သျှမ်းပြည် ကွတ်ခိုင်မြို့နယ် တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ သာလွန်အင်အား အသုံးပြု၍ ကချင်လွတ်လပ်‌ရေးတပ် KIA ဆက်ဆံရေးရုံးရှိ တပ်သား ၄၀ ခန့်ကို ကားတင်ပြီး နမ့်ဖတ်ကာဘက်သို့ ပို့ဆောင်လိုက်ကြောင်း စုံစမ်းသိရသည်။

ယမန်နေ့ (မတ်လ ၇ ရက်) ညနေ ၃ နာရီခွဲခန့်တွင် ကွတ်ခိုင်မြို့ပေါ် ဖွင့်လှစ်ထားသည့် KIA ဆက်ဆံရေးရုံးသို့ TNLA ဘက်မှ အင်အားအများအပြားဖြင့် ရောက်ရှိလာပြီး ဆက်ဆံရေးရုံးနှင့် နားနေဆောင်ရှိ နေရာ (၂) ခုမှ KIA တပ်သား (၄၀) ခန့်ကို ကားတင်ခေါ်ဆောင်ကာ နမ့်ဖတ်ကာဘက်သို့ ပို့ဆောင်လိုက်ကြောင်း ကွတ်ခိုင်ဒေသခံများက ပြောသည်။

“မူဆယ်ဘက်ခြမ်းက ရှုခင်းသာဘက်ကို သွားပို့တယ်၊ အဲ့မှာ နမ့်ဖတ်ကာနား ချခဲ့တယ် ပြောတာပဲ။ သွေးဆူနေတဲ့ လူထုနဲ့ အတင်းဝင်ကြတော့ တွန်းတွန်းထိုးထိုးတော့ ရှိတာပေါ့လေ၊ ရုန်းရင်းဆန်ခတ်ပေါ့။ ဗျူဟာလမ်းမှာ အရင်တိုင်းရင်းဆေးလို့ ခေါ်တာလေ ဌာနပေါ့၊ အဲ့ဒီမှာ တစ်ဖွဲ့ရှိတယ်။ ဒီကားလမ်းဘေးက ဆက်ဆံရေးရုံးမှာ တစ်ဖွဲ့ရှိတယ်၊ ၂ နေရာဆိုတော့ ၄၀ လောက်တော့ ရှိမယ်”ဟု ကွတ်ခိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယခုဖြစ်စဉ်နှင့် ပတ်သက်၍ စုံစမ်းမေးမြန်းနိုင်ရန် KIA ပြောရေးဆိုခွင့်ရှိသူ ဗိုလ်မှူးကြီး နော်ဘူနှင့် TNLA ပြောရေးဆိုခွင့်ရှိသူ လွေးယေဦးထံသို့ သျှမ်းသံတော်ဆင့်မှ ဆက်သွယ်ခဲ့သော်လည်း ပြန်လည်ဖြေကြားခြင်း မရှိသေးပါ။

ကွတ်ခိုင်မြို့ပေါ်တွင် ယခင်ကတည်းက ဖွင့်လှစ်ထားသည့် KIA ဆက်ဆံရေးရုံးတွင် အတိုင်းအတာ တစ်ခုထက် လူ၊ လက်နက် သာလွန်အင်အား ထားရှိခြင်းကြောင့် TNLA မှ သွားရောက်ပြောဆိုခဲ့ရာ ပဋိပက္ခဖြစ်ပွားရန် ဦးတည်ခဲ့ကြောင်း ဒေသခံများက ပြောဆိုနေသော်လည်း သျှမ်းသံတော်ဆင့်မှ သီးခြားအတည်ပြုနိုင်ခြင်း မရှိပေ။

ယင်းကိစ္စ မတိုင်ခင် ယမန်နေ့ တစ်ရက်တည်းတွင် TNLA ထိန်းချုပ်ထားသည့် ကွတ်ခိုင်မြို့ပေါ်သို့ ကြိုတင်အကြောင်းမကြားပဲ တာမိုးညဲမြို့ဘက်မှ KIA တပ်သား (၁၀၀) ခန့် ဝင်ရောက်လာခြင်းကြောင့် နှစ်ဘက်တပ်ဖွဲ့ ရုန်းရင်းဆန်ခတ် ဖြစ်ပွားခဲ့ကြောင်း ဆိုသည်။

“ဖြစ်သွားတဲ့ ပြဿနာက အတိုင်းအတာ တစ်ခုထက် သာလွန်အင်အား ထားတာပေါ့နော်။ မနေ့က ကြားတာဆိုရင် တာမိုးညဲဘက်ကနေ ရပ်ကွက်(၆) ကို KIA ရဲဘော် ၁၀၀ လောက် ဝင်လာတယ် ပြောတယ်။ KIA ၁၀၀ လောက်က TNLA ကို သတင်းမပို့ဘဲ ဝင်တယ်၊ အဲ့က စတာပေါ့ ပြဿနာက။ အဲ့မှာလည်း ရုန်းရင်းဆန်ခတ်ဖြစ်ပြီး ဝင်ခွင့်မပေးဘူး၊ အဲ့ဒီဟာ အဓိကလို့ ပြောတယ်”ဟု ၎င်းဒေသခံ အမျိုးသားက ဆက်ပြောသည်။

