သျှမ်းပြည်တောင်ပိုင်း၊ တောင်ကြီးမြို့တွင် စစ်ကောင်စီမှ စစ်ဘေးရှောင်များကို ထောက်ပံ့သည့် ငွေကို အစိုးရဝန်ထမ်းဟောင်းများသာ ရရှိကြောင်း ဒေသခံများက ပြောသည်။

ပြီးခဲ့သည့် ဖေဖော်ဝါရီလ ပထမပတ်တွင် တောင်ကြီးမြို့ ရပ်ကွက် အုပ်ချုပ်ရေးမှူးများက စစ်ရှောင်များ၏ စာရင်းကို ကောက်ယူပြီး စစ်ဘက်ဆိုင်ရာ သက်ဆိုင်ရာ အကြီးအကဲများထံသို့ ပို့ပေးခဲ့ရသည်ဟု ရပ်ကွက် အုပ်ချုပ်ရေးမှူး တစ်ဦးက ပြောသည်။

စစ်ကောင်စီဖက်မှ စစ်ရှောင်များအတွက် ပေးအပ်သည့် ထောက်ပံ့ကြေးငွေကို မြေပြင်လက်တွေ့မှာ စစ်ရှောင်များမရဘဲ အစိုးရဝန်ထမ်းဟောင်း ဖြစ်သည့် စစ်ရှောင်များသာ ရရှိနေကြသည်ဟု အုပ်ချုပ်ရေးမှူးတစ်ဦးက သျှမ်းသံတော်ဆင့်ကို ပြောသည်။

“သူတို့က ရပ်ကွက်တိုင်းကို စာရင်းပဲ ကောက်ခိုင်းတာ တစ်ပြားမှ မပေးဘူး။ သူတို့ဘက်ပါတဲ့ ပင်စင်စားတွေ ကိုပဲပေးတာ။ ရိုးရိုးအရပ်သားတွေကိုဆို တပြားမှ မပေးဘူး။ သူတို့လူနဲ့ သူတို့ကိုပဲ ဓာတ်ပုံရိုက်ရအောင် ပေးတာ။ စစ်ရှောင်တွေကို စာရင်းကောက်ခိုင်းတယ် ဆိုတာ သူတို့ရွေးကောက်ပွဲလုပ်ဖို့ အတွက်ပဲ ဖြစ်မယ်။” ဟု အဆိုပါ အုပ်ချုပ်ရေးမှူးက ပြောသည်။

တောင်ကြီးတွင် စစ်ရှောင်ဦးရေ (၅၀၀) နီးပါးမျှသာ ကျန်ရှိပြီး လားရှိုးမှ စစ်ရှောင်များ နေရပ်ပြန်ကုန်ကြကာ ကရင်နီစစ်ရှောင်အနည်းငယ်သာ ကျန်ရှိတော့သည်ဟု ၎င်းက ဆက်ပြောသည်။

ထို့အပြင် တောင်ကြီးမြို့တွင် အိမ်ငှားခဈေးတက်၍သော်လည်းကောင်း အလုပ်ကိုင်ရှားပါးခြင်းကြောင့် စစ်ရှောင်များအတွက် ရေရှည်အဆင်မပြေသည့် အဆင်မပြေသည့်ကြားမှ နေရပ်သို့ ပြန်ကုန်ကြသည်ဟု အဆိုပါ အုပ်ချုပ်ရေးမှူးက ထပ်လောင်းပြောသည်။

ယမန်နေ့ (ဖေဖော်ဝါရီလ ၁၈)ရက်တွင် စစ်ရှောင်များကို တစ်ဦးလျှင် ကျပ်(၂သောင်း)ပေးမည်ဟု ဆို၍ မြို့တော်ခန်းမသို့ လာရောက်ထုတ်ယူခိုင်းပြီး ငွေကြေးမလုံလောက်ဟူသော အကြောင်းပြချက်ဖြင့် အိမ်ထောင်စု တစ်ခုလျှင် ကျပ်(နှစ်သောင်း)သာ ရရှိသည်ဟု စစ်ရှောင်အမျိုးသမီးတစ်ဦးက ပြောသည်။

