ရန်ကုန်နှင့် ပဲခူးတိုင်းတို့ကို ပြန်လည်စိုးမိုးရန်အတွက် တိုက်ပွဲစတင်ဖော်ဆောာင်တော့မည်ဟု အမျိုးသားညီညွတ်ရေး အစိုးရ (NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ပြောဆိုလိုက်သည်။

ရန်ကုန်သို့ ဦးတည်သည့် စစ်ရေးဖော်ဆောင်မှုများအတွက် ထပ်ရွှေ့ပြောင်းမည့် တပ်ရင်းတပ်ဖွဲ့များကို ပြည်ထောင်စုဝန်ကြီးချုပ် မန်းဝင်းခိုင်သန်းက သွားရောက်တွေ့ဆုံခဲ့စဉ် ပြောဆိုခဲ့သည် ရုပ်သံကို NUG က ဖေဖော်ဝါရီ ၁၃ ရက်နေ့၌ ထုတ်ပြန်ခဲ့သည်။

“မင်းတို့တပ်တွေ ရွှေ့တော့မယ်။ ရွှေ့တော့မယ်ဆိုတာ ငါတို့အစိုးရရဲ့ ရည်ရွယ်ချက်ကတော့ အတွင်းထဲဝင်ပြီးတော့ ရန်ကုန်၊ ပဲခူး ဒီဒေသတွေပြန်လည်စိုးမိုးဖို့အတွက် ရည်ရွယ်ချက်ရှိတယ်။ ဒီအတွက်လည်း ရွှေ့တာ၊ ဒီနေ့ရွှေ့တာက တပ်ထွက်တာပဲ။ တိုက်ပွဲတွေစတော့မယ်ပေါ့။တပ်ထွက်တယ်ဆိုတာ ပန်းခင်းလမ်းကိုသွားတာမဟုတ်ဘူး၊ ဆူးခင်းလမ်းကိုသွားတာ” ဟု မန်းဝင်းခိုင်သန်းက ပြောကြားခဲ့သည်။

စစ်အာဏာရှင် များမရှိအောင် တော်လှန်ရေးလုပ်ဆောင်ရခြင်းဖြစ်ပြီး၊ အဓိက ရည်ရွယ်ချက်မပျောက်အောင် ရည်ရွယ်ချက်ခိုင်မာအောင် ထားရှိရန် လည်း မှားကြားခဲ့သည်။

ထို့ပြင် သင်တန်းများလည်း ပြီးဆုံးသွားပြီဖြစ်၍ အတွေ့အကြုံများလည်း ရရှိပြီဖြစ်ကြောင်း၊ စစ်သင်တန်းသားများ ကြံ့ကြံ့ခံနိုင်သည့်အတွက်လည်း များစွာဂုဏ်ပြုကြောင်း၊ အာဏာရှင်စနစ်ပျောက်မှ ဖွံ့ဖြိုးတိုးတက်မည်ဖြစ်သည့်အတွက် ရည်ရွယ်ချက်များ၊ ခံယူချက်များ မပျောက်စေရန် နှင့် သွေးခွဲမှုများကိုလည်း နားမယောင်ဖို့ရန်အတွက်လည်း ဝန်းကြီးချုပ်က မှာကြားခဲ့သည်။
ထို့ကြောင့် ရန်ကုန်မြို့နယ် အတွင်းနေထိုင်သည့်ပြည်သူများအနေဖြင့် ၎င်းသတင်းအပေါ် စိုးရိမ်မှုရှိသော်လည်း ယခင်ကဲ့သို့ စားစရာ များဝယ်ယူစုဆောင်းထားကြခြင်းမရှိတော့ကြောင်းသိရသည်။

“ ရန်ကုန်ကို လာမယ်ဆိုပြီးပြောနေတာတော့ကြာလှပါပြီ။ တိုက်မယ်ဆိုရင်လည်း အပြီးတိုက်လိုက်၊ တခါပြော တခါစိုးရိမ် တခါဆန်၊ဆီ၊စျေးတက်နဲ့ သံသယလည်နေတာ။ မြန်မြန်တိုက်၊ မြန်မြန်ပြီးတာပေ့ါ” ဟု ရန်ကုန်မြို့တွင် နေထိုင်သည့် အိမ်ရှင်မ တစ်ဉီးက ပြောသည်။