ယခု လုပ်ရပ်အပေါ် TNLA မှ ဖွဲ့စည်းပေးထားသည့် ကွတ်ခိုင်မြို့ပေါ်ရှိ တိုင်းရင်းသားပေါင်းစုံ ပါဝင်သော မြို့မိမြို့ဖ အုပ်ချုပ်ရေးအဖွဲ့မှလည်း တစုံတရာ တုန့်ပြန်ဆောင်ရွက်မှု မရှိသေးဘဲ ကချင်အရပ်ဘက် အဖွဲ့အစည်းများမှ ဆန္ဒထုတ်ဖော်ရန် လုပ်ဆောင်နေကြောင်း သိရသည်။

“မြို့ပေါ်မှာ ကော်မတီ ဖွဲ့ထားတာ ရှိတယ်၊ ပဋိပက္ခ တစ်ခုခု ဖြစ်ပြီဆိုရင် ဝိုင်းဝန်း ဖြေရှင်းလို့ရအောင် တိုင်းရင်းသားလူမျိုးပေါင်းစုံ ပါတယ်။ မနေ့ကမှ ဖြစ်တဲ့ ပြဿနာဆိုတော့ အဲ့ဒီကော်မတီက ဘာလုပ်မယ်ဆိုတာ မသိရသေးဘူး။ လူထုရဲ့အသံ လူထုရဲ့ ဆန္ဒဆိုတာက ကဏ္ဍပျောက်နေတာကိုး။ အဓိကတော့ ကချင်လူထုပေါ့ ဆန္ဒပြဖို့ အသံတော့ ကြားရတယ်။ ကြားရတဲ့ သတင်းကတော့ ရှိလာနိုင်တယ်”ဟု ကွတ်ခိုင်မြို့မှ ဒေသခံတစ်ဦးက သျှမ်းသံတော်ဆင့်ကို ပြောဆိုသည်။

ပြီးခဲ့သည့် ဖေဖော်ဝါရီလ နောက်ဆုံးပတ်ကလည်း မန်တုံမြို့နယ်အတွင်း ကချင်လွတ်လပ်ရေးတပ် KIA မှ ဖွင့်လှစ်ထားသည့် KIA တပ်ခွဲရုံး၊ မြို့နယ်ရုံး၊ တိုက်နယ်ရုံးနှင့် ဂိတ်များကို မဖွင့်လှစ်ရန်၊ နေရာပြောင်းရွှေ့ရန် TNLA ဘက်က ပြောဆိုထားခြင်းကြောင့် နှစ်ဘက်တာဝန်ရှိသူများ တွေ့ဆုံကာ ညှိနှိုင်းရမည့် အနေအထားဖြစ်ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက ဖေဖော်ဝါရီ (၂၅) ရက်တွင် သျှမ်းသံတော်ဆင့်ကို ဖြေကြားထားသည်။

ယမန်နှစ် ၂၀၂၄ ဧပြီလအတွင်း ကွတ်ခိုင်မြို့နယ် TNLA အုပ်ချုပ်ရေးအဖွဲ့မှ KIA ဆက်ဆံရေးရုံး တာဝန်ရှိသူများကို နှစ်ကြိမ်တိုင်တိုင် လာရောက်တွေ့ဆုံပြီး မြို့ပေါ်မှ ထွက်ခွာသွားရန် ပြောဆိုခဲ့ကြောင်း ဒေသခံများထံမှ သိရသည်။

TNLA ထိန်းချုပ်ထားသည့် မြို့များတွင် မည်သည့်လက်နက်ကိုင် အဖွဲ့အစည်းမဆို ရုံးဖွင့်လှစ် အခြေချလိုပါက TNLA တပ်ဖွဲ့ထံ စာတင်‌တောင်းဆိုရမည်ဟု TNLA ပြောရေးဆိုခွင့်ရှိသူ လွေးယေဦးက သျှမ်းသံတော်ဆင့်ကို ယမန်နှစ် ဧပြီလအတွင်း ဖြေကြားထားဖူးသည်။

အလားတူ ယမန်နှစ် ၂၀၂၄ မေလ အတွင်းကလည်း နမ့်ခမ်းမြို့နယ် ရွှေလီမြစ်ကမ်းဘေးရှိ ကျေးရွာများတွင် တပ်စွဲထားသည့် SSPP တပ်သားများကို TNLA ဘက်မှ ကားတင်ခေါ်ဆောင်ကာ မူဆယ်မြို့ဘက်သို့ ယာဉ်တန်းဖြင့် ပို့ဆောင်ခဲ့သည်။

ပုံစာ – ကွတ်ခိုင် KIA ဆက်ဆံရေးရုံးနှင့် နားနေဆောင်သို့ TNLA တပ်သားများ ဝင်ရောက်လာစဉ်