ထိုင်းနိုင်ငံ မယ်ဟောင်ဆောင်ခရိုင် Pai မြို့တွင် နိုင်ငံခြားသား ၇ ဦးကို စည်းကမ်းဖောက်ဖျက်မှုဖြင့် ရဲတပ်ဖွဲ့က ဖမ်းဆီးဒဏ်ရိုက်ခဲ့ကြောင်း ထိုင်းသတင်းဌာနတွင် ဖော်ပြသည်။
ဖေဖော်ဝါရီလ ၂၄ ရက် ညနေပိုင်းအချိန်တွင် Pai ရဲစခန်းမှ ကွပ်ကဲရေးမှူး ဒုတိယရဲမှူးကြီးနှင့် စစ်ဆေးရေးအရာရှိများက ဒေသအတွင်း ကွင်းဆင်းစစ်ဆေးခဲ့ရာ အများပြည်သူပိုင် လမ်းမပေါ်မှာ ဆေးခြောက်သောက်သုံးနေသည့် နိုင်ငံခြားသား ခရီးသွား ၇ ဦး ဖမ်းဆီးစစ်ဆေးခဲ့ကြောင်း ဖော်ပြသည်။
အများပြည်သူပိုင် နေရာများတွင် ဆေးခြောက်သောက်ခြင်းကြောင့် အဆိုပါနိုင်ငံခြားသား ခရီးသွား ၇ ဦးကို စည်းကမ်းဖောက်ဖျက်မှုဖြင့် ဖမ်းဆီးဒဏ်ရိုက်ခဲ့ကြောင်း ဆိုသည်။
ထိုင်းဥပဒေအရ အများပြည်သူပိုင် နေရာများတွင် ဆေးခြောက်သောက်ခြင်း၊ ဖွာခြင်းတွေ့ရှိပါက ရဲတပ်ဖွဲ့များက စစ်ဆေးပိုင်ခွင့်ရှိသည်။
အများပြည်သူပိုင် နေရာများ၊ စားသောက်ဆိုင်များ၊ ကားဂိတ်များတွင် ဆေးခြောက်သောက်ခြင်း စစ်ဆေးတွေ့ရှိပါက ထောင်ဒဏ် ၃ လ (သို့မဟုတ်) ဒဏ်ငွေ ဘတ် ၁၀,၀၀၀ ချမှတ်ခံရမည်ဖြစ်သည်။
သတ်မှတ်ထားသော ဆေးခြောက်အလေးချိန် ပမာဏ (၃၀ ဂရမ်) ထက် စစ်ဆေးတွေ့ရှိပါကဒဏ်ငွေ ဘတ် ၅၀,၀၀၀ ဖြစ်စေ (သို့မဟုတ်) ထောင်ဒဏ် ၅ နှစ် ဖြစ်စေ ထောင်ဒဏ်နှင့် ဒဏ်ငွေပါ ၂ မျိုးစလုံးချမှတ်နိုင်သည်။
ထို့ပြင် ဆေးခြောက်များအား တရားမဝင် ရောင်းဝယ်ခြင်း၊ ဖြန့်ဖြူးခြင်း ပြုလုပ်နေကြောင်း စစ်ဆေးတွေ့ရှိပါက ဒဏ်ငွေ ၁၅ သိန်း (သို့မဟုတ်) ထောင်ဒဏ် ၁၅ နှစ် ချမှတ်နိုင်ပြီး ပိုင်ဆိုင်မှုများပါ သိမ်းဆည်းခံရမည် ဖြစ်သည်။ ဆေးခြောက်များအား တရားမဝင် စိုက်ပျိုးထားပါကလည်း ဒဏ်ငွေ ၇ သိန်း၊ ထောင်ဒဏ် ၇ နှစ်ချမှန်ခံရမည် ဖြစ်သည်။
ထိုကြောင့် ထိုင်းရောက်မြန်မာနိုင်ငံသားများအနေဖြင့်လည်း အများပြည်သူပိုင် နေရာများတွင် ဆေးလိပ်သောက်ခြင်း၊ ဆေးခြောက်သောက်ခြင်း မပြုလုပ်ရန် သတိပေးအပ်ပါသည်။
Leave a Comments