ပအိုဝ်း ပြည်သူ့စစ် (PNO ) အထူးဒေသ (၆) အဖြစ်သတ်မှတ်ထားသည့် သျှမ်းပြည်တောင်ပိုင်း၊ ဆီဆိုင်မြို့နယ်၊ ပင်လောင်းမြို့နယ်နှင့် ဟိုပုံးမြို့နယ် အတွင်းသို့ ဖြတ်သန်းသွားလာမည့် လိုင်စင်မဲ့ ကားများကို ဖမ်းဆီးမည်ဟု PNO က ထုတ်ပြန်ကြေညာခဲ့သည်။

ထိုထုတ်ပြန်ချက်သည် မတ် ၄ရက်စွဲဖြင့် ထုတ်ပြန်ခဲ့ပြီး လိုင်စင်မဲ့ ကားနှင့် ဆိုင်ကယ်များသည် PNOထိန်းချုပ်ထားသည့် အထူးဒေသ (၆)အတွင်း ဖြတ်သန်းသွားလာမည်ဆိုလျှင် ဖမ်းဆီးထိန်းသိမ်းမည် ဖြစ်ပြီး PNOဘက်မှ တာဝန်ယူဖြေရှင်း ဆောင်ရွက်ပေးမည်မဟုတ်ကြောင်း အသိပေးထုတ်ပြန်လာသည်။

PNOထိန်းချုပ်ဒေသအတွင်း ကားနှင့်ဆိုင်ကယ်များကို ဆက်ကြေး (အခွန်)ဆောင်ထားသော်လည်း ယခုကဲ့သို့ ဖမ်းဆီးမည်ဆိုသောကြောင့် ဒေသခံများအနေဖြင့် အခက်ကြုံတွေ့နေရသည်ဟု ဟိုပုံးဒေသခံ အမျိုးသားတစ်ဦးက ပြောသည်။

“ဆက်ကြေးဆိုလည်း လတိုင်းထည့်ပေးနေတာကို အခုလည်း လိုင်စင်မရှိတာ ဖမ်းအုံးမယ်ဆိုတော့ ကျနော်တို့ ပြည်သူတွေပဲ ဒုက္ခရောက်ပြီးရင်း ရောက်နေရတာ။ ကျနော်တို့ အခွန်ဆောင်တာနဲ့ မလုံလောက်သေးဘူးလားလို့ PNOကို မေးချင်တယ်။ အခွန်ဆောင်ထားကြောင်း ကတ်လည်းရှိတာကို မလုံလောက်သေးတော့ ဖမ်းတာထင်တယ်။” ဟု၎င်းအမျိုးသာားတစ်ဦးက ပြောသည်။

ထို့အပြင် ယခုကဲ့သို့ ထုတ်ပြန်လာခြင်းမှာ စစ်အသုံးစရိတ်အတွက် အခွန်တိုးကောက်လို၍ ထုတ်ပြန်ထားခြင်း ဖြစ်နိုင်ကြောင်းနှင့် တဘက်တွင်လည်း ကားများကို ချောဆွဲ အသုံးပြုလိုသောကြောင့် ဖမ်းခြင်းဖြစ်နိုင်ကောင်း ၎င်းက ထပ်လောင်းပြောသည်။

လိုင်စင်မဲ့ ကားများသည် ဈေးသက်သာမှုကြောင့် ပြည်သူများ၏ ဝင်ငွေနှင့် ကိုက်ညီ၍ ဝယ်စီးကြပြီး လိုင်စင်မလုပ်ရခြင်းမှာ ဝယ်ထားသည့် ကားဈေးထက် နှစ်ဆ ပို၍ကုန်ကျကာ အချိန်ကြာမြင့်စွာ လုပ်ဆောင်ရသောကြောင့် လိုင်စင်များမလုပ်ကြခြင်းဖြစ်သည်ဟု လိုင်းစင်မဲ့ ကားပိုင်ရှင်အမျိုးသားတစ်ဦးက ပြောသည်။

အလားတူ တောင်ကြီးမြို့တွင်လည်း လိုင်စင်မဲ့ ကားနှင့်ဆိုင်ကယ်များကို ယာဉ်ထိန်းရဲများက စတင်ဖမ်းဆီးနေပြီး ပိုက်ဆံဖြင့် လိုက်ရွေးခွင့်မရဘဲ အပြီးပိုင် သိမ်းဆည်းလိုက်သည်ဟု မြို့ခံများက ပြောသည်။

“ဒီနေ့ (မတ်လ ၇) ရက်ဆို အရမ်းဖမ်းနေပြီ။ ဘယ်လမ်းကမှ မလွတ်လောက်အောင်ပဲ ဖမ်းနေတာ။ ဆိုင်ကယ်တော်တော်များများ ပါကုန်ကြပြီ။ ကားတွေလည်း ဖမ်းသွားတာမြင်တယ်။ အရင်လို ပိုက်ဆံနဲ့ လိုက်ရွေးလို့မရတော့ဘူး။ သူတို့လုံးဝ သိမ်းလိုက်ပြီ။” ဟု မြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့ကဲ့သို့ အဖမ်းဆီးများနေသောကြောင့် မြို့ခံများအနေဖြင့် လိုင်စင်မဲ့ ကား၊ဆိုင်ကယ်များဖြင့် အသွားလာ မလုပ်ကြဖို့နှင့် သွားလာရေးတွင် သတိဝီရိယဖြင့် သွားလာစေလိုကြောင်း ၎င်းက အကြံပြုပြောဆိုထားသည်။

လိုင်စင်မဲ့ ကားနှင့် ဆိုင်ကယ်များကို အဖမ်းအဆီးများလာချိန် ကားပိုင်ရှင်အချို့သည် ရသည့်ဈေးနှင့် ရောင်းထုတ်နေကြပြီး ရလာသည့် ပိုက်ဆံများကို အရင်းနှီးများ လုပ်ထားကြသည်ဟု သိရသည်။

ယခုကဲ့သို့ PNOထိန်းချုပ်နယ်မြေအတွင်း လိုင်စင်မဲ့ ကားနှင့် ဆိုင်ကယ် ဖမ်းဆီးနေခြင်းသည် ပထမဆုံးအကြိမ်ဖြစ်ပြီး၊ ကျေးရွာအတွင်းထိ လာရောက်ဖမ်းဆီးမှုများလုပ်လာနိုင်ကြောင်း ပင်လောင်းဒေသခံအမျိုးသားတစ်ဦးက ပြောသည်။

ပြီးခဲ့သည့် ၂၀၂၄ ခုနှစ် ဒီဇင်ဘာလ (၂၃)ရက်တွင်လည်း တောင်ကြီးမြို့တွင်း လိုင်စင်မဲ့ကားနှင့် ဆိုင်ကယ်များကို ဖမ်းဆီးခဲ့ပြီး ဆိုင်ကယ်များကို ကျပ်(သိန်း ၂၀) ဒဏ်ငွေဆောင်ခိုင်းပြီး ကားများကို သျှမ်းမြောက်သို့ ပို့ဆောင်လိုက်သည်။