သျှမ်းပြည် ညောင်ရွှေမြို့နယ်ရှိ စစ်ကောင်စီ စစ်ဆေးရေးဂိတ်တွင် စားနပ်ရိက္ခာနှင့် ကုန်ပစ္စည်းများကို လကြာမြင့်စွာ သယ်ဆောင်ခွင့် မပေးဘဲ ပိတ်ထားကြောင်း စုံစမ်းသိရှိရသည်။

ညောင်ရွှေမြို့နယ် မှော်ဘီကျေးရွာရှိ စစ်ကောင်စီ စစ်ဆေးရေးဂိတ်သည် ပြီးခဲ့သည့် ၂၀၂၄ အောက်တိုဘာလမှ စ၍ ယခု ဖေဖော်ဝါရီ လလယ်အထိ (၅) လကျော်ကြာ ဆန်၊ ဆီနှင့် ဆေးဝါးတို့အပြင် အိမ်သုံးစက်သုံးဆီပုံးများကိုပါ သယ်ဆောင်ခွင့်မပြုကြောင်း စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အဲ့လို ပိတ်ထားလို့ အရင်နှစ်ဝက်လောက် ကတည်းကပဲ ကူညီတာမျိုး မရှိတာ။ အိမ်အတွက် စားသောက်ဖို့လောက်ပဲ ပေးဖြတ်တာပေါ့။ စစ်‌ဘေးရှောင်တွေ ကူညီဖို့ဆိုရင် ပေးမဖြတ်ဘူးပါတဲ့၊ ပစ္စည်းတွေကို သိမ်းထားတာမျိုး လုပ်တယ်။ ဒေသခံတွေ သယ်လာရင်တောင် တော်တော် စကား‌ပြောရတယ်။ ဂိတ်မှာ ပိုက်ဆံလည်း ပေးရတယ်”ဟု စစ်ဘေးရှောင် အမျိုးသမီးတစ်ဦးက ပြောသည်။

လက်ရှိအချိန်ထိ စစ်ကောင်စီနှင့် ပအိုဝ်းပြည်သူ့စစ် PNO မှ ကုန်ပစ္စည်းများ သယ်ယူခွင့် မပေးသောကြောင့် စစ်ဘေးရှောင်များ၏ စားနပ်ရိက္ခာအတွက် အခက်အခဲများ ဖြစ်စေပြီး ဒေသထွက်သည့် ဆန်များကိုသာ ပြန်ဝယ်စားနေရကြောင်းကို စစ်ဘေးရှောင် အမျိုးသားတစ်ဦးက ထပ်လောင်းပြောသည်။

“ကျနော်တို့က ရွာဒေသကနေထွက်တဲ့ ဆန်ကိုပဲ ပြန်ဝယ်စားရတာပေါ့။ မှော်ဘီမှာ ကုန်ကားတွေ ဖြတ်ရ အရမ်းခက်ပြီး ပေးမဖြတ်လို့လေ။ ထောက်ပံ့ဖို့ကလည်း သွားလာဖို့ အဆင်မပြေတော့ လာကူညီဖို့တောင် ကြောက်နေကြတာပေါ့”ဟု ၎င်းက ပြောသည်။

ထိုသို့ ကုန်ပစ္စည်းများကို သယ်ယူရန် မလွယ်ကူသည့်အပြင် ဂိတ်ကြေးများလည်း ပေးဆောင်ရသည့် အတွက်ကြောင့် အချို့သော ကုန်ပစ္စည်းများသည် ညောင်ရွှေမြို့ထက် ပို၍ ကုန်ဈေးနှုန်း မြင့်နေကြောင်း ဒေသခံများက ပြောသည်။

“ကုန်ဈေးနှုန်းတွေက တက်တယ်၊ ဂိတ်မှာ ဆန်တစ်အိတ်ကို သောင်းဂဏန်း ပေးရတယ်။ ကျမတို့က ဈေးပိုပေးပြီး ဝယ်ရတာပေါ့ ဒီစံကားဘက် ရောက်ရင်။ ဒီမှာ ဆီပုံးဝါ တစ်ပုံးကို ၁ သိန်း ၂ သောင်း၊ အဲ့တာတောင် အညံ့ထဲက ပဲရတယ်။ ဆန်ကလည်း ၂၄ ပြည် တစ်အိတ်ကို ၁ သိန်းခွဲလောက် ပေးရတယ်”ဟု စစ်ဘေးရှောင် အမျိုးသမီးတစ်ဦးက ပြောသည်။

၎င်းမှော်ဘီစစ်ဆေးရေးဂိတ်တွင် ငွေအဆမတန် တောင်းခံခြင်း၊ စစ်ဆေးမှုများ တင်းကြပ်ခြင်း ပြုလုပ်လေ့ရှိကြောင်း သိရသည်။

ထိုလမ်းကြောင်းသည့် မှော်ဘီကျေးရွာ တောင်ဖက် လွိုင်ကော်သွားလမ်း၊ အနောက်ဖက် ပင်လောင်းလမ်း၊ မြောက်ဘက် တောကြီးလမ်းနှင့် အရှေ့ဘက် ဆီဆိုင်မြို့သွားလမ်း ဆုံသည့် နေရာဖြစ်ကြောင်း သိရသည်။