ညီနောင်မဟာမိတ် (၃)ဖွဲ့ လုပ်ဆောင်ချက်သည် တော်လှန်ရေးအဖွဲ့အစည်းသစ်များအတုယူ စံပြဖြစ်ခဲ့ရကြောင်း TNLA နှင့် AA က MNDAA ၃၆နှစ်ပြည့် သဝဏ်လွှာတွင် ဖော်ပြထားသည်။

ညီနောင်မဟာမိတ် (၃)ဖွဲ့ဝင် မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) ၏ ၃၆ နှစ်မြောက်အခမ်းအနားသို့ ကျန်နှစ်ဖွဲ့ဖြစ်သည့် TNLA နှင့် AA တို့မှ ဂုဏ်ပြုကြောင်း သဝဏ်လွှာအား ယနေ့ ၂၀၂၅ ခုနှစ် မတ်လ (၁၁) ရက်စွဲဖြင့်ပေးပို့ခဲ့သည်။

သဝဏ်လွှာတွင် MNDAA မှ ၃၆ နှစ်မြောက်အခမ်းအနားအား စစ်ရေးအခြေအနေပေါ်မူတည်၍ ဇာတိမြေ၊ ဘိုးဘွားမြေများထက်တွင် ဂုဏ်ယူဝင့်ကြွားစွာဖြင့် ကြီးကျယ်ခမ်းနားစွာကျင်းပနေမည်ဟု အလေးအနက် ယုံကြည်ကြောင်း ဦးစွာဖော်ပြထားသည်။

ညီနောင်မဟာမိတ် (၃) ဖွဲ့အနေဖြင့် စစ်ရေး၊ နိုင်ငံရေး ရည်မှန်းချက်များမှာ အတိုင်းအတာတစ်ခုအထိ အထမြောက်ခဲ့ပြီးဖြစ်သော်လည်း အောင်မြင်မှုနှင့်အတူ အခက်အခဲအတားအဆီးများ ဒွန်တွဲလျက် ပါလာတတ်သည့်အကြောင်းအား သတိပြုစေလိုကြောင်းလည်း ထည့်သွင်းဖော်ပြထားသည်။

“မိမိတို့ ညီနောင်မဟာမိတ် (၃) ဖွဲ့၏ စည်းလုံးညီညွှတ်မှု၊ လုပ်ဆောင်ချက်များသည် ယခုနောက်ပိုင်း ထွက်ပေါ်လာသော တော်လှန်ရေးအဖွဲ့အစည်းသစ်များအတွက် အတုယူစရာနှင့် စံပြဖြစ်ခဲ့ရသည်မှာ အမှန်ဖြစ်သည်” ဟု သဝဏ်လွှာတွင် ထည့်သွင်းဖော်ပြထားသည်။

သဝဏ်လွှာတွင် ကိုးကန့်ဒေသအတွင်း ပြန်လည်တည်ဆောက်ရေး၊ ပြန်လည်ဖွံ့ဖြိုးရေးတို့ကို ကျော်ဖြတ်ပြီးလျှင် တစ်ခေတ်တစ်ခါက ကိုးကန့်အခြေအနေသို့ ပြန်လည်ရောက်ရှိလာနိုင်မည်ကို ယုံကြည်ကြောင်း ဖော်ပြ ထားသည်။

ကိုးကန့်တပ်အခြေစိုက်ရာ ဒေသသည် မြန်မာနိုင်ငံ၏ ပထမဆုံး အထူးဒေသ (၁)အဖြစ်သတ်မှတ်ခံခဲ့ရသော ဒေသတစ်ခု ဖြစ်ခဲ့ပြီး ငြိမ်းချမ်းတည်ငြိမ်၍ ဖွံ့ဖြိုးတိုးတက်ခဲ့သည့် ဒေသတစ်ခုဖြစ်ခဲ့သည်။

သို့သော်လည်း တရုတ်နိုင်ငံ၏ ဆန္ဒတစ်ခုဖြစ်သော ကျားဖြန့်နှိမ်နင်းရေး စီမံချက်ကြောင့် “၁၀၂၇” စစ်ဆင်ရေး စတင်ခဲ့ပြီး လက်ရှိမြေပြင်စစ်ရေးအခြေအနေများအရ ကိုးကန့်တပ်ထိန်းချုပ်ထားသည့် မြို့နယ်အများအပြားကို စစ်ကောင်စီမှ ပြန်လည်ရယူနိုင်ရန် လေကြောင်းဖြင့် အကြိမ်ကြိမ်ဗုံးကြဲတိုက်ခိုက်ခိုက်နေသည့်အတွက် ပြည်သူများ နစ်နာဆုံးရှုံးမှု များပြားလျက်ရှိနေသည်။

စစ်ကောင်စီ၏အရှေ့မြောက် တိုင်းစစ်ဌာနချုပ် အခြေစိုက်ရာ လားရှိုးမြို့ကို ၂၀၂၄ ခုနှစ် ဩဂုတ်လအတွင်း ကိုးကန့်တပ်ဖွဲ့ MNDAA အလုံးစုံ ထိန်းချုပ်နိုင်ခဲ့ပြီး ပြန်လည်ထူထောင်ရေးလုပ်ငန်းများ လုပ်ဆောင် နေသော်လည်း အခြားတစ်ဘက်တွင် ကိုးကန့်တပ်ဖွဲ့ ပြန်ဆုတ်ခွာပေးရန် တရုတ်နိုင်ငံမှ ကမကထပြု စီစဉ်ပေးနေသည့် ဆွေးနွေးပွဲတွေတိုင်းတွင် စစ်ကောင်စီက တောင်းဆိုနေလျက်ရှိသည်။

စစ်ကောင်စီနှင့် ကိုးကန့်တပ်ဖွဲ့တို့သည့် ပြီးခဲ့သည့် ၂၀၂၄ ခုနှစ် ဒီဇင်ဘာလတွင် တစ်ကြိမ်၊ ၂၀၂၅ ခုနှစ် ဇန်နဝါရီလအတွင်း တစ်ကြိမ်တွေ့ဆုံခဲ့ပြီး ယခု မတ်လအတွင်းထပ်မံတွေ့ဆုံနိုင်သည့် သတင်းများလည်း ထွက်ပေါ်နေလျက်ရှိသည်။

ကိုးကန့်တပ်အနေဖြင့် စစ်ရေးအရ အသာစီးရအောင် ကြိုးစားနေသော်လည်း ၎င်းတို့တပ်သားမှာ အသက်မပြည့်သေးသည့် မိန်းကလေးငယ်တစ်ဦးအား တစ်လတိတိ အကြောင်းပြချက်မရှိဖမ်းဆီးထားခြင်း၊ ရွှေတူးဖော်မှုများအားကန့်ကွက်သည့်ဒေသခံများအား ပစ်ခတ်သည့်အတွက် ဒေသခံ (၆) ဦးသေဆုံးခြင်း စသည့် လူ့အခွင့်အရေးချိုးဖောက်မှုများကိုလည်း ကျူးလွန်လျက်ရှိနေသည်။