သျှမ်းပြည် ‌ညောင်ရွှေမြို့နယ် စံကားဒေသတွင် ပအိုဝ်းပြည်သူ့စစ် (PNO)မှ ဒေသခံများထံ ဆက်ကြေးအခွန်များ ထပ်မံကောက်ခံ နေကြောင်း စုံစမ်းသိရသည်။

ယခုနှစ် ၂၀၂၅ မတ်လမှ စတင်ပြီး စံကားဒေသရှိ ပြည်သူများထံ ကားရှိသော အိမ်များကို စစ်ကောင်စီလက်အောက်ခံ ပအိုဝ်းပြည်သူ့စစ် (PNO)က ဆက်ကြေး အခွန်များ ထပ်မံကောက်ခံနေကြောင်း အသက် ၄၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဒီလကနေ စပြီးကောက်နေတာ။ ကားကြီး၊ကားသေး၊ ထော်လာဂျီကအစ အကုန် ကောက်နေတာ။ ကားပေါ်မူတည်ပြီး ထည့်ပေးနေရတာ။ စစ်ရှောင်တွေကိုတော့ မကောက်ပါဘူး”ဟု အသက် ၄၀ ဝန်းကျင် ၎င်းဒေသခံ အမျိုးသမီးက ပြောသည်။

လက်ရှိ PNO ကောက်ခံနေသည့် ဆက်ကြေးစျေးနှုန်းများမှာ ယာဉ်ငယ်ဖြစ်ပါက ကျပ်ငွေ ၅သောင်းမှ ၁ သိန်းထိ ပေးဆောင်ရပြီး၊ ယာဉ်ကြီးတစ်စီးလျှင် ကျပ်ငွေ ၅ သိန်းအထိ ပေးဆောင်နေရကြောင်း ၎င်းက ဆက်ပြောသည်။

စစ်ကောင်စီလက်အောက်ခံ ပအိုဝ်းပြည်သူ့စစ် PNO တပ်ဖွဲ့သည် ကား ကြီး/သေး၊ ထော်လာဂျီ အခွန်ငွေများ ကောက်ယူသည့်အပြင် PNO ၏ စစ်သားများအတွက် ငွေကြေးများလည်း ကောက်ယူခြင်း၊ စစ်မှုထမ်းလူဦးရေ ကောက်ယူခြင်းတို့ကိုလည်း ပြုလုပ်လေ့ရှိကြောင်း သိရသည်။

PNO တပ်ဖွဲ့မှ ၂၀၂၄ သြဂုတ်လတွင် စစ်အင်အားပြပြီးနောက် ၎င်းတို့လှုပ်ရှားသည့် ဟိုပုံးမြို့နယ်၊ ဆီဆိုင်မြို့နယ်၊ ညောင်ရွှေမြို့နယ်၊ ပင်လောင်းမြို့နယ်တို့တွင် ဒေသခံများထံမှ အကြောင်းအမျိုးမျိုးပြ၍ ဆက်ကြေး ကောက်ခံမှုများပြုလုပ် နေခဲ့သည်။

စစ်ကောင်စီလက်အောက်ခံ PNO ပြည်သူ့စစ်အဖွဲ့သည် မြန်မာပြည်အတွင်းရှိ ဟိုတယ်လုပ်ငန်း၊ စတီးလ် လုပ်ငန်း၊ ဝိုင် နှင့် ဘိလပ်မြေလုပ်ငန်း၊ ကျောက်စိမ်းတူးဖော်ရေးလုပ်ငန်း၊ ပတ္တမြားနှင့် ကျောက်မျက် ရတနာလုပ်ငန်း၊ ရွှေ၊ ခနောက်စိမ်း ခဲမဖြူ၊ အဖြိုက်နက် အပြင် အိမ်ခြံမြေလုပ်ငန်းများ စသည့် ပိုင်ဆိုင်မှုများစွာ ရှိနေကြောင်း သိရသည်။