စားဖို့ထက် တစ်လပြည့်ရင် ဆက်ကြေးပေးနိုင်ဖို့ ရုန်းကန်နေရတာ။ သူတို့က လက်နက်နဲ့ဆိုတော့ လွန်ဆန်လို့မှ မရတာ” ဟု အဆိုပါ ဒေသခံ အမျိုးသားက သျှမ်းသံတော်ဆင့်ကို ပြောသည်။

အဆိုပါ စံကားအင်း ဒေသတွင် PNO ပြည်သူ့စစ် တပ်ဖွဲ့သာလျှင် ရှိပြီး ကျေးရွာအလိုက် လှည့်လည် ကင်းစောင့်မှုများ လုပ်ဆောင်နေလျှက် ရှိသည်ဟု ၎င်းက ထပ်လောင်းပြောသည်။

ယခုလက်ရှိ စံကားဒေသတွင် လက်နက်ကြီးပစ်ခတ်မှုနှင့် တိုက်ပွဲများ ငြိမ်နေသော်လည်း ကရင်နီစစ်ဘေးရှောင်များကို PNO တပ်ဖွဲ့မှ နေရပ်ပြန်ခိုင်းကာ ကျောင်းသားရှိသည့် စစ်ဘေးရှောင်များသာလျှင် စံကားဒေသတွင် ကျန်ရှိတော့သည်ဟု သိရသည်။

ထို့အပြင် တောင်ကြီးမြို့ အနီးတဝိုက် သဲကျင်းနှင့် အုတ်ကျင်းများကိုလည်း ပအိုဝ်းပြည်သူ့စစ် (PNO)မှ အခွန်များ ကောက်ခံသွားမည်ဖြစ်ကြောင်း၊ သင်္ကြန်ပြီးလျှင် အုတ်နှင့် သဲများ ဈေးတက်လာနိုင်ကြောင်း တောင်ကြီးဒေသခံများက ပြောသည်။

“အခုလာမယ့် ရက်ပိုင်းအတွင်း PNO က သဲကျင်းတို့ အုတ်ဘလောက်တွေကို အခွန်နှစ်ဆ တိုးကောက်မယ် ကြားတယ်။ ဒီရှေ့ဆက်တော့ အကုန်ဈေးတက်လာဖို့ ရှိတယ်။ အိမ်ဆောက်တဲ့ လုပ်ငန်းရှင်တွေအတွက် ကြီးကြီးမားမား လှုပ်ခတ်နိုင်တယ်။ သူတို့ကိုယ်တိုင် ကွင်းဆင်း အခွန်ကောက်မယ်လို့ သိရတယ်” ဟု တောင်ကြီးမြို့ ဒေသခံအမျိုးသားတစ်ဦးက ဆိုသည်။

ပအိုဝ်းပြည်သူ့စစ် (PNO) သည် ပင်လောင်း၊ ဟိုပုံး၊ ဆီဆိုင် စသည့် မြို့နယ်များမှ ကျေးရွာများတွင်လည်း စစ်သားစုဆောင်းမှု၊ စစ်မှုထမ်းကြေး ကောက်ခံမှု၊ သတ်မှတ်ထားသည့် ပိုင်ဆိုင်မှုရှိလျှင်လည်း အခွန်ပေးဆောင်နေကြရသည်။

ထိုသို့ လစဉ်လတိုင်း ခေါင်းစဉ်အမျိုးမျိုးတပ်ကာ အခွန်ကောက်ခံနေမှုကြောင့် ဒေသခံများ စားဝတ်နေရေး အခက်အခဲများ ရှိနေပြီး လုံခြုံမှုကင်းမဲ့စွာ ရှင်သန်နေထိုင်နေကြရသည်ဟု ပအိုဝ်းလူငယ်များက ပြောသည်။

ယခုလက်ရှိ စစ်ကောင်စီနှင့် PNO ပြည်သူ့စစ် စိုးမိုးထားသည့် တောင်ကြီးမြို့တွင်လည်း လိုင်စင်မဲ့ ကားများကို ဖမ်းဆီးနေပြီး ပြန်ရွေးထုတ်ခွင့် မရတော့ဘဲ အပြီးအပိုင် အသိမ်းခံနေရကြကာ ပြီးခဲ့သည့် မတ်လ(၅)ရက်နေ့မှစ၍ ယနေ့ချိန်ထိ အဖမ်းအဆီးများ ကြမ်းနေသည်ဟု သိရှိရသည်။