သျှမ်း-ကရင်နီ တကြော လွိုင်ကော်မြို့၊ မိုးဗြဲမြို့နှင့် ဖယ်ခုံမြို့ တို့ကို စစ်ကောင်စီက လက်နက်ကြီး နှင့် လေကြောင်းဗုံးကြဲတိုက်ခိုက်မှုများ နေ့စဉ်ပြုလုပ်နေကြောင်း စုံစမ်းသိရသည်။
ယခု ဖေဖော်ဝါရီလ၏ တတိယပတ် အတွင်းတွင် ဖယ်ခုံမြို့အခြေစိုက် စစ်ကောင်စီတပ်၏ ခြေမြန်တပ်ရင်း ခမရ-၃၃၆ တပ်ရင်း က လက်နက်ကြီးဖြင့် မိုးဗြဲမြို့ထဲသို့ ပစ်ခတ်မှုများ ပြုလုပ်နေကြောင်း အသက် ၄၀ ဝန်းကျင် ဖယ်ခုံမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဖယ်ခုံမြို့ထဲကနေ မိုးဗြဲဘက်ကို နေ့တိုင်း ပစ်နေတာပဲ ။ မနေ့ က ညထိကို ပစ်နေတာ။ ဒီမနက်ပိုင်းမှာတော့ ငြိမ်နေတယ်။ လက်နက်ကြီး အသံကတော့ နေ့တိုင်းပဲ။ မိုးဗြဲမြို့ရဲ့ ထိတွေ့ တိုက်ပွဲဖြစ်တဲ့ နေရာကို ပစ်တာပေါ့။ လေယာဉ်ကလည်း နေ့တိုင်းလာတယ် နေတိုင်းကြဲတယ် ဒီရက်ပိုင်းက နေ့တိုင်းကို လာတယ်”ဟု ၎င်းကပြောသည်။
မိုးဗြဲမြို့အတွင်းကို စစ်ကောင်စီက လက်နက်ကြီးအပြင် လေကြောင်း ဒရုန်းများဖြင့် မီးလောင်ဗုံး၊ အဆိပ်ဗုံးများပါ အသုံးပြု တိုက်ခိုက်ခဲ့ပြီး စစ်ကောင်စီတပ်နှင့် ကရင်နီတော်လှန်ရေးတပ်ဖွဲ့တို့ ထိတွေ့ တိုက်ပွဲများ နေ့စဉ်ဖြစ်ပွားနေကြောင်း မိုးဗြဲမြို့တွင်းရှိ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ဆက်ပြောသည်။
“မိုးဗြဲမြောက်ဘက်ကိုလည်း ဒီရက်ပိုင်းက လေယာဉ်တွေနဲ့လည်း လာကြဲတယ်။ ထိတွေ့တိုက်ပွဲက နေ့တိုင်းကို ပစ်နေတယ်။ မိုးဗြဲမြို့မှာရှိတဲ့ ခမရ – ၄၂၂ အနီးတဝိုက်ကို ထိတွေ့တိုက်ပွဲဖြစ် နေတာပေါ့။လက်ရှိမှာလည်း မိုးဗြဲမြို့သွားလာတဲ့ လမ်းတွေကိုလည်း ပိတ်ထားတယ်”ဟု ၎င်းကပြောသည်။
၂၀၂၅ ခုနှစ် ဖေဖော်ဝါရီလဆန်းပိုင်းတွင် တိုက်ပွဲများပြန်လည် စတင်ခဲ့ပြီး မိုးဗြဲမြို့ကို ထိုးစစ်ဆင်နေသည့် စစ်ကောင်စီတပ်နဲ့ ကရင်နီအမျိုးသား ကာကွယ်ရေးတပ် (KNDF) ၊ တော်လှန်ရေးပူးပေါင်းတပ်တို့ နေ့စဉ်နီးပါး တိုက်ပွဲဖြစ်ပွား နေကြောင်း သိရသည်။
ထိုကြောင့် မိုးဗြဲမြို့အတွင်းသို့ ပြည်သူများ ဖြတ်သန်းသွားလာမှုကို ဖေဖော်ဝါရီ (၂၄) ရက် မှ (၂၈) ရက်ထိ ခေတ္တပိတ်ထားကြောင်း မိုးဗြဲပြည်သူ့ ကာကွယ်ရေးတပ် တပ်ရင်းအမှတ် (၁၀၀၁) နှင့် ကရင်နီ အမျိုးသားများကာကွယ်ရေးတပ်ရင်း အမှတ် (၃)တို့က ထုတ်ပြန်ခဲ့သည်။
Leave a Comments