“လာကောက်သွားတုန်းက ကျတော့ တစ်ဦးကို နှစ်သောင်းတဲ့ ။တကယ်သွားလိုက်တော့ ပိုက်ဆံမလောက်လို့ အိမ်ထောင်တစ်စုမှာ နှစ်သောင်းပဲရမယ်တဲ့။ သူတို့ပေးတာကလည်း အဲဒီ ခန်းမသွားတဲ့ ဆီဖိုးပဲရှိတာ။လက်မှတ်နဲ့ ပုံတွေပဲ ယူသွားတာ။ငွေကြတော့ မရဘူး။ အပြောနဲ့အလုပ်နဲ့ မညီကြဘူး လူကြီးတွေက။” ဟု အဆိုပါ စစ်ရှောင်အမျိုးသမီးတစ်ဦးက ပြောသည်။

စစ်ရှောင်များသည် အိမ်ငှားခအပြင် စစ်မှုထမ်းကြေးဟုဆိုကာ တစ်လလျှင် ကျပ်(၃သောင်း)ထည့်နေရကြောင်းနှင့် အသက်ရှင်ရေးအတွက်ပါ ရုန်းကန်လှုပ်ရှားနေကြရသည်ဟု ၎င်းက ပြောသည်။

စစ်ခေါင်းဆောင် မင်းအောင်လှိုင် က လက်နက်ကိုင် ပဋိပက္ခများကြောင့် နေရပ်စွန့်ခွာထွက်ပြေးနေကြရသည့် စစ်ရှောင်များကို တစ်ဦးလျှင် ကျပ်(၂သောင်း) ထောက်ပံ့ပေးမည်ဟု ပြီးခဲ့သည့် ဖေဖော်ဝါရီလ (၁၁) ရက်နေ့ နေပြည်တော်တွင် တိုင်းနှင့်ပြည်နယ်ဝန်ကြီးချုပ်များနှင့် တွေ့ဆုံစဉ် ပြောဆိုသွားခဲ့သည်။

ညောင်ရွှေမြို့နယ် စံကား ဒေသဖက်တွင်လည်း ပြီးခဲ့သည့် (ဖေဖော်ဝါရီလ ၁၇ )ရက်နေ့တွင် စစ်ရှောင်ဦးရေများလိုက်လံ ကောက်ယူနေပြီး ဖြစ်ပြီး အချို့သောစစ်ရှောင်များမှာ ထောက်ပံ့ငွေများ ရရှိနေသည်ဟု သိရှိရသည်။

“မနေ့က တစ်ယောက်ကို နှစ်သောင်းကျပ်ရတယ်။ တခါတည်း လက်မှတ်ထိုးပြီး ပေးလိုက်တယ်။ တကယ်လို့ ကယားကို ပြန်မယ်ဆိုရင်လည်း သူတို့ဆီ စာရင်းပေးရမယ်တဲ့။ ဒီကပြန်ရင်လည်း ဟိုမှာ ထောက်ပံ့ငွေ ရအောင်လို့ပြောတာပဲ။ ကယားကလူကို ငွေရလားလို့ မေးကြည့်တော့ ရတယ်တဲ့။”ဟု စံကားတွင် စစ်ဘေးရှောင်နေသူ အမျိုးသားတစ်ဦးက ပြောသည်။

စစ်ကောင်စီထောက်ပံ့ငွေကို ၂၀၂၅ ခုနှစ် ဇန်နဝါရီလ မှ ဒီဇင်ဘာလအထိ လစဉ်ထောက်ပံ့ပေးသွားမည် ဖြစ်ပြီး သဘာဝဘေးနှင့် စီမံခန့်ခွဲမှု ရန်ပုံငွေမှ အသုံးပြုသွားမည်ဟု စစ်ကောင်စီမှ ပြောဆိုထားသည်။

ပြီးခဲ့သည့် ဖေဖော်ဝါရီလ (၁၇) ရက်နေ့တွင် စစ်ကောင်စီမှ ဟိုပုံး၊ဆီဆိုင်နှင့် ပင်လောင်း မြို့နယ်များတွင် ရှိသည့် စစ်ဘေးရှောင်များအတွက် ငွေကျပ် (၃၁၁၇ သိန်း ၆ သောင်း) ကို ပေးအပ်ခဲ့သည်ဟု သတင်းစာမျက်နှာတွင် ဖော်ပြထားသည်။