တအာင်း(ပလောင်)ပြည်နယ်လွတ်မြောက်ရေးတပ်ဦး (PSLF/TNLA) နှင့် စစ်ကောင်စီတို့ကြား ဆွေးနွေးပွဲတွင် နှစ်ဖက်အပြန်အလှန်တောင်းဆိုမှုများ ပြုလုပ်ခဲ့ကြပြီး ဆွေးနွေးညှိနိူင်းရန်ခက်ခဲသောကြောင့် ဖေဖော်ဝါရီလ (၁၇) ရက်နေ့ညနေပိုင်းတွင် တွေ့ဆုံပွဲ ရပ်ဆိုင်းခဲ့ကြောင်း သတင်းရရှိသည်။ ။

ဆွေးနွေးမှု မပြီးဆုံးမီ TNLAဘက်မှ ၎င်းတို့ ထိန်းချုပ်ထားသော နယ်မြေကို တအာင်းပြည်နယ်အဖြစ် အသိအမှတ်ပြုပေးရန်တောင်းဆိုခဲ့ပြီး အဆိုပါ တောင်းဆိုချက်ကို စစ်ကောင်စီမှ၂၀၀၈ ဥပဒေအရ မန်တုံနှင့် နန့်ဆန်မြို့နယ် နှစ်သာလျှင် တအာင်းဒေသအဖြစ် သတ်မှတ်နိုင်သည်ဟု သောသတင်းထွက်ပေါ်ခဲ့သည်။

အဆိုပါ တွေ့ဆုံဆွေးနွေးပွဲတွင် TNLAဘက်မှ ပစ်ခတ်မှုများ ရပ်တန့်နိုင်ရန် အချက်(၃)ချက်ကိုသာ ညှိနိူင်းဆွေးနွေးခဲ့သည်ဟု ဖော်ပြထားသည်။

ပထမဆုံးအချက်အနေဖြင့် နှစ်ဘက်တပ်ရောက်ရှိနေသော နေရာတွင် ရပ်တန့်ထားပြီး အပစ်ခတ် ရပ်စဲရန်၊ ဒုတိယ အချက်အနေဖြင့် နှစ်ဘက်စလုံး ထိုးစစ်များပြုလုပ်ခြင်း၊ ဒရုန်း၊လက်နက်ကြီး၊ လေယာဉ် အစရှိသည့် စစ်ရေးလှုပ်ရှားမှုများ ရပ်တန့်ရန် နှင့် နောက်ဆုံးတစ်ချက်မှာ နှစ်ဘက်ထိန်းချုပ်ဒေသအတွင်း ဒေသခံများ စားဝတ်နေရေးနှင့် ဆေးဝါးများသယ်ဆောင်နိုင်ရန်အတွက် ဖြတ်သန်းသွားလာခွင့်ပြုရန် အစရှိသည်တို့ ဖြစ်သည်။

စစ်ကောင်စီနှင့် TNLAတို့ကြား နှစ်ဘက်ညှိနိူင်းဆွေးနွေးမှု ခက်ခဲသည့်အခြေအနေကြောင့် သက်ဆိုင်ရာအဖွဲ့အစည်းများနှင့် ဆွေးနွေးပြင်ဆင်မှုများ ပြုလုပ်ပြီးမှသာ ဒုတိယအကြိမ် ပြန်လည်တွေ့ဆုံရန် တရုတ်အစိုးရ အထူးကိုယ်စားလှယ် မစ္စတာ တိန့်ရှီကျွင်းက ဦးဆောင်ဆွေးနွေးကာ တွေ့ဆုံမှုကို အဆုံးသတ်ခဲ့သည်ဟု ထုတ်ပြန်ချက်အရ သိရသည်။

ပြီးခဲ့သည့် ဖေဖော်ဝါရီ(၁၆) ရက်ကတည်းက TNLAဘက်မှ ဒုတိယဗိုလ်ချုပ်ကြီး တားဂျုတ်ဂျား ဦးဆောင်သော ကိုယ်စားလှယ်များနှင့် စစ်‌ကောင်စီကိုယ်စားလှယ် ကထစ(၁)မှူးဖြင်သည့် ဒုတိယဗိုလ်ချုပ်ကြီး ကိုကိုဦး တို့သည် တရုတ်အစိုးရ အစီစဉ်ဖြင့် တရုတ်နိုင်ငံ ယူနန်ပြည်နယ်၊ကူမင်းမြို့ရှိ ဟိုင်ဂင်ဟော်တယ်တွင် တွေ့ဆုံဆွေးနွေးမှု ပြုလုပ်ခဲ့သည်။