သျှမ်းပြည် မန်တုံမြို့နယ်တွင် ကချင်လွတ်လပ်ရေးတပ် KIA နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့အကြား ဖြစ်ပွားနေသည့် မြေပြင်ပဋိပက္ခကို ထိန်းသိမ်း ဆောင်ရွက်သွားရန် TNLA စစ်ဦးစီးချုပ်က ပြောဆိုလိုက်သည်။

ဖေဖော်ဝါရီလ (၂၈) ရက်တွင် မန်တုံမြို့၌ ကျင်းပခဲ့သည့် လူထုတွေ့ဆုံပွဲသို့ TNLA စစ်ဦးစီးချုပ် ဗိုလ်ချုပ်တားဟိုပလန် သွားရောက်ကာ TNLA နှင့် KIA အကြား မြေပြင်ပွတ်တိုက်မှုများ၊ ပဋိပက္ခ တင်းမာမှုများ ဆက်လက်မကြီးထွားစေရန် ထိန်းထိန်းသိမ်းသိမ်း ဆောင်ရွက်သွားရမည်ဟု တိုက်တွန်းပြောဆိုခဲ့ကြောင်း TNLA သတင်းနှင့် ပြန်ကြားရေးဌာနမှ ယမန်နေ့ (မတ် ၁ ရက်) တွင် ထုတ်ပြန်ခဲ့သည်။

မဟာမိတ်နှစ်ဖွဲ့အကြား အပြန်အလှန် အသိအမှတ်ပြုရန်နှင့် မဟာမိတ် တည်တံ့ခိုင်မြဲရန် နှစ်ဘက်တပ်များ ပူးပေါင်းဆောင်ရွက်သွားရမည့် အချိန်ဖြစ်ပြီး မလိုလားအပ်သော ပြဿနာများ မဖြစ်ပွားလာစေရန် မဟာမိတ် နှစ်ဘက်စလုံးမှ သတိထား ဆောင်ရွက်ရန်၊ လက်ရှိတင်းမာမှုများကိုလည်း ညှိနှိုင်းဖြေရှင်းရမည်ဟု TNLA စစ်ဦးစီးချုပ်က ပြောဆိုခဲ့ကြောင်း ထုတ်ပြန်ချက်အရ သိရသည်။

“မန်တုံဖြစ်စဉ် အဆက်ကတော့ စိုးရိမ်ရပါတယ်။ လူမျိုးရေး ပဋိပက္ခဆိုတာထက် ဖြေရှင်းနည်း မမှန်တာ၊ သို့မဟုတ် စိတ်လိုက်မာန်ပါ ဖြစ်လာရင်တော့ စိုးရိမ်ရပါတယ်။ အခုလောလောဆယ် စစ်ရေးအင်အားကြီးလာတဲ့ အပေါ်မှာ သူတို့ခံစားချက်ကို မူတည်ပြီးတော့မှ တုံ့ပြန်ချင်တဲ့ဟာမျိုး၊ ဒါတွေကတော့ အဓိကဖြစ်မယ်လို့ထင်တယ်”ဟု နိုင်ငံရေး တက်ကြွလှုပ်ရှားသည့် ကချင်လူငယ်တစ်ဦးက သျှမ်းသံတော်ဆင့်ကို ပြောသည်။

အလားတူ KIA နှင့် TNLA အကြား အောက်ခြေတပ်သားအချင်းချင်း မြေပြင်တွင် ပဋိပက္ခ ဖြစ်ပွားနေသည်ကို KIO/KIA ဥက္ကဋ္ဌ ဗိုလ်ချုပ်ကြီး အန်ဘန်လ၏ “လက်နက်ပစ်ဖောက် ဖြေရှင်းနည်းကို လုံးဝ မလုပ်ကြရန်” ညွှန်ကြားချက်အဖြစ် အထွေထွေအတွင်းရေးမှူး လက်မှတ်ထိုးကာ ဖေဖော်ဝါရီ (၂၈) ရက်တွင် ထုတ်ပြန်ခဲ့သည်။

“အခုချိန်မှာ မန်တုံမှာ ဖြစ်သွားတဲ့ ကိစ္စဆိုရင်လည်း အားလုံးကတော့ ဒေါသထွက်ကြတာ၊ ဒီတိုင်းတော့ ပစ်ထားလို့ မရဘူး ဆိုတာမျိုးပေါ့။ ဒါပေမယ့် အများစုမှာတော့ လူကြီးတွေ စီမံလိမ့်မယ်ဆိုတာမျိုးပေါ့။ လူမျိုးရေး ပဋိပက္ခအထိတော့ မဖြစ်လောက်ဘူး၊ လူမှုအသိုင်းအဝိုင်းထဲမှာ ထိန်းကျောင်းမယ့်လူတွေက ရှိတယ်”ဟု ၎င်းကချင်လူငယ်က ဆက်ပြောသည်။

ပြီးခဲ့သည့် ဖေဖော်ဝါရီ (၂၃) ရက်မှ စတင်ပြီး မန်တုံမြို့နယ်ရှိ ကချင်လွတ်လပ်ရေးတပ် KIA တောင်ပိုင်းတိုင်း လက်အောက်ခံ တပ်ရင်းများမှ လောင်ကျယ်၊ ရောင်ကျိန်းနှင့် မန်ပန်ကျေးရွာတို့တွင် ဖွင့်လှစ်ထားသည့် ဂိတ်များကို TNLA တပ်သားများ လာရောက်ဖျက်ဆီးပြီး မောင်းထုတ်ခဲ့ကြောင်း သိရသည်။

အလားတူ ဖေဖော်ဝါရီ (၂၇) ရက် နေ့လယ်ပိုင်းတွင် မန်တုံမြို့နှင့် ၅ မိုင်ခန့်သာ ကွာဝေးသည့် မန်မောက်ကျေးရွာ KIA တိုက်နယ်ရုံးသို့ TNLA ဘက်မှ အင်အား(၃၀၀) ခန့်ဖြင့် ရောက်ရှိလာခဲ့ပြီး KIA တပ်ဖွဲ့ဝင်များကို ဝိုင်းဝန်းရိုက်နှက်ခဲ့ရာ KIA တပ်သား (၁၁) ဦး ထိခိုက်ဒဏ်ရာ အပြင်းအထန် ရရှိသွားခဲ့ပြီး ၎င်းတို့ကို TNLA ဘက်မှ မန်တုံဆေးရုံသို့ ခေါ်ဆောင်သွားခဲ့ကြောင်း KNG သတင်းဌာနတွင် ဖော်ပြသည်။

မန်တုံမြို့နယ်အတွင်း လက်ရှိပြဿနာ ဖြစ်ပွားနေသည့် နေရာအနီးတဝိုက်ရှိ KIA တပ်ခွဲရုံး၊ မြို့နယ်ရုံး၊ တိုက်နယ်ရုံးနှင့် ဂိတ်များကို မဖွင့်လှစ်ရန်၊ နေရာပြောင်းရွှေ့ရန် TNLA ဘက်က ပြောဆိုနေပြီး KIA တောင်ပိုင်းတိုင်း အထက်အရာရှိများနှင့် TNLA တွေ့ဆုံကာ ညှိနှိုင်းရမည့် အနေအထားဖြစ်ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက ဖေဖော်ဝါရီ (၂၅) ရက်တွင် သျှမ်းသံတော်ဆင့်ကို ဖြေကြားထားသည်။