သျှမ်းပြည်မြောက်ပိုင်း နောင်ချိုမြို့နယ်တွင် နေထိုင်သည့် စစ်ရှောင်များသည် ဝမ်းရေးအတွက် ကြံခုတ်ပြီး ဝမ်းရေးဖြေရှင်းနေရပြီး လက်ရှိတွင် စစ်ကောင်စီနှင့် TNLA ပူပေါင်းတပ်ဖွဲ့တို့အကြား တိုက်ပွဲ ဆက်လက် ပြင်းထန်မှုကြောင့် ရပ်နားထားရကြောင်း သတင်းရရှိသည်။

“၁၀၂၇ စစ်ဆင်ရေး” ဒုတိယပိုင်း ၂၀၂၄ ခုနစ် ဇူလိုင်လတွင် တအာင်း(ပလောင်)အမျိုးသားလွတ်မြောက်ရေးတပ်မတော် (TNLA )နှင့် မဟာမိတ်ပူးပေါင်းအဖွဲ့တို့သည် နောင်ချိုမြို့ကို သိမ်းပိုက်ခဲ့ပြီး၊ နောင်ချိုမြို့နှင့် မိုင် ၂၀ ကျော်အကွာရှိသည့် တောင်းခမ်းအခြေစိုက် စစ်ကောင်စီ အမြောက်တပ်များကို ထိုးစစ်ဆင် တိုက်ခိုက်လာခဲ့သည်မှာ ၈ လ ကျော်ကြာလာခဲ့သည်။

ထိုတိုက်ပွဲများကြောင့် နောင်ချိုမြို့ပေါ် ပြည်သူများနှင့် တောင်းခမ်းကျေးရွာ၊ အုမ္မသီး၊ အုမ္မခါးလမ်းခွဲ နှင့် ကန့်ကော်ကျေးရွာ ဒေသခံများသည် ဘေးလွတ်ရာသို့ ထွက်ပြေးတိမ်းရှောင်လာခဲ့ကြသည်။

ထိုစစ်ရှောင်များသည် လရှည်ကြာလာသည့်အလျှောက် ဝမ်းရေးအတွက် ပြောင်းခြံ၊ ကြံခင်းနှင့် လယ်ယာခြံများတွင် နေ့စားလိုက် အလုပ်လုပ်ကြသည်။

ပြီးခဲ့သည့် ဖေဖော်ဝါရီ ၁၆ ရက်တွင်လည်း တရုတ်နိုင်ငံ၏ ကြားဝင်စေ့စပ်ပေးမှုကြောင့် စစ်ကောင်စီနှင့် TNLA တပ်ဖွဲ့တို့သည် တရုတ်နိုင်ငံ ကူမင်းမြို့တွင် တွေ့ဆုံခဲ့သော်လည်း သဘောတူညီချက် တစ်စုံတစ်ရာ မရရှိခဲ့ဘဲ ပြီးဆုံးခဲ့ပြီးနောက် စစ်ကောင်စီတပ်သည် TNLA ထိန်းချုပ်ဒေသ ကို အပြင်းအထန် ပြန်လည်ထိုးစစ်ဆင် ဗုံးကြဲတိုက်ခိုက်ခဲ့ပြီး နောင်ချိုမြိုနယ် တောင်းခမ်းရွာကိုလည်း အင်အားထပ်မံဖြည့်ခဲ့သည်။

ထို့ကြောင့် နောင်ချိုမြို့နယ်အတွင်း စစ်ရေးတကျော့ပြန် ပြင်းထန်လာကာ ကြံခုတ်ခြင်း၊ လယ်ယာခြံ နေ့စားလိုက်သည့် စစ်ဘေးရှောင်များလည်း အလုပ်လက်မဲ့ ပြန်ဖြစ်သွားပြီး ဆေးဝါးနှင့် စားဝတ်နေရေး အတွက် စိုးရိမ်မှုဖြစ်နေကြာင်း စစ်ရှောင်အမျိုးသမီး တစ်ဦးက သျှမ်းသံတော်ဆင့်ကိုပြောသည်။

တိုက်ပွဲသံ၊ လက်နက်ကြီးပစ်ခတ်သံ မကြားသည့်အချိန်တွင် နောင်ချိုစစ်ရှောင်များသည် နီးစပ်ရာ ကြံခင်းသို့ သွားကာ ကြံပင် တစ်ပင်လျှင် ၁၅ ကျပ်နှုန်းဖြင့် နေ့စားလိုက်နေရပြီး၊ တစ်ရက်လျှင် ဝင်ငွေ နှစ်သောင်းကျပ် ရရှိကြောင်း စစ်ရှောင်အမျိုးသမီး က ပြောသည်။

