သျှမ်းပြည် နောင်ချိုမြို့နယ် တောင်းခမ်းဒေသရှိ (၃၅၄) အမြောက်တပ်ရင်းထဲသို့ လက်နက်ကြီး ကျရောက်ပေါက်ကွဲမှုကြောင့် စစ်ကောင်စီ လက်နက်တိုက် မီးလောင်ပေါက်ကွဲခဲ့ကြောင်း စုံစမ်းသိရသည်။
ယနေ့ (ဖေဖော်ဝါရီ ၂၅ ရက်) နံနက်ပိုင်းမှ စတင်ပြီး နောင်ချိုမြို့နယ် တောင်းခမ်းဒေသရှိ စစ်ကောင်စီ အမြောက်တပ်ရင်းဌာနချုပ်ကို တအာင်း(ပလောင်) အမျိုးသားလွတ်မြောက်ရေး တပ်မတော် TNLA မှ အပြင်းအထန် ထိုးစစ်ဆင် တိုက်ခိုက်ခဲ့သည်။
ယနေ့ နေ့လယ်ပိုင်းတွင် (၃၅၄) အမြောက်တပ်ရင်းထဲသို့ TNLA မှ ပစ်ခတ်သည့် လက်နက်ကြီး ကျရောက်ပေါက်ကွဲခြင်းကြောင့် မီးခိုးလိပ်များ ထောင်တက်ကာ စစ်ကောင်စီ လက်နက်တိုက် မီးလောင်ပေါက်ကွဲခြင်း ဖြစ်နိုင်ကြောင်း ဒေသခံများက ပြောဆိုသည်။
“မနက်အစောကြီး လက်နက်သံ စထွက်နေပြီ၊ တနေကုန် တိုက်ပွဲပြင်းတယ်။ နေ့လယ်ပိုင်းကျတော့ တောင်ရှည်ဘက်က (၃၅၄) တပ်ထဲ လက်နက်ကြီးကျလို့ မီးခိုးတွေ မှိုင်းလုံးကြီးလိုမျိုး အလိပ်လိုက် တက်လာတာ၊ လက်နက်တိုက်ပေါ် ကျလို့ အကြီးအကျယ် မီးလောင်တာဖြစ်မှာ။ တောင်းခမ်း ကျသွားရင်တော့ ကျောက်မဲ၊ သီပေါဘက် စစ်လေယာဉ် ပိုသတိထားရမယ်”ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ ယမန်နေ့ (ဖေဖော်ဝါရီ ၂၄ ရက်) တွင် စစ်ကောင်စီတပ်မှ နောင်ချိုနှင့် ပြင်ဦးလွင်အကြား အုမ္မသီးလမ်းခွဲကျေးရွာကို လက်နက်ကြီး ပစ်ခတ်ခြင်း၊ တိုက်လေယာဉ်ဖြင့် ဗုံးကြဲတိုက်ခိုက်ခဲ့ခြင်းကြောင့် ပြည်သူနေအိမ် ထပ်မံပျက်စီးခဲ့သည်။
ထို့အပြင် နောင်ချိုမြို့နယ် ဘန့်ဘွေးရွာ အခြေစိုက် စစ်ကောင်စီတပ်မှ နေ့ညမရွေး ဒရုန်းပျံသန်းကာ TNLA နှင့် PDF ပူးပေါင်းတပ်ဖွဲ့များ၏ လှုပ်ရှားမှုကို စုံစမ်းထောက်လှမ်းနေကြောင်း စစ်ရေးသတင်းရင်းမြစ်တစ်ဦးက ပြောသည်။
“အခုတိုက်ပွဲက စစ်ကောင်စီဘက် ဒရုန်းတွေ တော်တော်လေး သုံးလာတယ်။ ဒီဘက်ကို လွှတ်တဲ့ ဒရုန်းတွေက ဘန့်ဘွေးက တက်လာတာလား ဒါမှမဟုတ် ပြင်ဦးလွင်ကလား သေချာမသိသေးဘူး။ ရှေ့ရက်က တောင်ရှည်မှာ အဆိပ်ငွေ့ လွှတ်ခံရတာ တော်လှန်ရေးဘက်က ၈ ယောက် ကျတယ်လို့ ကြားတယ်၊ ကျန်တာ မူးလို့ လမ်းမလျှောက်နိုင်ဖြစ်လို့ ဆေးရုံခေါ်သွားတယ်”ဟု နောင်ချိုမြို့နယ်မှ စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။
ဖေဖော်ဝါရီ (၂၃) ရက် နေ့လယ်ပိုင်းတွင်လည်း နောင်ချိုမြို့နယ် တောင်းခမ်းဒေသရှိ တောင်ရှည်ရွာနှင့် မန်မော်ရွာကြား စစ်ကောင်စီတပ်နှင့် TNLA တို့ တိုက်ပွဲပြင်းထန်ခဲ့ရာ စစ်ကောင်စီဘက်မှ အဆိပ်ငွေ့ဗုံး အသုံးပြု တိုက်ခိုက်ခဲ့ခြင်းကြောင့် TNLA တပ်သား (၁၀) ဦး ထိခိုက်ဒဏ်ရာရပြီး (၄) ဦး ဒဏ်ရာပြင်းထန်ကြောင်း TNLA ဘက်မှ ထုတ်ပြန်ထားသည်။
နောင်ချိုမြို့နယ်အတွင်း TNLA နှင့် စစ်ကောင်စီတို့ ခြောက်လကျော်ကြာ တိုက်ပွဲပြင်းထန်နေသည့် တောင်းခမ်းဒေသတွင် အရှေ့မြောက် တိုင်းစစ်ဌာနချုပ် (ရမခ) လက်အောက်ခံ အမြောက်စခန်းကွပ်ကဲမှု ဌာနချုပ် (မစခ-၉၀၂) တည်ရှိပြီး အမြောက်တပ် – ၂၀၆၊ ၃၅၄၊ ၄၀၆ တပ်ရင်းများ ဝန်းရံထားသည်။
ဖေဖော်ဝါရီ (၁၆) ရက်မှ (၁၇) ရက်အထိ တရုတ်နိုင်ငံ ကူမင်းမြို့တွင် ပြုလုပ်ခဲ့သည့် စစ်ကောင်စီနှင့် TNLA နှစ်ဘက်တွေ့ဆုံဆွေးနွေးမှု မအောင်မြင်ခဲ့ဘဲ စစ်ကောင်စီဘက်မှ TNLA ထိန်းချုပ်နယ်မြေ နောင်ချို၊ ကျောက်မဲ၊ မိုးကုတ်နှင့် မိုးမိတ်မြို့နယ်ထဲ လက်နက်ကြီးနှင့် လေကြောင်း ပစ်ခတ်တိုက်ခိုက်မှု ဆက်တိုက်ပြင်းထန်လျက် ရှိသည်။
Leave a Comments