သျှမ်းပြည်တောင်ပိုင်း၊ပင်လောင်းမြို့နယ် ကျေးရွာများတွင် ပအိုဝ်းပြည်သူစစ် PNOတပ်ထဲ ဝင်လျှင် လွတ်လပ်စွာ သွားလာခွင့်ရ၍ ဒေသခံများ PNOတပ်ထဲသို့ အများပြားးဝင်ရောက်နေကြသည်ဟု ဒေသခံများထံမှ သတင်းရရှိသည်။
ပင်လောင်းမြို့နယ်သည် PNO စိုးမိုးနယ်မြေတစ်ခု ဖြစ်ပြီး သျှမ်း-ကယား နယ်စပ်အပါဝင် နေပြည်တော်နှင့် နီးစပ်သည့်ဒေသတစ်ခုလည်း ဖြစ်သောကြောင့် စစ်ကောင်စီဂိတ်၊ PNOဂိတ်များလည်း အများအပြား စောင့်ကြပ်စစ်ဆေးသည့် နေရာဒေသလည်းဖြစ်သည်။
ထိုစစ်ဆေးရေးဂိတ်များကိုဖြတ်ကျော်ချိန် သာမာန်ပြည်သူတစ်ယောက်ဆိုလျှင် တင်းကြပ်စွာ စစ်ဆေးခံရခြင်း၊ ခြိမ်းခြောက် ငွေညှစ်ခြင်းများ ပြုလုပ်ပြီး PNO စစ်သားဆိုလျှင် လွတ်လပ်စွာ ဖြတ်သန်းသွားလာခွင့်ရ သောကြောင့် ဒေသခံများကိုယ်တိုင် PNOတပ်ထဲ ဝင်ရောက်နေကြသည်ဟု အမျိုးသားတစ်ဦးက ပြောသည်။
“PNOစစ်သားဆိုရင် သူတို့မစစ်ဘူး။ PNOစစ်ယူနီဖောင်း ဦးထုပ် ၊ အင်္ကျီတစ်ခုပါရင် ဂိတ်မှာ အေးဆေး ဖြတ်လို့ရတယ်။ ရွာနဲ့ဝေးတဲ့ ခြံတွေမှာ စိုက်ပျိုးရေးသွားလုပ်ရင် အေးဆေးသွားလာလို့ရတယ်။ စစ်တိုက်ချင်တာတွေ ဘာတွေတော့မရှိဘူး။ လွတ်လပ်သွားလာချင်လို့ ဝင်ကြတာ။” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် PNOတပ်ထဲ ဝင်ရောက်ရာတွင် ကိုယ်တိုင် ယူနီဖောင်းဝယ်ယူပြီး စစ်သင်တန်း (၅)ရက်မှ (၁၅) သင်တန်းများကို တက်ရောက်ကြရသည်ဟု အဆိုပါ ဒေသအမျိုးသားက ထပ်လောင်းပြောသည်။
PNOပြည်သူ့စစ်ထဲ ဝင်လျှင် စစ်ကောင်စီထံ စစ်မှုထမ်းစရာမလိုကြောင်း PNOမှ ပြောကြားထားပြီး ပအိုဝ်းပြည်သူများကို ကာကွယ်ရန် တပ်ထဲ ဝင်ကြရန် တိုက်တွန်းထားသည်ဟုလည်း သိရသည်။
ဆက်လက်ပြီး PNOက ပအိုဝ်းလူမျိုးများကို စစ်ဘောင်သွင်းနေပြီး ပြည်သူ့များက အသက်ကို လောင်းကြေးထပ်၍ တပ်ထဲ ဝင်ရောက်နေခြင်းဖြစ်သည်ဟု အသက် (၂၀)ကျော်အရွယ် အမျိုးသားတစ်ဦးက ပြောသည်။
“အခု PNOထဲ ဝင်တယ်ဆိုကတည်းက PNOအကြိုက်ပဲ။ နောင်တစ်ချိန်မှာ ဘာဖြစ်လာမလဲ တော့မသိဘဲ လွတ်လပ်သွားလာချင်ရုံ သက်သက် တပ်ထဲ ဝင်ကြတယ်။ အခုက PNOဆိုတာနဲ့ မျက်မုန်းကျိုးနေပြီ။ တိုက်ပွဲတွေ ဖြစ်လာရင်ပဲဖြစ်ဖြစ် ပြည်သူပဲ အထိနာတယ်။ PNOက ပြည်သူကို အသုံးချနေတာဖြစ်တယ်။” ဟု အဆိုပါ အမျိုးသားက ပြောသည်။
ယခုလက်ရှိ နွေဦးတော်လှန်ရေးတိုက်ပွဲတွင် စစ်ကောင်စီကို ဦးတည်တိုက်ခိုက်နေခြင်းဖြစ်ပြီး PNOကြောင့် ပအိုဝ်းပြည်သူများကိုပါ ဦးတည်တိုက်ခိုက်လာနိုင်သည်ဟု ၎င်းကထပ်လောင်းပြောသည်။
ပြီးခဲ့သည့် ၂၀၂၄ ခုနှစ် ဩဂုတ်လ (၂၁)ရက်နေ့တွင်လည်း ပင်လောင်းမြို့နယ် ရှိ အသက်(၁၈)နှစ်မှ (၄၀) အရွယ်များကို စစ်ယူနီဖောင်းဝတ်ဆင်ခိုင်းပြီး PNOမှ အင်အား တစ်သောင်းထုတ်ပြကာ လုံခြုံရေးကိစ္စများ ဆောင်ရွက်သွားမည်ဟု PNOမှ ပြောကြားခဲ့သည်။
Leave a Comments