“တိုက်ပွဲအသံကို နားထောင်ပြီး သွားရတာ။ အခုက ပစ်နေတော့ လုံခြုံတဲ့နေရာမှာ ရှောင်နေရတယ်။ အခုထိတော့ ပစ်နေတုန်းဆိုတော့ ကြံခုတ်တာလည်း နားထားရတယ်”ဟု ၎င်းကဆိုသည်။

နောင်ချိုမြို့နယ်အတွင်း စစ်ကောင်စီသည် လက်နက်ကြီးဖြင့် အဆက်မပြတ် ပစ်ခတ်မှုကြောင့် ယမန်နေ့ (မတ် ၅ ရက်) နေ့လယ်ပိုင်းတွင်လည်း အုမ္မသီးလမ်းခွဲ နမ့်ခေးလုံကျေးရွာအတွင်းသို့ ကျကာ နေအိမ် ၃လုံးထက်မနည်း မီးလောင်ပျက်စီးခဲ့သည်။

အလားတူ ဖေဖော်ဝါရီ ၂၃ ရက်တွင်လည်း နောင်ချိုမြို့နယ် တောင်းခမ်းဒေသရှိ တောင်ရှည်ရွာနှင့် မန်မော်ရွာကြား စစ်ကောင်စီတပ်နှင့် TNLA တို့ တိုက်ပွဲပြင်းထန်ခဲ့ရာ စစ်ကောင်စီဘက်မှ အဆိပ်ငွေ့ဗုံး အသုံးပြုတိုက်ခိုက်ခဲ့ခြင်းကြောင့် TNLA တပ်သား (၁၀) ဦး ထိခိုက်ဒဏ်ရာရပြီး (၄) ဦး ဒဏ်ရာပြင်းထန်ကြောင်း သိရသည်။

ထို့ကဲ့သို့ တိုက်ပွဲပြင်းထန်နေခြင်းကြောင့် ကြံခုတ်သည့် အလုပ်ကို ရပ်နားရကာ နေ့စားလုပ်သူများလည်း ဝင်ငွေဆုံးရှုံးပြီး ကြံခြံပိုင်ရှင်များလည်း ဧက ထောင်ပေါင်းများစွာ ဆုံးရှုံးနေရကြောင်း စစ်ရှောင် အမျိုးသားတစ်ဦးက ပြောသည်။

“တိုက်ပွဲကြောင့် ကြံခုတ်တဲ့ နေ့စားလုပ်သူလည်း နားရသလို ခြံပိုင်ရှင်လည်း အကုန်ဆုံးရှုံးတယ်။ ပိုက်ဆံရှိတဲ့သူတွေတော့ မြို့ပေါ်တက်နေ၊ နေ့စားအလုပ်လုပ်တဲ့ ကျနော်တို့ကတော့ နီးစပ်ရာ လွတ်မယ်ထင်တဲ့နေရာပြေး၊ ဝမ်းရေးရှာမတော့ အခက်တော့ကြုံတယ်” ဟု ၎င်းအမျိုးသားက ဆိုပြန်သည်။

တိုက်ပွဲဖြစ်နေသော်လည်း စစ်ရှောင်များအတွက် အစားအသောက် ကူညီပေးမည့်သူများ မရှိသည့်အတွက် လက်ရှိတွင် ဝမ်းရေးကို ကိုယ်ထူကိုယ်ထဖြေရှင်းနေရသည်။

“အလုပ်က မရှိပေမယ့် စားဖို့ကလည်း ကိုယ့်ဘာသာကိုယ်စီစဉ်ရတော့ ကြံမခုတ်ရရင်တော့ ရှိတဲ့သူဆီက ချေးငှားစားသောက်ရတာပေါ့။ တနေ့ကို မိသားစု ကုန်ကျတာက တစ်သောင်းခွဲကျော် ရှိနေပြီ” ဟု စစ်ရှောင်အမျိုးသမီး က ထပ်လောင်းပြောသည်။

တရုတ်နိုင်ငံ ကူမင်းမြို့တွင် ပြုလုပ်ခဲ့သည့် စစ်ကောင်စီနှင့် TNLA နှစ်ဘက်တွေ့ဆုံဆွေးနွေးမှု မအောင်မြင်ခဲ့ဘဲ စစ်ကောင်စီဘက်မှ TNLA ထိန်းချုပ်နယ်မြေထဲ လက်နက်ကြီးနှင့် လေကြောင်း ပစ်ခတ် တိုက်ခိုက်မှု ကြောင့် တစ်လအတွင်း ပြည်သူလူထု (၁၃)ဦး သေဆုံးခဲ့ပြီး၊ (၃၆) ဦး ထိခိုက်ဒဏ်ရာ ရရှိခဲ့ကြောင်း မတ်လ ၁ ရက်နေ့တွင် TNLA မှ ထုတ်ပြန်ထားသည်။